मन्त्रीका छोराले चलाएको कारको ठक्करबाट घाइते पाण्डे चार महिनादेखि न्यायकै खोजीमा

मन्त्रीका छोराले चलाएको कारको ठक्करबाट घाइते पाण्डे चार महिनादेखि न्यायकै खोजीमा

पूर्वस्वास्थ्य राज्यमन्त्री हिराचन्द्र केसीका छोरा तुसार केसी र उनको गाडी ।

A+ A A-

७ मंसिर, २०७९ मा थापाथली इन्जिनियरिङ्ग क्याम्पसका उपप्राध्यापक कृष्णप्रसाद पाण्डे ललितपुरको ग्वार्कोबाट थापाथली क्याम्पस जाँदै थिए । प्युठान ऐरावती–२ का पाण्डे ग्वार्कोबाट बा ३३ प ६३७४ को मोटरसाइकलमा सवार थिए ।

उक्त मोटरसाइकल पाण्डेको निजी भने होइन । उनी पठाओ मोटरसाइकलमा क्याम्पस जाँदै थिए । ग्वार्कोबाट नयाँबानेश्वर हुँदै बिजुली बजार पुग्दै गर्दा पाण्डेले एक्कासि दुर्घटनामा परे ।

पाण्डे चढेको पठाओ मोटरसाइकललाई नयाँ बानेश्वरतर्फ जाँदै गरेको प्रदेश-३-०१ ०२३ च ७५०१ नम्बरको सेतो रंगको निजी कारले ठक्कर दियो । पाण्डे सडकमा बजारिन पुगे ।

पाण्डेलाई ट्राफिक प्रहरीले तत्कालै मिनभवनस्थित सिभिल अस्पताल पुर्‍याए । अस्पतालले पाण्डेको एउटा खुट्टा फ्याक्चर भएकाले तत्काल अपरेसन गर्नुपर्ने सुझाव दियो । पाण्डे उपचारमा व्यस्त भए । कार चालक प्रहरीकै नियन्त्रणमा रहेकाले घटनाबारे दुवै पक्षबीच छलफल होला भन्ने पाण्डेले ठानेका थिए ।

तर, पाण्डेले सोचेभन्दा विपरीत नयाँबानेश्वर प्रहरी वृत्तले कार चालक दाङ स्थायी घर भएका तुसार केसीलाई पठाओ मोटरसाइकलकै गल्ती भएको भन्दै छाडिदियो । उनी एकपटक पनि आफ्नै कारको ठक्करबाट घाइते भएका पाण्डेको स्वास्थ्य अवस्था बुझ्न अस्पताल पुगेनन् । उल्टै शक्तिकेन्द्रमार्फत प्रहरीलाई दबाब दिँदै मोटरसाइकलको गल्ती देखाउन लागि परे ।

कार चालक केसी तत्कालीन स्वास्थ्य तथा जनसंख्या राज्यमन्त्री हिराचन्द्र केसीका छोरा हुन् । हिराचन्द्र २०७४ को निर्वाचनमा नेकपा एमालेबाट दाङ क्षेत्र नम्बर ३ बाट प्रतिनिधिसभा सदस्यमा निर्वाचित भएका थिए । एमाले विभाजन हुँदा माधव कुमार नेपाल नेतृत्वको नेकपा एकीकृत समाजवादीतिर लागेका केसी स्वास्थ्य राज्यमन्त्री बनेका थिए ।

घटना भएको चार महिनासम्म पनि पीडित पाण्डेले न्याय पाउन सकेका छैनन् । प्रहरीले दुवै पक्षलाई छलफलसमेत गराउन नसकेको दुखेसो पाण्डेको छ । ‘प्रहरीले पीडितलाई न्याय दिनुको साटो पीडकलाई जोगाउन लाग्यो,’ पाण्डेले भने । पाण्डेलाई थापाथलीसम्म पुर्‍याउने जिम्मा पाएको पठाओ कम्पनीसमेत पन्छिएको गुनासो उनको छ ।

अस्पतालबाट पहिलो चरणको अपरेसन सकेर फर्किएका पाण्डेले कार चालकमाथि जोहरी दिन खोज्दासमेत प्रहरीले दर्ता गर्न मानेन् । उल्टै प्रहरीले पाण्डेलाई मोटरसाइकलको गल्ती भएको दाबी गरिरह्यो । घटनाप्रति प्रहरीको उदासीनता देखिएपछि पाण्डे घटनास्थलको सीसीटीभी फुटेज खोज्नतर्फ लागे । प्रहरीले सीसीटीभी फुटेज हेरेपछि भने कार चालक केसीकै गल्ती देखिएको भन्दै दुवै पक्षबीच छलफल गराउने बतायो ।

कारको ठक्करबाट घाइते भएका उपप्राध्यापक कृष्णप्रसाद पाण्डे ।

तर, उनीमाथिको जाहेरी लिन भने नयाँबानेश्वर प्रहरीले मानेन । प्रहरीको व्यवहारबाट आजित बनेका पाण्डे न्यायको खोजीमा गृह मन्त्रालय पुगे । पाण्डे गृह मन्त्रालय पुग्दा रवि लामिछाने गृहमन्त्री थिए । घटनाबारे बुझेका गृहमन्त्री लामिछानेले नयाँबानेश्वर प्रहरी वृत्तका प्रमुख निशान श्रीवास्तवलाई सिधा फोन गरे । गृहमन्त्रीको निर्देशनपछि कार चालक केसीविरुद्ध उजुरी दर्ता गरेको प्रहरीले अझै पक्राउ भने गर्न सकेको छैन ।

केसीविरुद्ध जिल्ला अदालत काठमाडौंले १४ पुसमै प्रहरीलाई पक्राउको अनुमति दिइसकेको छ । तर, केसी हालसम्म पनि पक्राउ पर्न भने सकेका छैनन् । घटनाबारे नयाँबानेश्वर प्रहरी प्रमुख डीएसपी निशान श्रीवास्तवसँग प्रतिक्रिया लिन खोज्दा भने उनको फोन उठेन ।

काठमाडौं प्रहरी परिसरका प्रवक्ता सिताराम रिजालले मुद्दा दर्ता भइसकेकाले केसीलाई प्रहरीले खोजिरहेको बताए । 'केसीविरुद्ध नयाँबानेश्वर प्रहरी वृत्तमा मुद्दा दर्ता भइसकेको छ । पक्राउ पुर्जी जारी भइसकेकाले उनको खोजी प्रहरीले गरिरहेको छ,' प्रवक्ता रिजालले भने, 'पक्राउ गरेपछि कारबाहीको प्रक्रिया अघि बढाउँछौँ ।'

प्रकाशित मिति: आइतबार, माघ २९, २०७९ १२:५८