बागमतीमा एमाले र माओवादीका ६ जनालाई कुन मन्त्रालयको जिम्मेवारी ?

A+ A A-

बागमती प्रदेशमा आज सरकार विस्तार हुँदैछ । मुख्यमन्त्री शालिकराम जम्मकट्टेलको निवासमा बिहान बसेको बैठकले मन्त्रालय भागवण्डा र मन्त्रीहरूको नाम टुंगो लगाएको छ । भागवण्डाअनुसार नेकपा एमाले र नेकपा माओवादी केन्द्रले चार–चारवटा मन्त्रालय पाएका छन् । सरकार गठनमा निर्णायक रहेको दल राष्ट्रिय प्रजातन्त्र पार्टी (राप्रपा)ले तीनवटा मन्त्रालय पाउने सहमति भएको सरकारका प्रवत्ता तथा आर्थिक मामिला तथा योजना मन्त्री जगन्नाथ थपलियाले जानकारी दिए ।

मुख्यमन्त्री जम्मकट्टेलले आज थप आठ जना मन्त्री नियुक्त गर्दै छन् । उनीहरूको दिउँसो शपथ हुने थपलियाले बताए । बागमतीमा सरकार गठन भएको १६ दिनपछि मन्त्रिपरिषद्ले पूर्णता पाउने भएको हो । यसअघि मन्त्रालय संख्या घटाउन अध्ययनका लागि कार्यदल गठन भएकाले सरकार विस्तारमा ढिलाइ भएको थियो ।

कार्यदलले मंगलबार प्रतिवेदन बुझाएपछि साँझ बसेको मन्त्रिपरिषद् बैठकले प्रदेशमा मन्त्रालय संख्या ११ वटा बनाउने निर्णय गरेको थियो । उक्त निर्णयपछि भागवण्डा टुंगो लगाइएको हो । जम्मकट्टेल २५ पुसमा मख्यमन्त्रीमा नियुक्त भएका थिए । उनले २६ पुसमा सत्ता साझेदार दल नेकपा एमालेका जगन्नाथ थपलियालाई आर्थिक मामिला तथा योजना मन्त्री र राप्रपा संसदीय दलका नेता उद्धव थापालाई बिनाविभागीय मन्त्रीमा नियुक्त गरेका थिए ।

आज एमालेबाट थप तीन जना र माओवाद केन्द्रबाट थप तीन जना गरी ६ जना र राप्रपाबाट थप दुई जना मन्त्री बन्न लागेका हुन् । राप्रपाले मन्त्रीहरूको नाम टुंगो लगाउन बाँकी छ भने एमाले र माओवादीले मन्त्री र मन्त्रालय जिम्मेवारी टुंग्याइसकेका छन् । एमालेबाट केशव पोख्रेल, रामेश्वर श्रेष्ठ र एकलाल श्रेष्ठ मन्त्री बन्दै छन् ।

मकवानपुरका सांसद एकालाल श्रेष्ठले श्रम, रोजगार तथा यातायात मन्त्रालय, ललितपुरका सांसद रामेश्वर श्रेष्ठले स्वास्थ्य मन्त्रालय र काठमाडौंका सांसद केशब पोख्रेलले प्रदेशको कृषि तथा पशुपन्छी विकास मन्त्रालयको जिम्मेवारी पाउने भएका हुन् ।

माओवादी केन्द्रले प्रदेशमा महत्वपूर्ण मन्त्रालय लिने भएको छ । प्रदेशको दोस्रो वरियताको आन्तरिक मामिला मन्त्री बाबुराम भट्टराई निकटका गंगानारायण श्रेष्ठ हुने भएका छन् । माओवादीका सांसद युवराज दुलाललाई भौतिक मन्त्रालयको जिम्मेवारी दिइएको छ । माओवादीकै कुमारी मोक्तानलाई सामाजिक विकास मन्त्री बनाउने भएको हो । मोक्तान यसअघि पनि सामाजिक विकास मन्त्री थिइन् ।

यसैगरी, राप्रपाका उद्धव थापालाई खानेपानी, उर्जा तथा सिँचाइ मन्त्री बनाइने भएको छ । उनले यसअघि भौतिक पूर्वाधार विकास मन्त्रालय मागेका थिए । राप्रपाले पर्यटन, उद्योग तथा सहकारी मन्त्रालय र वन तथा वातावरण मन्त्रालय पाउने भएको छ । यी दुई मन्त्रालयमा राप्रपाले कसलाई पठाउँदैछ भनेर टुंगिन बाँकी रहेको राप्रपाका सांसद सुनिल केसीले बताए । उनका अनुसार राप्रपाको बैठक चलिरहेको छ ।

प्रकाशित मिति: बुधबार, माघ ११, २०७९ १२:१९