जब मीनालाई डाक्टरले भने– टाउकाेकाे शल्यक्रिया गर्न पेटकाे बच्चा फाल्नुपर्छ

जब मीनालाई डाक्टरले भने– टाउकाेकाे शल्यक्रिया गर्न पेटकाे बच्चा फाल्नुपर्छ

A+ A A-

महिलालाई पुरुषले मात्रै हिंसा गर्छन् भन्ने छैन, तर पनि अधिकांश महिलाले कुनै न कुनै रूपमा पुरुषबाट हिंसा सहेकै हुन्छन् । सहनशील भएकैले होला घरभित्रकै भयानक हिंसाका घटनाहरू पनि महिलाले सहेर बसेका हुन्छन् । घर परिवारको इज्जतलाई ठूलो ठान्दै महिलाले आफूमाथि भइरहेको हिंसाका घटना लुकाउने गरेका छन् ।

हिंसा सहने बानीले आफ्नै ज्यान जान सक्छ भनेर सोचेका पनि हुँदैनन् उनीहरूले । महिलालाई श्रीमान् मात्रै नभई परिवारका अन्य व्यक्तिबाट पनि हिंसा भएको हुन्छ वा हुन सक्छ ।

श्रीमान्‌बाट राम्रै माया र सहयोग पाएकी कैलालीको जोशीपुर–७ की ४१ वर्षीया मीना चौधरीले ससुराबाट भने हिंसा सहनुपर्‍यो । घरको आर्थिक अवस्था कमजोर भएका कारण सानै उमेरमा जगनारायण चौधरीसँग विवाह गरेकी मीनाले आफ्ना श्रीमान्‌बाट राम्रै साथ सहयोग पाएकी थिइन् । घरमा हुँदा दैनिक ज्याला मजदुरी गरेर मीनाका श्रीमान्‌ले घर खर्च जुटाइरहेका थिए । उनी कामको सिलसिलामा बढी समय भारतमै बिताउँथे । तर श्रीमान्‌ घर आएकै बेला उनले आफ्नो ससुराबाट यातना पाइन् ।

श्रीमान् काम विशेषले अर्को गाउँ गएका थिए । सासु साँझ प्रौढ शिक्षा पढ्न गएकी थिइन् । उनकी छोरीहरू साँझ खाना खाँदै थिए । मदिराले मातिएका ससुरा सोही बेला मासु काट्ने दाउ (धारिलो हतियार) लिएर ढोकामै आए । उनले भाग्ने ठाउँ नै पाइनन् । दैलोमै उभिएका उमेरले ६० कटेका ससुराले मरणासन्न हुने गरी घाइते बनाए । ससुराले उनको कपाल समात्दै बाहिर ल्याएर टाउकोमा हतियार प्रहार गरे । उनले होस् गुमाइन् ।

‘पहिलोपटक हतियार प्रहार गरेको मात्रै याद छ,’ उनले भनिन्, ‘म बेहोस भएँ त्यसपछि पनि तीनपटक प्रहार गरिएको रहेछ । मलाई केही याद छैन ।’ हतियारले उनको कान काटिएको थियो ।

मीना ससुराबाट निर्घात कुटिएको देखेपछि उनकी छोरीहरूले चिच्याएर छिमेकीलाई बोलाए र तत्कालै उद्धार गरी अस्पताल पुर्‍याए । ससुरालाई प्रहरीको जिम्मा लगाइयो । बेहोस् मीनालाई छिमेकीले एम्बुलेन्समार्फत उपचारका लागि धनगढी लगे । उनको त्यहाँ उपचार सम्भव हुन सकेन । त्यहाँबाट उनलाई कोहलपुर रिफर गरियो । टाउकोको अप्रेसन गर्नुपर्ने भयो ।

त्यतिबेला उनको पेटमा तीन महिनाको बच्चा हुर्किँदै थियाे । जसले गर्दा अप्रेसन गर्न कठिन हुने देखियो । डाक्टरले बच्चालाई फालेपछि मात्रै अप्रेशन गर्न सक्ने बताए । तर आमाको मन, उनले मानिनन् । आफ्नो कोखमा हुर्किँदै गरेको बच्चालाई पनि बचाइदिन आग्रह गरिन् । काेहलपुरमा सम्भव नभएपछि उनलाई काठमाडौं रिफर गरियो । ‘मैले डाक्टरलाई बच्चा बचाइदिन आग्रह गरेपछि डाक्टरको सल्लाहमा काठमाडौं लगियो,’ उनी भन्छिन्, ‘काठमाडौंको टिचिङ हस्पिटलमा बसेर अप्रेशन भयो । म पनि बाँचे बच्चालाई पनि बचाउन सकेँ । बाँच्ने आशा मारिसकेकी थिएँ । अर्को जुनी पाएँ ।’

उनी निको भएर घर फर्किइन् । जीवनको उत्तरार्द्धमा प्रहरी खाेरमा पुगेका ससुरालाई उनी आफैँले छुटाइन् । सुध्रिएलान् भन्ने आशामा नै ससुरालाई छुटाएकाे उनले बताइन् । सासू–ससुरा र उनी अहिले अलग–अलग बस्न थालेका छन् । ९ वर्षअघिकाे याे घटनाले मीनालाई अहिले पनि तर्साइरहन्छ ।

प्रकाशित मिति: सोमबार, माघ १६, २०७९ १०:१७