संकटमा सुदूरपश्चिम सरकार, नागरिक उन्मुक्तिले विश्वासको मत नदिने

मुख्यमन्त्री राजेन्द्र रावल ।

A+ A A-

नागरिक उन्मुक्तिका पार्टीले सुदूरपश्चिम प्रदेशका मुख्यमन्त्री राजेन्द्र रावललाई विश्वासको मत नदिने भएको छ ।

मंगलबार डिल्लीबजारमा बसेको नागरिक उन्मुक्ति पार्टीको बैठकले सुदूरपश्चिम प्रदेश सरकारलाई विश्वासको मत नदिने निर्णय गरेको अध्यक्ष रञ्जिता श्रेष्ठ चौधरीले जानकारी दिइन् ।

नागरिक उन्मुक्ति पार्टीका संरक्षक रेशमलाल चौधरीको अग्रसरतामा डिल्लीबजार कारागारभित्र बसेको बैठकमा अध्यक्ष रञ्जिता श्रेष्ठ र सुदूरपश्चिम संसदीय दलका नेता रामेश्वर चौधरी सहभागी थिए ।

अध्यक्ष श्रेष्ठले राजबन्दी रिहा गर्नुपर्ने आफूहरूको माग पूरा नभएसम्म कसैलाई पनि विश्वासको मत नदिने बताइन् । विश्वासको मत नदिने निर्णयसँगै सुदूरपश्चिमका मुख्यमन्त्री रावलले विश्वासको मत नपाउने पक्का भएको छ ।

मुख्यमन्त्री रावलले भोलि (बुधबार) प्रदेशसभा बैठकमा विश्वासको मत लिँदैछन् । रावल पुस २६ मा मुख्यमन्त्रीमा नियुक्त भएका थिए । ५३ सदस्यीय सुदूरपश्चिम प्रदेशसभामा विश्वासको मतका लागि २७ सांसदको समर्थन आवश्यक पर्छ ।

नागरिक उन्मुक्तिले विश्वासको मत नदिँदा मुख्यमन्त्री रावल अल्पमतमा पर्ने निश्चित छ । सुदूरपश्चिम प्रदेशमा कांग्रेसका १९, माओवादी केन्द्रका ११, एमालेका १०, नागरिक उन्मुक्तिका ७, नेकपा एकीकृत समाजवादीका ४, राप्रपाका १ र स्वतन्त्र १ जना प्रदेशसभा सदस्य छन् ।

एमाले नेता रावल माओवादीका ११, एमालेका १०, नागरिक उन्मुक्तिका ७ र राप्रपाका १ गरी २९ जना सांसदको समर्थनमा मुख्यमन्त्री नियुक्त भएका थिए ।

प्रकाशित मिति: मंगलबार, माघ २४, २०७९ १४:३६