यसकारण रवि फेरि सरकारमा जान सक्छन्

तस्वीर : सुशील श्रेष्ठ

A+ A A-

सरकारमा सहभागी भएको ४२औँ दिनमा राष्ट्रिय स्वतन्त्र पार्टी (रास्वपा) ले आफ्ना मन्त्रीलाई आइतबार फिर्ता बोलायो । फिर्ता बोलाउनुको कारण बन्यो– गृह मन्त्रालय ।

मन्त्रीलाई फिर्ता बोलाए पनि सरकारलाई दिएको समर्थन भने रास्वपाले कायम राखेको छ । फेरि सरकारमा सहभागी हुने ढोका पनि खुला छोडेको छ ।

मन्त्रीहरूलाई फिर्ता बोलाउने केन्द्रीय कमिटी र संसदीय दलको निर्णयपछि पत्रकार सम्मेलनमा रविले फेरि सरकारमा सहभागी हुन सक्ने संकेत दिए । उनले भने, ‘सदाको लागि गरेको निर्णय होइन ।’

सहमतिअनुसार गृह मन्त्रालय पाए फेरि सरकारमा सहभागी हुने उनको सन्देश थियो । ‘शक्ति बाँडफाँटमा गठबन्धनमा सम्झौता गरेको विषय हो । त्यहीअनुसार पार्टीले पाउनुपर्छ भनेका थियौँ,’ उनले भने ।

नागरिकता मुद्दामा सर्वोच्च अदालतले १३ माघमा फैसला गरेपछि उनले सांसद पदसँगै गृह मन्त्रालय गुमाउन पुगका थिए । तर, निष्क्रिय भएको नागरिकतालाई सक्रिय बनाएर मन्त्री बन्न खोजे पनि प्रधानमन्त्री प्रचण्डले उनलाई गृहमन्त्रालय नदिने अडान लिए ।

राहदानीको विवाद र पूर्ण पाठ नआएसम्म रविलाई मन्त्री नबनाउने र रविबाहेक रास्वपाबाट अर्को व्यक्तिलाई पनि दिन नसकिने प्रधानमन्त्रीले अड्डी लिए ।

‘प्रधानमन्त्रीले तपाईं आफैँ हुँदा गृह मन्त्रालय ठीक थियो । अब हुँदैन भन्नुभयो । हामीले गृह मन्त्रालयबाटै धेरै डेलिभेरी दिन सक्थ्यौँ । त्यो नभएपछि हामी रहेनौँ,’ सभापति लामिछानेले भने, ‘मैले नपाएका कारण सरकार छोडेको होइन ।’

तर, आफूलाई थोरै लोभ भने भएको उनले स्वीकार गरे । ‘झिनो लोभ थियो । गृह मन्त्रालय नहुँदा डेलिभरमा समस्या हुन्छ भनेर हो,’ उनले भने । उनको अर्को बाटो उपनिर्वाचनबाट फेरि विजयी भएर सांसद हुँदै सरकारमा सहभागी हुने छ । ‘उपनिर्वाचनबाट निर्वाचित नभई कुनै पदमा जान्नँ,’ उनले भने ।

सरकारमा सहभागी हुने मत जनताबाट नपाएको भए पनि गृह, श्रम, शिक्षा र स्वास्थ्य राज्यमन्त्री पाएकाले आफूहरूको बाचाअनुसार काम गर्न सकिने देखेर सहभागी भएको उनले प्रस्ट्याए । ‘सरकारमा आउने म्यान्डेट थिएन । बाचापत्रअनुसार काम गर्न सकिने भएकाले हो,’ उनले भने ।

अनि सरकारबाट बाहिरिने निर्णय

सरकारमा रहने कि नरहने भन्नेमा रास्वपामा दुई धार थियो । सरकारमा जानुको र बाहिरिनुको औचित्य पुष्टि गर्नुपर्ने राय सदस्यहरूको थियो । मन्त्री बनेकाहरू पनि सरकारबाट बाहिरिन नहुने पक्षमा थिए । तर, रविबिना क्याबिनेटमा जाँदा असहज महसुस गरेको रास्वपाका मन्त्रीहरूले राख्न थाले । शनिबार राति ११ बजेसम्मको बैठकमा मन्त्रीहरूले सभापति लामिछाने नहुँदा क्याबिनेटमा गाह्रो भएको गुनासो राखेका थिए ।

‘सभापति रवि क्याबिनेटमा नहुँदा फरक दृष्टिले हेरिएको अनुभव मन्त्रीहरूले सुनाउनुभयो । सभापति रविज्यू पनि क्याबिनेटमा नभइ काम गर्न नसकिने भन्नुभयो,’ बैठकमा सहभागी एक सदस्यले भने, ‘सरकारमा सहभागी हुँदा सभापतिसहित हुने हो भनेर एक मतले बाहिरिने निर्णयमा पुगेका हौँ । कमान्डर नै नभएपछि जनताले अनुभूत गर्नेगरी काम गर्न सकिँदैन ।’

त्यसपछि शिक्षा, विज्ञान तथा प्रविधिमन्त्री शिशिर खनाल, श्रम, रोजगार तथा सामाजिक सुरक्षामन्त्री डोलप्रसाद अर्याल र स्वास्थ्य राज्यमन्त्री तोसिमा कार्की पनि सहमत भए । कार्यभार सम्हालेको १९ दिनमै उनीहरू सरकारबाट बाहिरिए । यद्यपि, रास्वपा सरकारमा भने गत ११ पसुमा सहभागी भएको थियो । सभापति लामिछानेको ‘कमान्ड’मा रास्वपा सरकारमा गएको थियो ।

पाँच वर्षपछि प्रधानमन्त्री

सरकारबाट मन्त्री फिर्ता बोलाउने निर्णय गरेपछि सभापति लामिछानेले ५ वर्षपछि प्रधानमन्त्री बन्ने गरी आउने उद्घोष गरे । ‘उपप्रधानमन्त्री, गृह मन्त्रालय होइन । आगामी निर्वाचनमा प्रधानमन्त्री बन्ने गरी आउने हो । कसैले खेदेर डराउँदिनँ । म केही गल्ती गरिहाल्छु कि भनेर जनतासँग मात्रै डराउँछु,’ उनले भने, ‘म जेल गए पनि रास्वपा अघि बढ्छ । म मरे वा बहुलाए पनि रास्वपा चल्छ ।'

प्रकाशित मिति: आइतबार, माघ २२, २०७९ २०:१२