सरकारी प्रतिवेदन भन्छ– धुर्मुस–सुन्तली फाउन्डेसनले निर्माण गरेको रंगशालाको भौतिक प्रगति ६३ करोडबराबर

सरकारी प्रतिवेदन भन्छ– धुर्मुस–सुन्तली फाउन्डेसनले निर्माण गरेको रंगशालाको भौतिक प्रगति ६३ करोडबराबर

A+ A A-

कलाकार सीताराम कट्टेल दम्पती (धुर्मुस–सुन्तली फाउन्डेसन)ले बनाउन सुरु गरको भरतपुर– १५ स्थित निर्माणाधीन गौतमबुद्ध अन्तर्राष्ट्रिय क्रिकेट रंगशाला फेरि चर्चामा छ । करिब दुई वर्षदेखि निर्माण प्रक्रिया रोकिएको रंगशालाबारे बाँकी काम भरतपुर महानगरपालिकाले बनाउने जिम्मा लिने गरी प्रक्रिया अघि बढेपछि चर्चामा आएको हो ।

धुर्मुस–सुन्तली फाउन्डेसन र भरतपुर महानगरपालिकाबीच सहमति भएपछि १६ माघ २०७५ मा त्रिभुवन विश्वविद्यालयको नाममा रहेको र कृषि तथा वन विज्ञान विश्वविद्यालयले भोगचलन गर्दै आएको २० बिघा ६ कट्ठा जग्गामा अन्तर्राष्ट्रिय क्रिकेट रंगशाला निर्माण थालेका थिए ।

त्रिभुवन विश्वविद्यालयको नाममा रहेको जग्गा र कृषि तथा वन विज्ञान विश्वविद्यालयको नाममा रहेको जग्गाबारे महानगरले नै त्रिपक्षीय सम्झौता गरेपछि निर्माणको जिम्मा धुर्मुस–सुन्तली फाउन्डेसनले पाएको थियो ।

रंगशाला निर्माणका लागि करिब ३ अर्ब रुपैयाँ खर्च लाग्ने अनुमान महानगर र धुर्मुस–सुन्तली फाउन्डेसनको थियो । निर्माण सुरु गरेको विशेष परिस्थितिबाहेक २ वर्षभित्र रंगशाला निर्माण सम्पन्न गर्ने लक्ष्य फाउन्डेसनको थियो ।

तर, निर्माण प्रक्रिया भने आधा नसकिँदै रोकियो । कोरोना भाइरसको महामारी सुरु भएपछि उत्पन्न आर्थिक अभावका कारण निर्माण प्रक्रिया रोक्नुपरेको फाउन्डेसनको दाबी छ ।

उसो त फाउन्डेसनलाई आर्थिक अभाव हुन थालेपछि रकम जुटाउन १९ माघ २०७७ मा भरतपुर महानगरपालिकाकै अग्रसरतामा रंगशाला परिसरमा नै महायज्ञसमेत गरियो ।

तर, महायज्ञमा कबोल गरिएकाहरूले समेत रकम नदिँदा फाउन्डेसनलाई तिर्नुपर्ने वक्यौता बढेपछि धुर्मुस–सुन्तली फाउन्डेसनले रंगशालाको निर्माण रोक्नुपरेको धुर्मुसले बताउँदै आएका छन् ।

विभिन्न संघसस्थाबाहेक भरतपुर महानगरपालिकाले फाउन्डेसनलाई उपलब्ध गराउने भनिएको १६ करोड रुपैयाँमध्ये आधी मात्रै उपलब्ध गराएको छ । कुल ३० हजार दर्शक क्षमताको रंगशालाको करिब ४० प्रतिशत काम सकिएपछि भने निर्माण प्रक्रिया लथालिङ्ग बनेको छ ।

किन सुरु हुन सकेन निर्माण प्रक्रिया ?

रंगशालाको करिब ४० प्रतिशत निर्माण प्रक्रिया सकिएको र करोडौँ लगानी भइसकेको रंगशाला निर्माण सुरु नहुनुको मुख्य कारण निर्माणका क्रममा विभिन्न निर्माण कम्पनीलाई तिर्नुपर्ने वक्यौता रकम कसले तिर्ने भन्ने जुँगाको लडाइँ हो ।

भरतपुर महानगरपालिकाले गरेको अडिटअनुसार विभिन्न संघ–संस्था र निर्माण सामग्री ल्याएबापत तिर्नुपर्ने रकम १८ करोड ४३ लाख छ । रंगशाला निर्माण गर्दा तिर्नुपर्ने उक्त रकम भरतपुर महानगर वा धुर्मुस कसले तिर्ने भन्ने विवादको टुंगो नलाग्दा २२ साउन २०७८ मा रोकिएको रंगशाला निर्माण कार्य पुनः सुरु हुन सकेको छैन ।

तर, फाउन्डेसन र भरतपुर महानगरपालिकाबीच भएको सहमतिपत्रको बुँदा नम्बर ६ मा फाउन्डेसनले नेपाल सरकार तथा देश–विदेशमा रहेका व्यक्ति, संघ–संस्था र निकायसँग आह्वान गरी नगद र जिन्सी सहयोग लिन सक्नेछ भनिएको छ ।

यसरी जुटाइने सहयोग अपुग भए आपसी सहमतिमा स्रोत जुटाई निर्माण कार्य सम्पन्न गर्नु दुवै पक्षको दायित्व हुने उल्लेख छ । सोही सहमतिअनुसार फाउन्डेसनका अध्यक्ष कट्टेलले रकम जुटाउन नसकेर स्वामित्व लिइदिन महानगरलाई २ पुस २०७८ मै पत्र लेखेका थिए ।

उक्त पत्रमा फाउन्डेसनले रंगशाला निर्माण प्रक्रियामा कुनै दाबी नगर्नेसमेत कट्टेलले उल्लेख गरेका थिए ।

६३ करोडबराबरको भौतिक स‌ंरचना निर्माण

गौतमबुद्ध अन्तर्राष्ट्रिय क्रिकेट रंगशालाको भौतिक प्रगति मूल्याङ्कन समितिले रंगशालाको निर्माण प्रगति ६३ करोड २२ लाख रुपैयाँबराबरको भएको प्रतिवेदन पेस गरेको छ ।

सघन शहरी तथा निर्माण आयोजना चितवनले गरेको प्राविधिक प्रतिवेदनले १३ माघ २०७८ मा भरतपुर महानगरपालिकालाई बुझाएको थियो । उक्त प्रतिवेदनमा रंगशालाको मैदानको दुबो, कालोमाटो र हाल स्टक रहेको सामग्रीबाहेक नै ६३ करोड २२ लाख रुपैयाको भौतिक संरचना तयार भएको प्रतिवेदन पेस गरेको हो ।

फाउन्डेसनका अनुसार हाल २ करोडबराबरको भौतिक सामग्री अझै रंगशालाभित्र 'स्टक' छ । अचम्मको कुरा त के छ भने रंगशाला बनाउन भएको खर्चको हिसाब सार्वजनिक नगरेको भनेर धुर्मुस–सुन्तलीको आलोचना भइरहँदा रंगशालाको वित्तीय प्रतिवेदनअनुसार फाउन्डेसनले कुल ५७ करोड ९२ लाख ८५ रुपैयाँ खर्च भएको उल्लेख गरेको छ ।

तर, महानगरकै सरकारी प्रतिवेदनले भने रंगशालाको भौतिक प्रगति ६३ करोड २२ लाखबराबरको भएको प्रतिवेदन पेस गरेको छ । रंगशाला निर्माणका क्रममा फाउन्डेसनको आम्दानी ३९ करोड ८० लाख ३८ हजार ५८८ रुपैयाँ रहेको उल्लेख छ ।

प्रकाशित मिति: शुक्रबार, माघ २०, २०७९ १३:१४