राष्ट्रपति सवारी प्रकरण: प्रहरीले राेक्न खाेजेपछि जाइलागेका थिए डाक्टर सिंह

राष्ट्रपति सवारी प्रकरण: प्रहरीले राेक्न खाेजेपछि जाइलागेका थिए डाक्टर सिंह

A+ A A-

नेपाल चिकित्सक संघको आन्दोलनका कारण आइतबार बिहान ट्रमा सेन्टरमा बिरामी अलपत्र परे । ट्रमा सेन्टरका एक चिकित्सकमाथि प्रहरी वृत्त जनसेवाका प्रहरी वरिष्ठ हवल्दार शम्भुजंग गुरुङले शुक्रबार हातपात गरेको भन्दै संघले आकस्मिकबाहेक अस्पतालका सेवा सबै ठप्प पारेपछि उपचारका लागि टाढाटाढाबाट आएका बिरामीहरू बिचल्लीमा परेका हुन् ।

यद्यपि जिल्ला प्रहरी कार्यालय काठमाडौंले हवल्दार शम्भुजंग गुरुङलाई निलम्बन गरिसकेको छ । अस्पतालको सेवा सञ्चालनबारे प्रधानमन्त्री तथा मन्त्रिपरिषद्‌ कार्यालयमा भएको छलफलपछि भने चिकित्सकले सेवा पुन:सञ्चालन गरेका छन् । प्रधानमन्त्री कार्यालयका सचिव डा.गणेशप्रसाद पाण्डे तथा नेपाल चिकित्सक संघका अध्यक्ष लोचन कार्कीबीच ६ बुँदे सहमति भएपछि चिकित्सककाे आन्दाेलन फिर्ता भएकाे हाे ।

हेर्नुहोस् सहमतिपत्र

यस्तो थियो घटना

शुक्रबार दिउँसो ३ बजे राष्ट्रपति विद्यादेवी भण्डारीले संसद्का दुवै सदन राष्ट्रियसभा र प्रतिनिधिसभाकाे संयुक्त बैठकलाई सम्बोधन गर्ने कार्यक्रम थियो । त्यसका लागि राष्ट्रपति सवार हुने ‘रुट’मा तीनवटा सुरक्षा निकाय नेपाल प्रहरी, सशस्त्र प्रहरी बल र राष्ट्रिय अनुसन्धान विभागका कर्मचारी सडकमा तैनाथ थिए ।

राष्ट्रपति सवार हुने ‘रुट’मा ट्राफिक प्रहरी र नेपाल प्रहरीले अन्य सवारीसाधनलाई निषेध गरेकाे थियाे । जुन भीभीआईपी सवारी हुँदा गरिने सुरक्षाको सामान्य प्रक्रिया हो ।

राष्ट्रपतिले संसद्‌मा करिब १ घण्टा लामो सम्बोधन गरिसकेपछि फर्किने क्रममा भने ट्रमा सेन्टरअगाडि राष्ट्रपतिकाे सवारीका लागि खटिएका प्रहरी हवाल्दार गुरुङ र ट्रमा सेन्टरमै कार्यरत डाक्टर जनिथलाल सिंहबीच विवाद भयो ।

गुरुङसहितको प्रहरी टाेलीलाई सुरुमा उनी डाक्टर हुन् भन्ने थाहा थिएन ।

डाक्टर सिंह ड्युटी सकेर साइकलमा घर फर्किंदै थिए । तर, प्रहरीले राष्ट्रपति सवारी भएको भन्दै उनलाई रोक्न खोज्याे । राष्ट्रपति ट्रमा सेन्टर नजिक पुग्दै थिइन् । अन्य सवारीसाधन रोकिसकेका थिए । डाक्टर सिंहले भने रोक्न मानेन् । उनी साइकलमा सडकमै पुगे ।

डा. सिंहले ‘म डाक्टर हुँ पनि भन्नु भएन । किन रोक्न खोजेको ? म जान्छु भन्दै प्रहरीको निर्देशनलाई अवज्ञा गर्न खोजे । प्रहरीले उनलाई रोक्न खोज्यो । त्यही बेला हवल्दार गुरुङ र सिंहबीच विवाद भएको हो,’ ड्युटीमै खटिएका एक प्रहरीले भने ।

ती प्रहरीकाे दाबीअनुसार प्रहरीले रोक्न खोज्दा सुरुवाती लात्ती डाक्टर सिंहले नै प्रहार गरेका थिए । त्यसको जवाफी प्रहार गुरुङले पनि गरेको ती प्रहरीको दाबी छ । ड्युटीमा रहेका प्रहरी कर्मचारीमाथि हातपात गर्नु फौजदारी अपराध मानिन्छ ।

काठमाडाैं प्रहरी परिसरका एसपी सीताराम रिजालले प्रहरी र चिकित्सक दुवै चाैबीसै घण्टा खटिने पेसाका व्यक्ति भए पनि गैरव्यवसायिक गतिविधिका कारण उत्पन्न दु:खद विषय भएकाले उक्त घटनामा संलग्न प्रहरी कर्मचारीलाई प्रहरी संगठनले कारबाही गरेकाे बताए ।

डाक्टर सिंहले भने आफूमाथि प्रहरीले फिल्मी शैलीमा कठालो समातेको दाबी गर्दै आएका छन् । शिलापत्रले घटनाबारे बुझ्न पटकपटक फोन गर्दा पनि डाक्टर सिंहले फोन रिसिभ गरेनन् ।

उता नेपाल प्रहरीका पूर्वएआईजी राजेन्द्र सिंह भण्डारीलगायतले राष्ट्रपति सवार घटनामा प्रहरी हवल्दारमाथि भएकाे कारबाहीबारे असन्तुष्टि जनाएका छन् ।

‘महामहिम राष्ट्रपतिको सवारीमा अह्राएको काम गर्ने हवल्दार सा'बलाई कारबाही गर्नुको साटो सडक आवागमनमा रोक लगाउने निर्णय लिने सुरक्षा समितिका अधिकारी र पदीय मर्यादाका दृष्टिले उक्त निर्णय उपयुक्त छ भनेर निषेधित मर्यादामा रमाउने राष्ट्रपति महोदयले चिकित्सक कुटिएको घटनाको जिम्मेवारी लिनुपर्छ,’ भण्डारीले लेखेका छन्, ‘हवल्दारको निलम्बन फुकुवा गरेर मुख्य दोषीलाई कारबाहीको माग राख्छु ।’

प्रकाशित मिति: आइतबार, माघ २९, २०७९ १४:४०