निर्मला कुर्मी बेपत्ता प्रकरणबारे सीआईबीको अनुसन्धान जहाँको त्यहीँ

A+ A A-

नागरिक समाजले बाँकेकी निर्मला कुर्मी बेपत्ता प्रकरणबारे प्रहरीले अझैसम्म सन्तोषजनक अनुसन्धान नगरेको भन्दै विरोध प्रदर्शन गरेको छ । निर्मला कुर्मीको न्यायका लागि २६ दिनदेखि माइतीघर मण्डलामा धर्नामा बसेका रुबी खानसहित महिला अधिकारकर्मी र पीडित परिवारका आफन्तलाई साथ दिन नागरिक समाजले सोमबार विरोध प्रदर्शन गरेको हो ।

दुई वर्षदेखि निरन्तर निर्मलाको न्यायका लागि आन्दोलनमा उत्रिएका रुबी खानहरूसहितका महिला अधिकारकर्मीका तर्फबाट प्रदर्शन हुन लागेको यो तेस्रो पटक हो । गत कात्तिकमा रुबीसहित महिला अधिकारकर्मीहरू निर्मलाको अनुसन्धानको माग गर्दै नेपालगञ्जबाट २० दिन पैदल हिँडेर काठमाडौं पुगेका थिए ।

त्यो बेला प्रहरीले निर्मला कुर्मीको हत्या अनुसन्धान प्रहरीको केन्द्रीय अनुसन्धान ब्युरो (सीआईबी) ले गर्ने आश्वासन दिएपछि दोस्रो चरणको प्रदर्शन रोकिएको थियो । तर, एक वर्षसम्म सीआईबीले निर्मला कुर्मीको हत्या अनुसन्धानमा कुनै नयाँ तथ्य फेला पार्न सकेको छैन । गत फागुनमा सीआईबीले कुर्मीको अनुसन्धान गर्न प्रहरी उपरीक्षक (एसपी) कमल थापाको नेतृत्वमा समिति गठन गरेको थियो ।

उक्त टोली कुर्मी बेपत्ता प्रकरणबारे अनुसन्धान गर्न केही समय स्थलगत अनुसन्धानका लागि बाँकेसमेत पुगेको थियो । तर, सीआईबीले बाँके पुगेर फर्किनुबाहेक केही कुराको अनुसन्धान गर्न नसकेको भन्दै रुबी खानसहितको समूह फेरि प्रदर्शन गर्न बाध्य भएका हुन् ।

सीआईबीले निर्मलाका नाममा रहेको जग्गा र नामसारी भएको कागजात नियन्त्रणमा लिएर त्यसको अनुसन्धान गरिरहेको दाबी गरेको छ । निर्मला कुर्मी प्रकरणको अनुसन्धानबारे बुझ्न पटक-पटक सम्पर्क गर्दा पनि सीआईबी प्रमुख एआईजी उत्तम सुवेदीले फोन उठाएनन् ।

कुर्मीलाई उनकै छिमेकी कांग्रेस नेता बादशाह कुर्मीमाथि सम्पत्ति हडपेर बेपत्ता पारेको आरोप लागेको छ । कुर्मीको करिब पाँच बिघा जग्गा अरुकै नाममा नामसारी भएको देखिएको छ । अधिकारकर्मीले बादशाह कुर्मीसहित कृष्णमुरारी सिंह, कुवर बबन सिंह, उर्मिला कनोजिया, अम्मरलाल कुर्मी, धीरेन्द्र सिंह, रमेश थापा र पार्वती विष्टलाई तत्काल पक्राउ गरी गहिरो अनुसन्धान गर्नुपर्ने माग राख्दै आएका छन् ।

यस्तो छ घटना

नेपालगञ्ज उपमहानगरपालिकासँग जोडिएको साविक परस्पुर गाविसकी हुन्, निर्मला कुर्मी । निर्मलाका पति महालु कुर्मी २०६२ सालमा बिते । दुई छोरासहित निर्मला परस्पुरमै बस्दै आएकी थिइन् । चार वर्षपछि २०६६ सालमा रहस्यमय ढंगले १५ दिनको अन्तरमा उनका १४ वर्षका छोरा राम सागर र १८ वर्षका सुरेशको पनि मृत्यु भयो ।

पहिले कुनै समस्या नभएका उनीहरू एकाएक बिरामी परेर बितेपछि निर्मला एक्लै भइन् । त्यही बेलादेखि निर्मलाको सम्पत्ति हडप्न षड्यन्त्र भएको दाबी स्थानीयको छ । पीडितको आरोपलाई बल पुग्ने गरी श्रीमान् र दुवै छोरा गुमाएपछि उनीहरूको नाममा रहेको ५ बिघा जग्गाको लालपुर्जा, नागरिकता र नाता कायमसम्बन्धी कागजपत्र कांग्रेस नेता बादशाह कुर्मीले नै नियन्त्रणमा राखेका थिए ।

विवाद र प्रशासनसम्म उजुरी परेपछि बादशाहले कागजपत्र फिर्ता गरेका थिए । त्यतिबेला पनि अधिकारकर्मी रुबी खानलगायत अधिकारकर्मीले सो घटनाको विरोध गर्दै प्रदर्शन गरेका थिए । खान पनि परस्पुरकै हुन् । त्यसको तीन वर्षपछि २०६९ सालमा निर्मलाको जग्गा नामसारी भएको देखिन्छ । जग्गा नामसारी भएको ६ वर्षपछि २५ माघ २०७५ देखि निर्मला कुर्मी एकाएक सम्पर्कविहीन भइन् । उनले भारतमा बिहे गरेको चर्चा चल्यो । तर, त्यसको दुई वर्षपछि भारतमै मृत्यु भएको खबर गाउँमा फैलियो ।

उक्त खबरपछि भने निर्मलाको अपहरण तथा शरीर बन्धक बनाएर हत्या गरेको आरोपमा महिला अधिकार मञ्चले गत वर्ष मंसिर १६ मा पूर्वसांसद कुर्मीसहित आठ जनाविरुद्ध जिल्ला प्रहरी कार्यालयमा जाहेरी दर्ता गराएको थियो । सोही जाहेरीमा अनुसन्धान नभएको भन्दै अधिकारकर्मी र स्थानीय महिलाले आन्दोलन गरेका थिए । पक्राउ गरेर अनुसन्धान गर्नुको सट्टा प्रहरीले उनलाई उन्मुक्ति दिएकाले आन्दोलन गर्नु परेको अधिकारकर्मी खानले बताउँदै आएकी छिन् । मुख्य आरोपित कांग्रेस नेता बादशाह कुर्मी ४ मंसिरकाे निर्वाचनबाट बाँके ३ 'ख' बाट प्रदेशसभा सदस्यमा निर्वाचित सांसद हुन् ।

प्रकाशित मिति: सोमबार, माघ ९, २०७९ १५:१२