आयोजना अलपत्र पार्ने ठेकेदारमाथि निर्मम बन्दै बागमती सरकार

A+ A A-

ठेक्का लिएर समयमै काम नगर्ने निर्माण कम्पनीमाथि बागमती प्रदेश सरकार निर्मम बन्ने भएको छ ।

बागमतीका मुख्यमन्त्री शालिकराम जम्कट्टेल र भौतिक पूर्वाधार विकासमन्त्री युवराज दुलालले प्रदेशभित्रका अलपत्र आयोजनाहरूमाथि निगरानी बढाएका छन् । प्रदेश सरकारको बजेटमा निर्माण सुरु गरिएको थुप्रै सडक र पक्की पुलको निर्माण अलपत्र छ । सडक र पुल मात्रै नभई, हेटौँडामा प्रदेश सरकारकै सभाहलदेखि प्रदेशसभा भवन निर्माण पनि अलपत्र छ ।

प्रदेशसभा भवनको भौतिक प्रगति देखिए पनि मुख्यमन्त्री कार्यालय नजिकैको हेटौँडा उपमहानगरपालिकाको जग्गामा जग खनिएको सभाहलको काम भने अलपत्र छ । पूर्वाधार विकासका आयोजनाहरू अलपत्र भएपछि मुख्यमन्त्री तथा मन्त्रिपरिषद्को कार्यालयमा मुख्यमन्त्री र भौतिकमन्त्री, आन्तरिक मामिला तथा कानुनमन्त्री गंगानारायण श्रेष्ठ, श्रम, रोजगार तथा यातायातमन्त्री एकालाल श्रेष्ठले आयोजना कार्यालयदेखि निर्माण व्यवसायीसम्मलाई राखेर कामको प्रगतिबारे जानकारी लिएका छन् । सरकारले पहिलो चरणमा सडक र पुल निर्माणलाई चासो दिएको छ । मुख्यमन्त्री जम्कट्टेलले सरोकारवाला निकायबीचको छलफलमा काम नगर्ने मनासय बोकेका ठेकेदारलाई अब समय थप नहुने बताए ।

Mantri dulal1675848426.jpg

काम गर्दै जाँदा समय नभएर ढिला भएको भए समय थप गर्न सकिने तर कामै नगरी समय थपको माग गर्ने ठेकेदारहरूलाई समय थप गर्न नसकिने उनको भनाइ छ । मुख्यमन्त्री जम्कट्टेलले देशको राजधानी काठमाडौंबाट प्रदेशको राजधानी हेटौँडा जोडने छोटोमार्गको स्तरोन्नती दुई महिनाभित्र सक्न निर्देशनसमेत दिए । हेटौँडा–काठमाडौं जोड्ने छोटोमार्गअन्तर्गत तीन चरणमा भइरहेको कामबाट उल्लेख्य भौतिक प्रगति नदेखिएपछि प्रदेश सरकारले चासो लिएको हो ।

बागमती प्रदेशभित्र रहेको संघीय र प्रदेश राजधानी जोड्ने छोटोमार्ग कन्तबिजोग अवस्थामा छ । भैँसेदेखि फर्पिङसम्म तीन चरणमा काम भइरहेका छन् । भैँसे-भिमफेदी, हुमानेभञ्ज्याङ-फर्पिङखण्ड र सिस्नेरी-छैमले-दक्षिणकाली खण्डको काम भइरहेका हुन् । भैँसेदेखि भीमफेदीसम्म र सिस्नेरी सडकखण्ड स्तरोन्नतीका लागि भौतिक प्रगति भए पनि हुमाने र फर्पिङखण्डको काम भएको छैन । छोटो मार्गको फाखेलतर्फ धेरै सवारीसाधन गुड्ने गरेका छन् । फाखेल क्षेत्रमा औसत सडक राम्रो भए पनि हुमानेदेखि फर्पिङसम्मको खण्ड अत्यन्तै जेखिमयुक्त रहेको छ । हुमानेदेखि फर्पिङसम्मको खण्डमा धेरै सवारी दुर्घटनासमेत हुने गरेको छ ।

करिब दुई वर्षअघिदेखि निर्माण सुरु गइरहेको उक्त मार्ग हालसम्म स्तरोन्नती हुन नसकेको हो । बागमती प्रदेश सरकारको भौतिक पूर्वाधार विकासमन्त्री युवराज दुलालले भैँसेदेखि फर्पिङसम्म भइरहेका निर्माणका कामलाई तीव्रता दिने निर्णय भएको जानकारी दिए । भैँसे-भिमफेदी र हुमाने-फर्पिङखण्ड तथा सिस्नेरी-छैमले-दक्षिणकालीखण्डको काम द्रूत गतिमा सम्पन्न गर्न फागुन १ गतेबाट करिब २ महिनासम्म यी सडकखण्डमा यातायात सेवा बन्द गर्ने निर्णय पनि गरिएको छ ।

वैकल्पिक सडकका रूपमा कान्तिलोकपथ र थानकोट–चित्लांङ–मार्खु–कुलेखानी–भिमफेदीखण्डबाट यातायात सुचारु गर्ने र यी समग्र कामको समन्वय भौतिक पूर्वाधार विकास मन्त्रालयले गर्ने निर्णय भएको छ । सडक र पुलको अवस्थाबारे जानकारी लिएपछि मकवानपुरगढी गाउँपालिका र हेटौँडा उपमहानगरपालिकामा ठेकेदारले अलपत्र पारेको पक्की पुलको निरीक्षण गर्दै भौतिक पूर्वाधार विकासमन्त्री दुलालले ठेक्का तोड्ने चेतावनी दिएका छन् । मकवानपुरगढीको ५ र ३ नम्बर वडा जोड्ने पक्की पुल ६ वर्षदेखि अलपत्र छ । यसैगरी, हेटौँडा–१ लालझाडी र चौकीटोल जोड्ने पुल दुई वर्षसम्म एउटा खाल्डो पनि पूरा खनिएको छैन् । मन्त्री दुलालले दुई वर्षमा एउटा खाल्डो खनिरहेको दृश्य प्रत्यक्ष देखेपछि आक्रोशित हुँदै ठेक्का तोड्ने चेतावनी दिएका हुन् ।

केही दिनअघि लालझाडीका स्थानीयले चरणवद्ध आन्दोलनको चेतावनी दिँदै मन्त्रालय घेर्ने र राजमार्ग अवरुद्ध गर्ने धक्की दिएका थिए । यसअघि लालझाडीकै पुलको काम छिटो गर्न मन्त्रालयमा छलफल भए पनि ठेकेदार पक्ष काम नगरी बसेको थियो । चौकीटोल र लालझाडी जोड्ने पुल तथा मकवानपुरगढीको सामरी खोलामा अलपत्र पुलको अवस्था हेरेपछि मन्त्री दुलालले काम तीव्र गतिमा सक्न निर्देशन दिएका छन् । मकवानपुरगढीमा ३ स्पानको उक्त पुल ठेकेदारको बदमासीले गर्दा अहिलेसम्म ३ वटा मात्र पिल्लर उठाइएको छ ।

hetauda-1 Bridge1675848442.jpg

मकवानपुरगढीमा तत्कालीन संघीय मामिला तथा स्थानीय विकास मन्त्रालयअन्तर्गत जिल्ला विकास समिति मकवानपुरले नागार्जुन शंखरमाली जेभी नामक निर्माण व्यवसायी कम्पनीलाई १५ महिनाभित्र पुल निर्माण गरिसक्नुपर्ने गरी निर्माणको जिम्मा दिएको थियो । तर, निर्माण व्यवसायी कम्पनीको लापरबाही र सरोकारवाला निकायको मौनताका कारण हालसम्म पनि उक्त पुलको निर्माणको काम एक चौथाइ पनि हुन नसकेको हो । नागार्जुन शंकरमाली जेभीलाई ५ करोड ३७ लाख ९२ हजार रुपैयाँ लागतमा २०७३ साल पुस ११ गते उक्त पुल निर्माणका लागि ठेक्का सम्झौता भएको थियो ।

सम्झौता अनुसार, गत २०७४ चैत ११ गतेसम्ममा उक्त पुलको निर्माण कार्य सम्पन्न भइसक्नुपर्ने हो । ठेक्का सम्झौता भएको ६ वर्ष बितिसक्दा समेत १ सय ३ मिटर लम्बाइको उक्त पुल अलपत्र अवस्थामा छ । हेटौँडाको लालझाडी र चौकीटोल जोड्ने पक्की पुल निर्माणका लागि बागमती प्रदेश सरकार भौतिक पूर्वाधार विकास मन्त्रालयअन्तर्गतको भौतिक पूर्वाधार विकास कार्यालय, भरतपुर चितवनले निर्माण व्यवसायी शिवशक्ति-सिद्धार्थ-शिवम् जेभी मकवानपुरसँग ठेक्का सम्झौता गरेको थियो ।

पक्की पुल निर्माण गर्न २ वर्षअघि दिइएको ठेक्काअन्तर्गत हालसम्म एउटा खाल्डो खन्नुबाहेक काम नभएको हेटौँडा–१ का वडाध्यक्ष सविन न्यौपाने बताउँछन् । १७ जेठ २०८० सम्ममा कार्य सम्पन्न गर्ने गरी १८ जेठ २०७८ मा भएको सम्झौता अनुसार काम नहुँदा स्थानीयहरू मारमा परेका छन् । पुल निर्माणका लागि ८ करोड ४७ लाखमा सम्झौता भएको थियो । ठेकेदार कम्पनीले सम्झौताअनुसारको झण्डै ४० लाख बजेट बुझिसकेको छ तर काम अघि बढ्न नसकेको वडाध्यक्ष न्यौपानेले बताए ।

पुल निर्माणको काम तीव्र गतिमा नगरे ठेक्का तोड्ने मन्त्री दुलालले चेतावनी दिए । सरकारबाट ठेक्का लिने र काम नगर्ने कम्पनीसँग ठेक्का तोडेर तीव्र गतिमा काम गर्ने गरी पुनः ठेक्का लगाउने योजनामा मन्त्री दुलाल पुगेका हुन् । मकवानपुरगढीको सामरी खोलामा निमाण गर्न लागिएको पुल हालसम्म पूरा नभएको भन्दै ठेक्का तोडेर फेरि ठेक्का लगाउने मन्त्री दुलालले बताए । पहिलो चरणमा निर्माण कम्पनीलाई काम गर्न लगाउने र नटेरे ठेक्का तोड्नुको विकल्प नभएको उनको भनाइ छ । हेटौँडा–१ को निर्माणाधीन पुलको निरीक्षणपछि उनले काम तीव्र गतिमा अगाडि नबढाए ठेक्का तोडेर अर्को ठेक्का लगाउने बताए ।

प्रकाशित मिति: बुधबार, माघ २५, २०७९ १५:०८