उपसभामुख त्यागेकी भारती पाठकः २४ घण्टाभित्र मन्त्री बन्नेको सूचीबाट काटियो नाम

उपसभामुख त्यागेकी भारती पाठकः २४ घण्टाभित्र मन्त्री बन्नेको सूचीबाट काटियो नाम

A+ A A-

बागमती प्रदेश सरकार गठन भएको १६ दिनपछि ११ माघमा मन्त्रिपरिषद्ले पूर्णता पाउँदा एक जना मात्र महिला मन्त्री बनिन् ।

नेकपा एमाले र नेकपा माओवादी केन्द्र नेतृत्वको गठबन्धन सरकारमा ११ जना मन्त्री छन् । जसमध्ये एक जना मात्रै महिला मन्त्री बनिन् । नेकपा माओवादी केन्द्रबाट सामाजिक विकास मन्त्रीमा कुमारी मोक्तान अटाउँदा एमालेकै एक सशक्त महिला नेतृ भने सरकारमा अटाउन सकिनन् । उनी हुन्, नेकपा एमाले केन्द्रीय सदस्य भारती पाठक । एमालेबाट समानुपाकित सांसद बनेकी पाठकको मन्त्री लगभग पक्का थियो ।

१० माघ ६ बजेसम्म पाठक मन्त्री बन्ने निश्चित भएको थियो । तर, रातभरमा उनको नाम काटिएको विषयले यतिबेला एमालेभित्र चर्चा चुलिएको छ । सामुदायिक वन महासंघको केन्द्रीय अध्यक्षसमेत रहेकी पाठकलाई प्रदेशको वन तथा वातावरण मन्त्रालयको जिम्मेवारी दिन बागमतीका मुख्यमन्त्री शालिकराम जम्मकट्टेल सहमत थिए ।

मन्त्री नियुक्त भएको ११ माघको अघिल्लो दिन अर्थात २४ घण्टा अगाडिसम्म मन्त्री हुने पक्का भएर घर पुगेकी पाठकको नाम एकाएक काटिएको थियो । ‘उहाँ वन तथा वातावरण मन्त्री बन्ने कुरा थियो । पछि मसँग फोनमा कुरा हुँदा म मन्त्री नहुने भएँ भनेर भन्नु भयो’, एमालेकै एक नेताले सुनाए, ‘उहाँ के कारणले मन्त्री हुन सक्नु भएन त्यो चाहीँ थाहा भएन ।’

मुख्यमन्त्री जम्मकट्टेलले प्रदेशको वन तथा वातावरण मन्त्रीमा राप्रपाका राजु विष्टलाई नियुक्त गरेका छन् । मन्त्रालयको भागवण्डा टुंगो लगाउन १० माघको साँझ हेटौँडामा जम्मकट्टेलसहित एमाले बागमती प्रदेश संसदीय दलका नेतासमेत रहेका आर्थिक मामिला तथा योजना मन्त्री जगन्नाथ थपलिया, बागमतीका पूर्वमुख्यमन्त्री डोरमणि पौडेललगायतका नेताहरूको बैठक बसेको थियो । उक्त बैठकले एमाले र माओवादीले ४ र राप्रपाले ३ वटा मन्त्रालय लिने सहमति भएको थियो ।

पाठक तत्कालीन एमालेभित्र माधव नेपाल समूहमा थिइन् । तर, चितवन महाधिवेशनपछि भने पाठक एमाले अध्यक्ष केपी शर्मा ओली निकटका नेताहरु नजिक थिइन् । पाठकलाई एमालेले बागमती प्रदेशको उपसभामुख बन्न भनेको थियो । तर, पाठकले उपसभामुख पद त्यागेर वन तथा वातावरण मन्त्रालय रोजेकी थिइन् । एमालेले उपसभामुखमा अप्सरा चापागाईंलाई उठाएको थियो । चापागाईं उपसभामुख निर्वाचनमा सहभागी १ सय ८ सांसदमध्येबाट ६१ मत ल्याउँदै निर्वाचित भइन् ।

वन तथा वातावरण मन्त्री हुन पार्टीमा लबिङ गरेकी पाठकसँग भने न उपसभामुख पद रह्यो न मन्त्री नै । सरकार विस्तार हुनुअघि पाठकले प्रदेशका एक उच्च पदस्थ व्यक्तिसँगको भेटमा आफूले वन तथा वातावरण मन्त्रालय हुन खोजेको बताएकी थिइन् । दोलखाकी एमाले सांसद उर्मीला सुनारलाई लिएर प्रदेशका उच्च पदस्थ व्यक्ति भेट्न पुगेकी पाठकले आफू वन तथा वातावरण मन्त्री हुन खोजेको बताउँदा उनलाई ती व्यक्तिले शुभकामनासमेत दिएको स्रोतले जानकारी दियो ।

शिलापत्रसँग कुरा गर्दै पाठकले आफू वन तथा वातावरण मन्त्री हुन खोजेको विषयमा सत्यता रहेको बताइन् । ‘मन्त्री हुनेमा मेरो नाम पनि थियो । ६ बजेसम्म त म नै मन्त्री हुने कुरा थियो । पछि के भयो थाहा छैन्,’ पाठकले भनिन् । भागवण्डामा ४ जना मन्त्री पाउँदा एक जना महिलालाई मन्त्री बनाउनुपर्छ भन्ने आवाज उठाएको उनको भनाइ छ । तर, एमालेले चार जना नै पुरुष मन्त्री सरकारमा पठाएको हो । बागमतीमा एमालेबाट जगन्नाथ थपलिया, केशव प्रसाद पोख्रेल, रामेश्वर श्रेष्ठ र एकालाल श्रेष्ठ मन्त्री छन् ।

श्रम, रोजगार तथा यातायात मन्त्री श्रेष्ठ एमाले मकवानपुरका अध्यक्षसमेत हुन् । पूर्वमुख्यमन्त्री डोरमणि पौडेल निकटका श्रेष्ठले प्रदेशसभा प्रवेशको पहिलो पटकमै मन्त्री हुने अवसर पाएका छन् । एउटै जिल्लाबाट दुई जना मन्त्री बनाउने विषय विवादमा हुने भएकाले पाठकको मन्त्री पद खोसिएको एमालेभित्र चर्चा छ । पाठकले आफू उपसभामुख बन्ने विषयमा पार्टीलाई नै निर्णय गर्न भनेको जानकारी दिइन् । ‘मलाई उपसभामुख बनाउने कि नबनाउने भन्ने विषयमा निर्णय गर्न पार्टीलाई भनेको थिएँ । मैले त्यागेको पनि हैन,’ उनले भनिन् ।

मन्त्री नभएपछि पाठक हेटौँडा–१०, स्थित प्रदेश प्रमुख कार्यालयमा ११ माघमै भएको नवनियुक्त मन्त्रीहरुको शपथ ग्रहण कार्यक्रमा पनि सहभागी थिइनन् । यता मन्त्रीहरुले शपथ लिँदा उनी १० नम्बर वडामै भएको आद्योगिक व्यापार मेलामा सम्बोधन गरिरहेकी थिइन् । शपथ ग्रहण कार्यक्रम बारे आफूलाई कुनै खबर नभएको उनले बताएकी छन् । ‘मलाई शपथ ग्रहणको विषयमा खबर नै थिएन । थाहै नपाईं कसरी जानू,’ उनको दाबी छ ।

१३ माघ शुक्रबार एमाले जिल्ला पार्टी कार्यालयमा नवनियुक्त मन्त्रीहरुलाई बधाई तथा स्वागत कार्यक्रममा समेत पाठक सहभागी थिइनन् । यस कार्यक्रमको बारेमा आफूलाई ढिला खबर भएको बताइन् । ‘बधाई कार्यक्रम हुँदा म कान्तिलोकपथबाट काठमाडौं गइरहेको थिएँ । बागमती खोला कटिसकेपछि फर्किन सम्भवन भएन,’ पाठकले सुनाइन् ।

प्रकाशित मिति: शनिबार, माघ १४, २०७९ १९:२६