सर्वाधिक मानवीय संकट निम्त्याएको त्यो प्रकोप, एक अर्ब बढीलाई कोभिडबाट बचाएको रेडक्रसको दाबी (भिडियो)

सर्वाधिक मानवीय संकट निम्त्याएको त्यो प्रकोप, एक अर्ब बढीलाई कोभिडबाट बचाएको रेडक्रसको दाबी (भिडियो)

A+ A A-

मानव इतिहासमै सबैभन्दा बढी मानवीय क्षति गराउने प्रकोप कोभिड– १९ भएको अन्तर्राष्ट्रिय रेडक्रस र रेडक्रिसेन्ट सोसाइटी महासंघ (आईएफआरसी) ले दाबी गरेको छ ।

प्रकोप फैलिएयता विश्वभर ६५ लाख मानिसले ज्यान गुमाएको प्रतिवेदन सोमबार काठमाडौंमा पत्रकार सम्मेलन गरी आईएफआरसीले सार्वजनिक गरेको छ । तर, पछिल्लो विवरणअनुसार भने ६७ लाखभन्दा मानिसले कोभिड–१९ को प्रकोपबाट मृत्युवरण गरेका छन् ।

सर्वाधिक मानवीय क्षति गर्ने प्रकोपको रूपमा कोभिड–१९ देखा परेपछि अर्को विश्वव्यापी स्वास्थ्य आपतकालीनका लागि धेरै देशलाई कसरी तयारी गर्ने भन्नेबारे गहिरो रूपमा सोच्न प्रेरित गरेको पनि प्रतिवेदनमा उल्लेख छ ।

विश्वव्यापी महामारीको रूपमा कोभिड फैलिएपछि आईएफआरसीले गत तीन वर्षमा कम्तिमा एक अर्ब एक करोड मानिसलाई कोभिड भाइरसबाट सुरक्षित राख्न सहयोग गरेको महासचिव जगन चापागाईंले बताए । उनका अनुसार त्यसबेला भने थुप्रै चुनौतीहरूको सामना गर्नुपरेको थियो ।

‘त्यो समयमा एक विषय जो बारम्बार देखापर्‍यो । त्यो थियो- विश्वासको महत्व । जब मानिसहरूले सुरक्षा सन्देशहरूमा विश्वास गरे’, चापागाईंले प्रतिवेदनमा भनेका छन्, ‘तिनीहरू सार्वजनिक स्वास्थ्य उपायहरूको पालना गर्न इच्छुक थिए, जसले कहिलेकाहीँ रोगको फैलावटलाई ढिलो गर्न र जीवन बचाउन उनीहरूलाई आफ्ना प्रियजनहरूबाट अलग गर्थे ।’

रेडक्रस र रेड क्रिसेन्टले कोभिड– १९ को महामारी एकातिर बढ्दा अर्कातिर असमानता पनि सँगै बढेको पाइएको जनाएको छ । कोभिड–१९ को महामारी बढ्नुमा कम सरसफाइ, भीडभाड, स्वास्थ्य र सामाजिक सेवाहरूमा पहुँचको अभाव र कुपोषणलाई जिम्मेवार रहेको आईएफआरसीले ठहर गरेको छ ।

उसले विश्वले असमान स्वास्थ्य र सामाजिक–आर्थिक कमजोरीहरूलाई अर्को संकट आउनुअघि नै सम्बोधन गर्न सुझाएको छ । महासचिव चापागाईंले समुदायमा आधारित संस्थाहरू महामारीको तयारी र प्रतिक्रियाको अभिन्न अंग भएकोमा जोड दिएका छन् ।

स्थानीय कलाकार र समुदाय, अग्रपङ्क्तिमा खटिएकाहरूले महामारीको प्रकोप व्यवस्थापनको सबै चरणमा फरक तर समान रूपमा महत्वपूर्ण भूमिका हुने उनको भनाइ छ । महामारी नियन्त्रणका लागि स्थानीय ज्ञानलाई अझ बढी विश्वास, पहुँच र लचिलोपनका लागि प्रयोग गर्न आवश्यक रहेको पनि चापागाईंले औँल्याए ।

प्रकाशित मिति: मंगलबार, माघ २४, २०७९ २०:४५