नेपाल टी–२० लिग : पुरस्कारसहितको २ करोड ३३ लाख रकम दिन सेभेन थ्री स्पोर्ट्सकाे आनाकानी

नेपाल टी–२० लिग : पुरस्कारसहितको २ करोड ३३ लाख रकम दिन सेभेन थ्री स्पोर्ट्सकाे आनाकानी

A+ A A-

सेभेन थ्री स्पोर्ट्सले गत माघ १७ गते नेपाल क्रिकेट संघ (क्यान)सँगको सम्झौता एकतर्फी भंग गर्‍याे । योसँगै अर्को चिन्ताको विषय बनेको छ, सम्झौता तोडेको सेभेन थ्री स्पोर्ट्सले पुरस्कार र क्यानलाई दिनुपर्ने कुल २ करोड ३३ लाख २० हजार रुपैयाँ दिन्छ कि दिँदैन ?

सम्झौता एकतर्फी भंग गरेपछि अब पुरस्कारबापत दिनुपर्ने १ करोड २४ लाख ४० हजार रुपैयाँ भारतीय कम्पनी सेभेन थ्री स्पोर्ट्सले दिन्छ कि क्यानले ? विजेता टिम र खेलाडीहरू अन्यौलमा छन् । सम्झौताअनुसार पुरस्कारको रकम मात्रै होइन बर्सेनि सेभेन थ्री स्पोर्ट्स कम्पनीले क्यानलाई ठूलो रकम बुझाउनु पर्नेछ । जसमा क्यानले पहिलो वर्ष पाउनुपर्ने सबै रकम सेभेन थ्री स्पोर्ट्सबाट पाइसकेको छैन ।

नेपाल टी–२० लिग क्रिकेटमा भारतीय कम्पनीको दादागिरीका कारण स्पट फिक्सिङदेखि विभिन्न लफडाहरू उत्पन्न भयो । जुन नेपाली क्रिकेटको विकासभन्दा विनासतर्फ डोर्‍यायो । घरेलु संरचनाको बलियो आधार मानिएको फ्रेन्चाइज ‘नेपाल टी–२० लिग’ मा स्पट फिक्सिङ जस्तो जघन्य अपराध जोडिँदा यतिबेला नेपाल क्रिकेट दुर्गतितर्फ धकेलिएको छ । यसको मुख्य कारण सेभेन थ्री स्पोर्ट्स कम्पनी हो । आफ्नो प्रतियोगिता अरुलाई सुम्पिएर लाचारी बनी टुलुटुलु हेरिरहेको क्यान पनि मुख्य दोषी हो । नेपाल प्रहरीको केन्द्रीय अनुसन्धान ब्युरो (सीआईबी) ले अनुसन्धानबाट सेभेन थ्री स्पोर्ट्सको संलग्नता रहेको पुष्टि गरिसकेको छ । मेहबुब आलम र मोहम्मद आदिल आलमलाई स्पट फिक्सिङको काण्डमा पक्राउ गरी अनुसन्धान गरिरहेको छ ।

यही घटनाक्रमपछि सम्पर्कविहीन बनेको सेभेन थ्री स्पोर्ट्स कम्पनीले एकतर्फी आठ वर्षे सम्झौता तोड्दा धेरै प्रश्नहरू उब्जिएको छ । कारबाहीको भागिदारबाट बच्न सेभेन थ्री स्पोर्ट्सले सम्झौता भंग गरेको त होइन ? पुरस्कार दिनुपर्छ भनेर पन्छिन खोजेको हो ? अथवा सम्झौताअनुसार क्यानलाई दिनुपर्ने रकम नदिने मनसायले भाग्न खोजेको ?

क्यानका कोषाध्यक्ष रोशन सिंह भन्छन्, ‘सेभेन थ्री स्पोर्ट्सले एकलौटी तरिकाले सम्झौता तोडेको छ । अब क्यानले पनि कानुनी उपचार खोज्छ । भारतीय दूतावासबाट हुन्छ कि कहाँबाट हुन्छ, झिकाएर पैसा असुल्नु पर्छ यो मेरो बुझाई हो ।’

सेभेन थ्री स्पोर्ट्सले आफूखुसी नियमविपरीत सम्झौता तोडेको पनि कोषाध्यक्षले तर्क गरे । ‘जुन तरिकाले सेभेन थ्री स्पोर्ट्सले सम्झौता खारेज गरेको छ, त्यसको पनि विधि र विधान होला, प्रक्रिया होला, सम्झौतामा के छ त्यसको व्यवस्था त्यो होला नि । इमेलमा सम्झौता रद्द गर्दैमा हुन्छ र ? लिखित रूपमा आउनुपर्छ होइन र ?’, कोषाध्यक्ष सिंह भन्छन् ।

सेभेन थ्री स्पोर्ट्स पन्छिन खोज्दै

पहिलो संस्करणमै विवादै विवाद भएपछि सेभेन थ्री स्पोर्ट्सले हात झिकेको छ । तर उसले तिर्नुपर्ने रकम भने नदिई पन्छिन खोजेको प्रस्ट देखिन्छ । लुम्बिनी अल स्टार्सले नेपाल टी–२० लिगको उपाधि जित्दै ५५ लाख पुरस्कार पाउनुपर्ने हुन्छ । त्यस्तै उपविजेता बनेको विराटनगर सुपर किंग्सले ३० लाख, दोस्रो क्वालिफायर खेलेको (तेस्रो बनेको) जनकपुर रोयल्सले १० लाख र इलिमिनिटर खेलेको अर्थात चौथो बनेको काठमाडौं नाइट्सले ५ लाख नगद पाउनु पर्नेछ । यस्तै, प्रतियोगिताको सर्वोत्कृष्ट खेलाडी बनेको हुसेन तलातले ५ लाख, बेस्ट बलर बनेका अभिनाश बोहराले २ लाख, बेस्ट ब्याट्सम्यान बनेका हश्मातउल्लाह शाहिदीले २ लाख पाउनुपर्ने हुन्छ । लिगमा उदीयमान खेलाडी बनेका सूर्य तामाङले १ लाख ८० हजार पाउनुपर्ने हुन्छ ।

त्यस्तै, प्रतियोगितामा कुल ३४ खेल भएको छ । प्रत्येक खेलमा प्लेयर अफ द म्याच घोषित भएका खेलाडीले ४० हजारका दरले पाउने भनिएको थियो । ३४ खेलको प्लेयर अफ द म्याचको कुल रकम जोड्दा १३ लाख ६० हजार हुन आउँछ । लिगको पुरस्कारमा मात्रै सेभेन थ्री स्पोर्ट्सले १ करोड २४ लाख ४० हजार दिनुपर्ने हुन्छ । तर अहिलेसम्म पाएको छैन ।

क्यान भने पुरस्कारको सबै रकम सेभेन थ्री स्पोर्ट्सले दिनुपर्ने बताउँछ । क्यानका कोषाध्यक्षले अहिलेसम्म पुरस्कारका रकम कसैले नपाएको स्वीकार्दै भने, ‘सम्झौतामा नै उल्लेख भएको छ कि पुरस्कार सेभेन थ्री स्पोर्ट्सले नै दिने हो । विजेता टिमले पनि पुरस्कार रकम उसैसँग माग गरिरहेको छ ।’

यता, क्यान भने पुरस्कार राशि सेभेन थ्री स्पोर्ट्सले दिइहाल्छ नि भन्दै ढुक्क परेको छ । जबकि त्यही रकम दिनुपर्छ भनेर सेभेन थ्री स्पोर्ट्सले भने सम्झौता नै रद्द गरेको हो ।

क्यानले अझै १ करोड ९ लाख बढी पाउन बाँकी

सम्झौताअनुसार क्यानले नेपाल टी–२० लिग सुरु हुनुभन्दा अगाडि नै भ्याट काटेर ३ करोड ३० लाख पाउनुपर्ने थियो । तर किस्ता किस्ता गरेर अहिलेसम्म क्यानले सेभेन थ्री स्पोर्ट्सबाट २ करोड २० लाख ५१ हजार पाइसकेको छ ।

क्यानले अझै १ करोडबढी रकम पाउन बाँकी नै छ । यो रकम पनि क्यान पाउने निश्चित छैन । भारतीय कम्पनी सेभेन थ्री स्पोर्ट्सको मुख्य उद्देश्य बाँकी कुनै रकम नदिने र उल्टै क्यानविरुद्ध पैसा असुल्ने तयारीमा छ । स्रोतका अनुसार बदनामी गरेको र प्रतियोगितामा घाटा भएको भन्दै क्यानविरुद्ध पैसा असुल्न कानुनी परामर्श गर्ने प्रक्रियामा सेभेन थ्री स्पोर्ट्स रहेको छ । यता, क्यानका कोषाध्यक्ष सिंह भने सेभेन थ्री स्पोर्ट्सबाट जसरी भए पनि पैसा असुल्ने दाबी गर्छन् । उनले भने, ‘क्यानले अझै भ्याट काटेर १ करोड ९ लाख ४९ हजार पाउनु पर्नेछ । त्यो हामी उठाउँछौँ ।’

क्यानले भारतीय कम्पनीलाई सर्वाधिकारसहित नेपाल टी–२० लिग बेच्नु नै सबैभन्दा ठूलो भुल भयो । क्यानले २०७७ सालमा भारतीय कम्पनी सेभेन थ्री स्पोट्र्सलाई १० वर्षका लागि ४२ करोड पाउने गरी नेपाल टी–२० लिग बेच्यो ।

सेभेन थ्री स्पोट्र्सलाई बारम्बार ताकेता गर्दा पनि काम नगरेको हुँदा सम्झौता खारेज गर्ने क्यानको २०७८ असोज २१ गते बसेको बोर्ड बैठकले निर्णय गर्‍याे । सम्झौता रद्द गर्ने एजेन्डा क्यानको बोर्ड बैठकमा सर्वसम्मतले पारित भएको थियो । आवश्यक परे कानुनी परामर्श गर्ने गरी सर्वसम्मतले निर्णय गरेको थियो । यो निर्णय क्यानले सेभेन थ्री स्पोट्र्सलाई पठायो । तर, प्रत्युत्तरमा क्यानलाई सेभेन थ्री स्पोट्र्सले धम्कीपूर्ण पत्र पठाएको थियो ।

त्यो पत्रमा सेभेन थ्री स्पोट्र्सले लेखेको थियो, ‘हामीले यो विषयलाई नेपाल तथा भारतका सम्मानित अदालतहरूमा, नेपालका सम्मानीय प्रधानमन्त्री तथा मन्त्रिपरिषद्को कार्यालयसम्म, नेपालस्थित भारतीय राजदूतावास वा आईसीसीमा अनौपचारिक कानुनी उजुरीका रूपमा दर्ता गराउन सक्ने थियौँ’, पत्रमा अगाडि थपेको थियो, ‘सोको सट्टा हामी तपाईंसँग सम्पर्क गर्ने र तपाईंहरू र क्यान प्रतिनिधिप्रति हाम्रो पूर्ण विश्वास राखिराख्ने गर्‍याैँ । हामी कानुनी प्रक्रियामा गएमा वा हामीले आईसीसीमा उजुरी गरेमा क्यानले गम्भीर परिणामहरू भोग्नुपर्ने हुन सक्छ ।’

धम्कीपूर्ण पत्रपछि २०७८ फागुन १३ गते धनगढीमा क्यानको साधारणसभाले यसअघि सम्झौता खारेज गर्ने निर्णयलाई उल्ट्याउँदै सेभेन थ्री स्पोट्र्ससँगको सम्झौतालाई निरन्तरता दिने निर्णय गर्‍याे ।

यसरी यसअघि नै सम्झौता रद्द गर्ने क्यानको सर्वसम्मतिको निर्णयलाई धम्कीपूर्ण भाषामा बोलेको सेभेन थ्री स्पोर्ट्स पहिलो संस्करणबाटै किन बाहिरिन पुग्यो ? यसपछिका कारण स्पट फिक्सिङ, आफूमाथि हुनसक्ने कारबाही र आफूले तिर्नुपर्ने रकम नदिने मनसाय नै मुख्य हो ।

प्रकाशित मिति: सोमबार, माघ २३, २०७९ ११:०६