राष्ट्रपति पाउनेमा कांग्रेस ढुक्क, सोचेको छैन अर्काे विकल्प

A+ A A-

सत्ताबाट विमुख कांग्रेसको ध्यान राष्ट्रपतिको चुनावमा केन्द्रित छ । त्यसका लागि माओवादी केन्द्रलाई आफ्नाे कित्तामा तान्न कांग्रेसले माओवादी नेतृत्वको सरकारलाई विश्वासको मत दियो । सभापति शेरबहादुर देउवा निकट नेताहरू त्यसलाई कांग्रेसले पूर्व गठबन्धन फर्काउने र कांग्रेसले राजनीतिक कोर्ष करेक्सन गरेको रूपमा लिन्छन् ।

कांग्रेसले सत्ता गठबन्धनमा अविश्वास उत्पन्न गराइ त्यसको फाइदा लिन प्रत्यक्ष/अप्रत्यक्ष सञ्जाल परिचालन गरिरहेको छ । सभामुखको चुनावमा कांग्रेस उम्मेदवारलाई मत दिएर जसपाले सत्ता गठबन्धन छाड्ने कांग्रेसको आस थियो । ४ माघमा कांग्रेस संसदीय दलकाे कार्यालयमा बसेकाे विपक्षी दलकाे बैठकमा जसपा प्रतिनिधि पनि पुगेका थिए । तर ५ माघमा सभामुखको चुनावमा जसपाले सत्ता गठबन्धनको उम्मेदवारको पक्षमा मत दियो ।

राष्ट्रपतिको चुनावका लागि कांग्रेसले माओवादीलगायतका संसद्मा भएका अन्य दलहरूसँ छलफल गर्नेछ । ‘राष्ट्रपतिको निर्वाचनमा नेपाली कांग्रेसले अरु दलहरूको पनि सहयोग लिएर प्रस्तुत हुने हाम्रो दृष्किोण रहेको छ,’ कांग्रेस प्रवक्ता डा प्रकाशशरण महतले भने, ‘त्यसका लागि हामी संसद्का अन्य दलहरूसँगको छलफल अगाडि बढाउने छौं ।’

कांग्रेसले राष्ट्रपति चुनावमा सत्ता बाहिरका दलहरूसँगै सत्तामा रहेका दलहरूको पनि सहयोग लिन चाहेको छ । पार्टी सह–महामन्त्री बद्री पाण्डे पनि कांग्रेसले सरकारमा सहभागी दलहरूलाई विपक्षी मोर्चामा ल्याउने प्रयास जारी राख्ने बताउँछन् । ‘सरकारमा रहेका दलहरूलाई मोर्चामा ल्याउने कोसिस जारी छ,’ उनले भने, ‘हामीले उहाँहरूलाई आग्रह गर्ने हो, अनुरोध गर्ने हो । उहाँहरूसँग छलफल गर्ने हो । छलफल र आग्रहका आधारमा आउनुभो भने आउनुभो, आउनुभएन भने पनि बाध्यकारी अवस्था रहँदैन ।’

१० पुसमा प्रधानमन्त्रीका लागि माओवादी अध्यक्ष पुष्पकमल दाहाल प्रचण्डको पक्षमा हस्ताक्षर गरेको जसपा अपेक्षा गरेको मन्त्रालय नपाएपछि सरकारमा गएको छैन । 'सरकारमा नजाउँ भने पाएको पनि गुम्छ, जाउँ के पाइयो भने जस्तो छ,’ जसपाका एक कार्यकारिणी सदस्यले शिलापत्रसँग भने ।

प्रचण्डको नेतृत्वमा सरकार बनाउन राष्ट्रपति कार्यालयमा सांसदको हस्ताक्षर बुझाएको नागरिक उन्मुक्ति पार्टी सरकारमा सहभागी भएको छैन । उसले कैलालीको टीकापुर घटनाका मुख्य दोषी रेशम चौधरीलाई रिहा गर्नुपर्ने सर्त राखेको छ । 'हाम्रो माग सम्बोधन भएर छिट्टै नै प्रतिपक्षी बेञ्चबाट सत्तापक्षको बेञ्चमा बस्न छिट्टै पाइयोस् भन्ने हाम्रो चाहना हो,’ पार्टी अध्यक्ष रञ्जिता श्रेष्ठले शिलापत्रसँग भनिन् ।

सरकारमा भएको जनमत पार्टीले खानेपानी मन्त्रालयको जिम्मेवारी पाएको छ । सुरुमा उद्योग मन्त्रालय पाउने सहमति कार्यान्वयन नभएपछि जनमत सांसद अब्बुदल खानले शपथ लिएर पनि मन्त्रालयमा पदभार ग्रहण गरेका छैनन् । बरु सरकारबाट बाहिरिने चेतावनी दिएका छन् ।

सभामुख चुनावमा सरकारमा असन्तुष्ट दलहरूलाई विपक्षी कित्तामा तान्न नसकेको कांग्रेसले राष्ट्रपति चुनावसम्म विपक्षी मोर्चा बलियो पार्ने रणनीति लिएको छ । तर राष्ट्रपति चुनावमा हार ब्यहोर्ने परिस्थिति आए विकल्पमा के गर्ने भन्ने योजना कांग्रेससँग छैन । प्रवक्ता महत भन्छन्, ‘किन सोच्नुपर्‍याे विकल्प ? राष्ट्रपति कांग्रेसकै भैहाल्छ नि ! सहमति नभए प्रजातान्त्रिक अभ्यास कांग्रेसले गर्छ ।’

राष्ट्रपति कांग्रेसले पाउनेमा सहमहामनत्री पाण्डे पनि ढुक्क देखिए । ‘विकल्प भनेर सोच्न पर्दैन । राजनीतिको प्रक्रिया हो नि ! कांग्रेसले पाउने प्रयास गरिरहेको छ,’ पाण्डेले शिलापत्रसँग भने । केन्द्रीय सदस्य प्रतिमा गौतम पनि तत्काल विकल्प नसोचिएको बताउँछिन् । ‘राष्ट्रपतिमा कांग्रेसले सक्ने प्रयास गरिरहेको छ । सहमति त निस्केला नि !,’ उनले शिलापत्रसँग भनिन् ।

कांग्रेस सांसद सञ्जय गौतम कांग्रेसले राष्ट्रपतिको विकल्प नसोचेको बताउँछन् । ‘समय बाँकी छ हेरौं । राष्ट्रपति लिन कोसिस गर्ने हो नभए प्रक्रियामा जान्छ,’ उनले शिलापत्रसँग भने ।

तर, कांग्रेसका इतर पक्षका केही सांसदहरू भने शंका गर्छन् । ‘शीर्ष नेताहरू ढुक्क भए पनि म राष्ट्रपति कांग्रेसले पाउने वा कांग्रेसबाट हुनेमा एकरत्ती देख्दिनँ,’ एक सांसदले भने, ‘खै के देखेर हाम्रा नेता पछि लागेका छन् ।’

प्रकाशित मिति: मंगलबार, माघ १०, २०७९ १९:२१