मेहबुब आलमले यसरी स्पट फिक्सिङमा फसाएका थिए आसलाग्दा खेलाडी आदिल अन्सारीलाई

मेहबुब आलमले यसरी स्पट फिक्सिङमा फसाएका थिए आसलाग्दा खेलाडी आदिल अन्सारीलाई

A+ A A-

नेपाल टी–२० लिगको स्पट फिक्सिङमा संलग्न भएको आरोपमा पक्राउ परेको २ जना क्रिकेटरलाई प्रहरीले सार्वजनिक गरेको छ । प्रहरीको केन्द्रीय अनुसन्धान ब्युरो (सीआईबी) ले क्रिकेटमा भएको स्पट फिक्सिङबारे अनुसन्धान थालेको थियो । स्पट फिक्सिङमा संलग्न पूर्वराष्ट्रिय क्रिकेटर मेहबुब आलम, राष्ट्रिय क्रिकेट टोलीका सदस्य आदिल अन्सारीलाई सीआईबीले बुधबार पत्रकार सम्मेलन गरेर सार्वजनिक गरेको हो ।

पक्राउ परेका आलम नेपाली टिमका पूर्व अल राउन्डर खेलाडी हुन् । उनी बायाँ हाते ब्याट्सम्यान र तीव्र गतिका बलर हुन् । उनले नेपाली राष्ट्रिय क्रिकेट टोलीको प्रतिनिधित्व सन् २००८ को आईसीसी वर्ल्ड क्रिकेट लिग डिभिजन फाइभको मोजाम्बिकविरुद्धको खेलमा एक्लै १० विकेट लिएका थिए ।

एकै खेलमा दश विकेट लिने कीर्तिमान बनाएका उनले गिनिज बुकमा नाम लेखाएका थिए । राष्ट्रिय क्रिकेट टोलीका सदस्य आदिल अन्सारी भने गत जेठमा मात्रै अमेरिकाविरुद्धको खेलबाट राष्ट्रिय टिममा डेब्यू गरेका खेलाडी हुन् । उनले जनकपुर रोयल्सबाट नेपाल टी–२० लिग खेलेका थिए ।

नेपाली क्रिकेट जगतमा आसलाग्दा खेलाडीका रूपमा हेरिएका अन्सारीले आईसीसी विश्वकप लिग २ त्रिकोणात्मक शृंखलामा आफ्नो डेब्यु खेलमै अविस्मरणीय प्रदर्शन गरेका थिए । अमेरिकाको टेक्सासमा भएको त्रिकोणात्मक सिरिजको अमेरिकाविरुद्ध उनले डेब्यू गरेका थिए । सोही खेलमा आदिलले इनिङ्सको अन्तिम ओभरमा अमेरिकालाई ६ रनसमेत नदिए रोकेपछि नेपाल र अमेरिकाबीचको खेल टाई हुन पुगेको थियो ।

बलिङमा मात्र नभएर आदिलले ब्याटिङमा समेत उत्कृष्ट प्रदर्शन गरेका थिए । पाँचौँ क्रममा ब्याटिङ गर्ने अवसर पाएका आदिलले आक्रामक रूपमा २४ बलमा ३६ रनको योगदान दिएका थिए । त्यसयता आदिल राष्ट्रियमा टोलीमा नियमित पर्दै आएका थिए । स्पट फिक्सिङमा अदालतबाट पुष्टि भए उनको क्रिकेट करिअर सकिनेछ ।

मेहबुब आलममार्फत स्पट फिक्सिङ गर्न पुगेका थिए आदिल

सीआईबीको अनुसन्धानबाट मेहबुब आलममार्फत आदिल स्पट फिक्सिङमा सामेल भएको खुलेको छ । सीआईबीको अनुसन्धानबाट मेहबुबले आदिलदाई एक ‘नो बल’ र ‘एक वाइड बल’ फाल्ने गरी अप्रोच गरेको र सोही प्रकृतिको खेल आदिलले खेलेको देखिएको सीआईबीका प्रवक्ता एसपी सन्जय थापाले जानकारी दिए । त्याेबापत आदिलले ठूलाे रकम लिएकाे अनुमान सीआईबीकाे छ ।

आदिलबाहेक मेहबुबले अर्का एक खेलाडीलाईसमेत स्पट फिक्सिङमा अप्रोच गरेको खुलेको छ । त्यस्तै, सीआईबीको अनुसन्धानबाट एकजना खेलको व्यवस्थापन पक्षबाट विदेशी खेलाडीलाई स्पट फिक्सिङको अप्रोच भएको खुलेको छ ।

त्यस्तै, एक जना टिमका म्यानेजरबाट समेत विदेशी खेलाडीमार्फत स्पट फिक्सिङ गराइएको खुलेको छ । पक्राउ परेका मेहबुब र आदिलबाहेक अन्य आशंका लागेका खेलाडीमाथि समेत अनुसन्धान गरिने सीआबीको भनाइ छ ।

सीआईबीको अनुसन्धानबाट नेपाल टी–२० लिगको व्यापारिक तथा रणनीतिक साझेदारीसहित सञ्चालन अधिकार पाएको भारतीय कम्पनी सेभेन थ्री स्पोर्ट्समार्फत नै स्पट फिक्सिङ भएको खुलेको छ ।

क्यानले सेभेन थ्री स्पोर्ट्सलाई नेपाल टी-२० लिग आठ वर्षका लागि ३३ करोड रुपैयाँमा बेचेको हो । ९ पुसदेखि सुरु भएको पहिलो संस्करणको प्रतियोगितामा देखिएका अस्वाभाविक नतिजा र केही खेलाडीको अस्वाभाविक प्रदर्शनबाट म्याच फिक्सिङको आशंका गरिएको थियो ।

म्याच फिक्सिङको आशंकामा क्यानले समेत अनुसन्धानका लागि सीआईबीलाई लिखित पत्राचार गरेको थियो । क्यानले लिगमा हुन सक्ने फिक्सिङको आशंकमा सीआईबीको अनुसन्धान टोलीलाई सुरुदेखि नै खेलाडीसँग याक एन्ड यती हाेटलमा राखेको थियो ।

लिगको उपाधि लुम्बिनीले जितेको थियो । १९ पुसमा उपप्रधानमन्त्री तथा गृहमन्त्री रवि लामिछानेले समेत अनुसन्धानका लागि निर्देशन दिएका थिए । गृहमन्त्रीको निर्देशनपछि सीआईबीले थप अनुसन्धान अघि बढाएको हो । स्पट फिक्सिङका अनुसन्धान गर्न सीआईबीले डीएसपी सुन्दर तिवारीको नेतृत्वमा पाँच सदस्यीय टोलीसमेत बनाएको थियो ।

टी–२० लिगमा ६ टिमका ९० जना खेलाडी सहभागी थिए । जसमा ३४ जना विदेशी खेलाडी समावेश थिए ।

प्रकाशित मिति: मंगलबार, माघ १०, २०७९ १५:३२