सुदूरपश्चिमको मुख्यमन्त्री कांग्रेसको पोल्टामा जाने संकेत, नाउपाका सांसदहरू धनगढी फर्केनन्

सुदूरपश्चिमको मुख्यमन्त्री कांग्रेसको पोल्टामा जाने संकेत, नाउपाका सांसदहरू धनगढी फर्केनन्

A+ A A-

सुदूरपश्चिम प्रदेश सरकारको नेतृत्व अब कांग्रेसको पोल्टामा जाने संकेत देखिएको छ । मुख्यमन्त्री राजेन्द्र सिंह रावलले विश्वासको मत पाउन मुस्किल देखिएपछि प्रदेशसभाको सबैभन्दा ठूलो दलका हैसियतले नेपाली कांग्रेसले सरकारको नेतृत्व पाउने अवस्था बन्न लागेको हो ।

विश्वासको मतको प्रयोजनका लागि आज दिउँसो १ बजे बोलाइएको प्रदेशसभा बैठक नागरिक उन्मुक्ति पार्टी (नाउपा) का सांसद उपस्थित नभएपछि ४ बजेका सारिएको छ । नाउपाले विश्वासको मत नदिने निर्णय गर्दै सांसदहरू काठमाडौंमै बसेकाले मुख्यमन्त्री रावलले विश्वासको मत नपाउने सम्भावना बढेको छ ।

आफ्नो पार्टीका नेता रेशम चौधरीको रिहाइ सुनिश्चित नभएको भन्दै नागरिक उन्मुक्ति पार्टीले यथास्थितिमै विश्वासको मत दिन नसकिने बताएपछि रावल नेतृत्वको गठबन्धन सरकार धरापमा परेको छ ।

२७ पुसमा मुख्यमन्त्रीमा नियुक्त रावलले विश्वासको मत लिनुपर्ने आज अन्तिम दिन हो । सरकार गठनको एक महिनाभित्र विश्वासको मत लिने संवैधानिक ब्यवस्था छ । संविधानको धारा १६८ को उपधारा २ बमोजिम नियुक्त मुख्यमन्त्रीले उपधारा ३ अनुसार ३० दिनभित्र विश्वासको मत लिनुपर्छ । यस अवधिमा मुख्यमन्त्रीले विश्वासको मत प्राप्त गर्न नसके प्रदेश प्रमुखले प्रदेशसभामा सबैभन्दा बढी सदस्य भएको संसदीय दलको नेतालाई मुख्यमन्त्री नियुक्त गर्ने व्यवस्था छ ।

मुख्यमन्त्रीले विश्वासको मत नपाए ठूलो दलको हैसियले कांग्रेस संसदीय दलका नेता कमलबहादुर शाह मुख्यमन्त्री नियुक्त हुने छन् । ५३ सदस्यीय प्रदेशसभामा बहुमतका लागि २७ मत आवश्यक पर्छ । प्रदेशसभामा माओवादीका सभामुखबाहेक १०, एमालेका १०, नाउपाका ७ र राप्रपाका एक गरी सत्ता पक्षमा २९ सदस्य छन् ।