सुल्झेला त राजदूत झा हत्याकाण्ड ?

A+ A A-

फ्रान्सका लागि पूर्वराजदूत केशव झा हत्याको एक वर्ष पुग्नै लाग्दा प्रहरीले फेरि झाकै घरमा सुरक्षा गार्डका रुपमा काम गर्ने काभ्रेका सानुकान्छा तामाङलाई पक्राउ गरेको छ ।

तामाङलाई काठमाडौं प्रहरी परिसरको टोलीले शुक्रबार काभ्रेबाट पक्राउ गरेको हो । उनीमाथि आइतबार अदालतबाट सातदिनको म्याद थपेर अनुसन्धान भइरहेको काठमाडौं प्रहरी परिसरका प्रहरी उपरीक्षक (एसपी) अशोक सिंहले बताए ।

यसअघि समेत झाको हत्या प्रकरणमा सानुकान्छा तामाङ, मालीको काम गर्ने आइतसिंह तामाङ र जयबहादुर गुरुङलाई अपराध महाशाखाको टोलीले पक्राउ गरेको थियो ।

पछि प्रमाण नपुगेको भन्दै जिल्ला अदालत काठमाडौंले तीनै जनालाई आठ–आठ हजार रुपैयाँ धरौटीमा रिहा गर्ने आदेश दिएको थियो ।
धरौटीमा छुटेका तीन जनामध्ये सानुकान्छाको नाममा झा की श्रीमतीले किटानी जाहेरी दिएपछि उनी पक्राउ परेका हुन् ।

काठमाडौं प्रहरी परिसर स्रोतका अनुसार झा हत्या घटना सुल्झिने संकेत देखिएको छ । ‘झाकी श्रीमतीले किटानी जाहेरी नै दिएकी छन्, उनले यसअघि दिएको बयानमा समेत शंका गर्ने धेरै ठाउँ छ,’ परिसर प्रहरी स्रोतले भन्यो, ‘हामी सोधपुका क्रममा छौं । झा हत्या सुल्झिने संकेत पाएका छौं ।’

आइतसिंह तामाङ र जयबहादुर गुरुङ माथिसमेत निगरानीमै रहेको प्रहरीको भनाइ छ ।

पोलिग्राफ परीक्षणमा ढाकेका थिए सानुकान्छाले

यसअघि अपराध महाशाखाले पक्राउ गरेका तीन जनामध्ये सानुकान्छाले पोलिग्राफ परीक्षणमा ढाँटेको देखिएको थियो ।

कान्छाराम तामाङमाथि शंका गर्ने आधार थुपै्र हँुदासमेत यथेष्ठ प्रमाण नपुग्दा उनी छुटेका थिए । त्यसयता समेत प्रहरीले उनको नियमित निगरानी गर्दै आएको थियो ।

प्रहरीले झाको हत्या अनुसन्धानमा झाको मोबाईल र डायरीमा भेटिएका नम्बरका आधारमा तराईका सयौं व्याक्तिमाथि अनुसन्धान गर्दासमेत केही ‘क्लू’ नभेटेपछि प्रहरीको सूई सानुकान्छा माथि नै सोझिएको हो ।

परिवारमाथि समेत अनुसन्धान

झा हत्याबारे प्रहरीले विभिन्न तरिकाले सयौं बढीसँग सोधपुछ र अनुसन्धान गर्दासमेत हत्याको केही ‘क्लू’ फेला पार्न नसकेपछि परिवारका सदस्य भूमिकाबारे समेत अनुसन्धान गरेको थियो ।

उनको हत्या भएको दुई दिनअघि मात्र उनका छोरा किरण झा र बुहारी आयरल्यान्ड गएका थिए । बुवाको हत्यापछि नेपाल फर्किएका किरण हाल आयरल्यान्डमै छन् । झा कि छोरी राजश्री झाको बारेमा समेत प्रहरीले सुक्ष्म निगरानी गरेको थियो । झाको हत्या हुँदा उनकी छोरी पनि देश बाहिर नै थिइन् । उनी अहिले काठमाडौंमै छन् ।

झाको भदौ ४ मा आफ्नै निवासमा घाटी रेटेर हत्या भएको थियो । झाको हत्या गरिएको कोठाबाट प्रहरीले हत्या गर्न प्रयोग गरिएको चक्कु, पन्जा, रगतले भिजेका कपडालगायत प्रमाण बरामद गरेको थियो ।

प्रकाशित मिति: सोमबार, भदौ २, २०७६ २३:१०