सर्वसाधारणबाट कराेडाैँ उठाएकाे धनगढीकाे शिव शिखर सहकारी बन्द, पैसा डुब्ने चिन्तामा बचतकर्ता

सर्वसाधारणबाट कराेडाैँ उठाएकाे धनगढीकाे शिव शिखर सहकारी बन्द, पैसा डुब्ने चिन्तामा बचतकर्ता

A+ A A-

‘खाता खोलेको ५ वर्ष भयो । ५ लाख जति बचत होला । सबैले सहकारी संस्था बन्द भयो भनेपछि पैसा निकाल्न आएकी हुँ,’ मंगलबार धनगढीको शिव शिखर सहकारीको कार्यालय पुगेकी धनगढी– ८ की केशरी रानाले भनिन्, ‘तर यहाँ सहकारी बन्द रहेछ । पैसा डुब्ने चिन्ताले सताएको छ ।’

कैलालीको धनगढीमा रहेको शिव शिखर बहुउद्देश्यीय सहकारी संस्था अहिले बन्द भएपछि बचतकर्ताको भीड लागेको छ । केशरी पनि अरु बचतकर्ता जस्तै आफ्नो पैसा डुब्ने चिन्तामा पुगेकी हुन् । नखाई नलाई राखेको पैसा सहकारीले डुबाउँछ कि भन्ने चिन्तामा उनी छिन् । केही दिनबाट सहकारी बन्द भएको सुनेपछि बचतकर्ताहरू सहकारीको कार्यालयमा पुगेका हुन् ।

धनगढी उपमहानगरपालिका ५ जाइँका पारस खड्काले पनि विगत ४ वर्षदेखि सहकारीमा पैसा जम्मा गर्दै आएका छन् । ‘विश्वास र भरोसामा मैले पैसा जम्मा गरेँं, साढे तीन लाख जति जम्मा होला,’ उनले भने, ‘यस्तो अवस्था आउला भन्ने सोचेकै थिएनौँ, तर अब कार्यालय नै बन्द भएपछि कसरी विश्वास गर्ने ?’ सहकारीले विश्वास गर्ने केही आधार पनि नदेखाएको उनको भनाइ छ ।

कार्यालय बन्द गरेर सहकारीका म्यानेजरसहित कर्मचारी सम्पर्कविहीन भएपछि बचतकर्ताहरू चिन्तामा डुबेका छन् । पैसा निकाल्न उनीहरू प्रशासन र स्थानीय तह धाउन थालेका छन् ।

धनगढी उपमहानगरपालिका– ३ चटकपुरका तीर्थप्रसाद श्रेष्ठ पैसा लिन आउँदा सहकारी बन्द देखेपछि आफ्नो पैसा डुब्ने पीरमा छन् । एक वर्षदेखि पैसा जम्मा गर्दै आएका उनी सहकारी नै बन्द भएपछि पैसा डुब्ने चिन्तामा छन् । ‘मुद्दतीको ११ लाख छ अब सहकारीमा विश्वास छैन,’ उनले भने, ‘अब जसरी पनि भएको पैसा झिक्न पाए हुन्थ्यो भन्ने लागेको छ । सहकारीबाट लुटपाट भयो भन्ने खबर आएपछि हामी त्यहाँ पुगेका हौँ ।’

धनगढीकै सुरेश भट्टराई पनि पैसा आउन आशामा केही दिनदेखि सहकारी धाइरहेका थिए । तर अहिले सकारी बन्द भएको देखेपछि झस्किए । ‘म्यानेजरले एक करोड आउँदैछ सबैको पैसा मिल्छ भनेपछि हामी हिजो पनि सहकारीमा आएका थियौँ,’ उनले भने, ‘तर अहिले सहकारी बन्द छ, हिजोदेखि कुरेर बसेका छौँ ।’

धनगढी उपमहानगरपालिका–१ धनगढीमा रहेको शिव शिखर बहुउद्देश्यीय सहकारी संस्थामा रकम जम्मा गरेका बचतकर्ता रकम डुब्ने चिन्ताले सहकारी धाइरहेका छन् । सहकारीमा बचतकर्तासहित शेयरधनी पनि धाइरहेका छन् ।

आइतबारदेखि बन्द भएको सहकारीले मंगलबार भने एक सूचना जारी गर्दै आर्थिक मन्दीले पुँजी व्यवस्थापन हुन नसक्दा कार्यालय बन्द गर्नुपरेको जानकारी दिँदै ग्राहक तथा शेयर सस्दयहरूसँग माफी मागेको छ ।

‘आर्थिक मन्दीकाबीच बचतकर्ता एकै पटक चल्ती खाता, मुद्दती रकम र शेयर रकम झिक्न आउँदा पुँजी व्यवस्थापन हुन नसक्दा तथा बजार लगानी (कर्जा) असुली नभएका कारण धनगढी कार्यालय केही दिनका लागि बन्द गरिएको सम्पूर्णमा जानकारी गराउँदछौं’, सूचनामा उल्लेख छ ।

अर्को सूचना नआएसम्म तथा पुँजी व्यवस्थापन नभएसम्म कार्यालय बन्द हुने शिवशिखर बहुउद्देश्यीय सहकारी संस्थाका प्रदेश प्रमुख हेमराज जोशीले बताए ।

प्रकाशित मिति: बुधबार, माघ २५, २०७९ ०८:५९