नियुक्तिबिनै प्रशिक्षक मोन्टीले किन गराए प्रशिक्षण ?

A+ A A-

आईसीसी क्रिकेट विश्वकप लिग-टु अन्तर्गत नेपालमा हुने त्रिदेशीय सिरिज फागुन २ देखि ९ गतेसम्म हुँदैछ । करिब आधा महिनाअघि मात्रै नेपाली राष्ट्रिय क्रिकेट टिमले मुख्य प्रशिक्षक पाएको छ । तर, प्रशिक्षक मोन्टी देसाईले अझै नियुक्ति पाएका छैनन् ।

नेपालसँगै स्कटल्यान्ड र नामिबियाबीचको त्रिदेशीय सिरिज त्रिवि क्रिकेट मैदानमा हुने दिन नजिकिँदा नेपालले कस्तो प्रदर्शन गर्ला ? सबै चिन्तित बनेका छन् । यसपछिका दुई ‘फ्याक्टर’ महत्त्वपूर्ण छन् । नेपाल टी-२० लिगमा भएको ‘स्पट फिक्सिङ काण्ड’ र अर्को सिरिज सुरु हुन करिब १५ दिनअघि मात्रै मुख्य प्रशिक्षक पाउनु ।

यतिबेला खेलाडीको मनोबल घटेको छ । तर, आईसीसी क्रिकेट विश्वकप लिग-टु नेपालले जित धेरै निकाल्नुपर्ने अवस्था छ । लथालिङ्ग घरेलु संरचना, ध्वस्त नेपाल टी-२० लिग र भद्रगोल क्यानबीच नेपाली टिमले प्राय सबै खेल जित्नुपर्ने अवस्था छ । आईसीसी क्रिकेट विश्वकप लिग-टुको शीर्ष स्थानमा रहेको स्कटल्यान्ड र तेस्रो स्थानमा रहेको नामिबियाविरुद्ध नेपालले जित्नैपर्ने दबाब छ ।

तर, विगतमा भएका क्यानको गल्ती नै नेपाली क्रिकेटको जितमा मुख्य बाधक बन्न सक्छ । अवस्था त्यस्तै छ । क्यानमाथि नै अनुसन्धान भइरहेको छ । निलम्बनको सुझाव आइसकेको छ । स्पट फिक्सिङमा खेलाडी पक्राउ परिसकेका छन् । यसबारे अनुसन्धान सीआईबीले गरिरहेको छ । यस्तो जटिल अवस्थामा टिममा रहेका नेपाली खेलाडीले कस्तो प्रदर्शन गर्लान् ? खेलाडीको मनोबल कस्तो छ ?

प्रशिक्षक पायो, प्रक्रियामै त्रुटि ?

मुख्य प्रशिक्षकका लागि नेपाल आएका मोन्टी देसाईले माघ १५ गतेदेखि नै प्रशिक्षण गराएका छन् । तर, उनले नियुक्ति भने पाइसकेका छैनन् । नियुक्तिबिनै मुख्य प्रशिक्षक बन्न आएका मोन्टी देसाईले नेपाली टिमलाई प्रशिक्षण दिएका छन् । कार्यवाहक सचिव प्रशान्त विक्रम मल्लले क्यानकै अनुरोधमा नियुक्तिअघि नै मुख्य प्रशिक्षक देसाईले प्रशिक्षण गराएको बताए । उनले भने, ‘नियुक्तिको प्रक्रिया राष्ट्रिय खेलकुद परिषद् (राखेप) मा पुगेको छ । भइहाल्छ ।’

यता, क्यानकै सदस्यहरूले भने प्रशिक्षक नियुक्तिमा पनि त्रुटि रहेको दाबी गर्छन् । क्यानका सदस्य छुम्बी लामाले छनोट समितिले क्यान बोर्डमा प्रशिक्षकको सर्ट लिस्ट बनाएर नपठाई आफैँले निर्णय गरेर सरकारलाई पठाएको दाबी गरेका छन् । ‘क्यानले प्रशिक्षक नियुक्तिका विषयमा फेरि पनि त्रुटि गरेको छ । यतिका ठूलो विवाद हुँदाहुँदै पनि क्यान नेतृत्वले गैरजिम्मेवारी ढंगबाट काम गरेको भान भइरहेकै छ’, लामा थप्छन्, ‘छनोट समितिले सर्ट लिस्ट गरेर बोर्डलाई पठाउनुपर्छ । त्यसपछि बोर्डले एक जनालाई फाइनल गरेर नेपाल सरकारलाई स्वीकृतिका लागि पठाउने हो । तर, यहाँचाहिँ ठीक उल्टो गर्‍यो, त्यो नै गलत छ ।’

प्रतिउत्तरमा क्यानका कार्यवाहक सचिव मल्लले सबै प्रक्रिया पूरा गरेर प्रशिक्षक नियुक्त गर्न राखेपमा पठाएको दाबी गर्दै आएका छन् । ‘कार्यसम्पादन समितिले एउटा छनोट समिति बनाएर त्यो समितिले प्रक्रियाअनुसार नै गरेको छ । प्रशिक्षकको आह्वानदेखि सर्ट लिस्ट बनाएर, अन्तर्वार्ता गराएर प्रशिक्षक छानेको हो’, कार्यवाहक सचिव मल्लले भने ।

क्यानको बोर्ड बैठक १७ गते मंगलबार (भोलि) हुँदैछ । यही बोर्ड बैठकमा प्रशिक्षक नियुक्तिको एजेण्डा पनि हुनेछ ।

क्यानले प्रशिक्षक ल्याउन नै धेरै ढिलो गरेको छ । करिब १५-१६ दिनको अभ्यासले नेपाली टिमले आईसीसी क्रिकेट विश्वकप लिग-टु अन्तर्गत नेपालमा हुने त्रिदेशीय सिरिज खेल्नुपर्नेछ ।

गर या मरको अवस्था

आईसीसी क्रिकेट विश्वकप लिग-टु प्रतियोगितामा नेपाल गर या मरको अवस्थामा छ । अहिले नेपाल छैटौँ स्थानमा छ । नेपालले कूल ३६ खेलमध्ये अब १२ खेल खेल्न बाँकी छ भने २४ खेल खेलिसकेको छ । जसमध्ये आठ खेलमा मात्रै जित निकाल्दा नेपालले १४ खेलमा हार ब्यहोरेको छ । एक खेल भने बराबरीमा टुंगिँदै अंक बाँड्दा अर्को एक खेल वर्षाका कारण खेल स्थगित हुँदै अंक बाँडेको छ । २४ खेलबाट १८ अंक मात्रै बनाएको नेपाललाई अबको यात्रा सजिलो छैन ।

नेपालले आईसीसी क्रिकेट विश्वकप लिग-टु अन्तर्गत यो नामिबिया र स्कटल्यान्डविरुद्धको सिरिजपछि दुईवटा त्रिदेशीय सिरिज खेल्नेछ । जसमा नेपालले यूएई र पपुवा न्युगिनीसँग आउँदो फेब्रुअरीमा खेल्नेछ । त्यसपछि नेपालले अन्तिम सिरिज यूएई र पुपुवा न्युगिनीसँग नै २०२३ को मार्चमा खेल्नेछ ।

लिग-टु का शीर्ष तीनले २०२३ मै हुने विश्वकपको छनोटमा स्थान बनाउनेछन् । विश्वकप छनोटमा सिधै पुग्ने नेपालको सम्भावना कस्तो छ त ? एक पटक अंक गणितमा हेरौँ । लिग टु-को शीर्ष स्थानमा स्कटल्यान्ड रहेको छ । स्कटल्यान्डको ३२ खेलबाट ४६ अंक छ । स्कटल्यान्डले अझै चार खेल खेल्न बाँकी छ । जुन नेपाल र नामिबियासँगको सिरिजपछि सकिँदैछ । यता, दोस्रो स्थानमा ओमान छ । ओमानले आफ्नो सबै ३६ खेलबाट ४४ अंक बनाइसकेको छ ।

तेस्रो स्थानमा रहेको नामिबियाले अझै ६ खेल खेल्न बाँकी छ । चौथो स्थानमा रहेको अमेरिकाले कुल ३६ खेलबाट ३५ अंक बनाएको छ । यूएईको पनि शीर्ष तीनमा पर्ने सम्भावना धेरै छ । पाँचौँ स्थानमा रहेको यूएईले २६ खेलबाट २६ अंक बनाएको छ ।

अब नेपालले बाँकी सबै खेल जिते कुल ४२ अंक हुनेछ । ४२ अंक बनाउँदैमा नेपाल शीर्ष तीनमा पर्छ भन्ने निश्चित छैन । किनभने नामिबिया र यूएईको अहिलेको अवस्था नेपालको भन्दा धेरै राम्रो छ । नेपालले आफ्नो सबै खेल जितेर मात्रै पुग्दैन नामिबिया र यूएईको खेलमा पनि भर पर्नुपर्ने अवस्था आएको छ । १२ खेलमा १२ नै खेल नेपालले जित्छ भन्ने पनि छैन । पछिल्लो समयमा नेपालको प्रदर्शन निकै खराब हुँदै गएको छ ।

प्रकाशित मिति: सोमबार, माघ १६, २०७९ १७:२६