पशु हिंसा गर्ने प्रकाशमा कसरी जाग्यो पशु प्रेम ? (भिडियोसहित)

A+ A A-

बर्दियाको गुलरियाका प्रकाश मल्ललाई थाहा भएदेखि घरमा कलह नभएको दिन नै भएन । उनकी आमा नेवार समुदायकी हुन् । बुबाले प्रकाशकी आमालाई तेस्री श्रीमतीका रूपमा भित्र्याएका हुन् ।

तर, आमा नेवार भएकै कारण बुबाले हेला गरेको प्रकाशले सानैदेखि देखे । परिवारका अन्य सदस्यले पनि त्यसरी नै हेला गर्थे । गाउँलेहरूको हेला पनि सहन आमा बाध्य थिइन् । प्रकाशलाई भने नरमाइलो लाग्थ्यो । किन यस्तो गरेको होला ? उनी सोच्थे । र, हेलामा परेका आमाप्रति उनको माया अगाध थियो ।

प्रकाश भन्छन्, ‘घरमा बुबाले आमालाई नकुटेको दिनै हुँदैनथ्यो । बेलाबेला आमाको शरीर आफैँ काँप्थ्यो । सायद शारीरिक कमजोरी या कुनै कारणले हुनसक्छ । तर, भन्नचाहिँ मान्छेले देउता चढेको भन्थे । कतिले त आमालाई बोक्सीको आरोप पनि लगाउँथे ।’

त्यसबेला आमालाई घर परिवारदेखि समाजसम्मले हेला गरेको प्रकाशले अझै बिर्सेका छैनन् । आमामाथि भएको हिंसा प्रकाशको मनमा इखकै रूपमा गढ्यो ।

०००

प्रकाशको रुचि खेलकुदमा थियो । लाहुरे बन्ने रहर पनि थियो । दुर्भाग्य, प्रकाशको एउटा आँखा कम देख्ने भयो । जसले गर्दा लाहुरे बन्ने रहर रहरमै सीमित भयो । खासमा प्रकाश विद्रोही स्वभावका छन् । यसका पछाडि पारिवारिक कलह र सुसंस्कृत सामाजिक परिवेशमा हुर्किन नपाउनु कारक हुन सक्ने ठान्छन्, उनी । हुन पनि उनले किशोरावस्थामा झै-झगडा दिनहुँ गर्थे ।

उनको गाउँमा राँगाको बदशाला सञ्चालक चिनियाँ कम्पनी थियो । प्रकाशले त्यहाँ राँगा काट्ने काम पनि गरे । उनका अनुसार पुरै बदशाला रगतले लतपतिएको हुन्थ्यो । एकदिन एउटा घटना घट्यो । राँगालाई मार्न उनले हम्मर प्रहार गरे । तर, उनको निशाना चुक्यो । अर्थात्, जहाँ हम्मर प्रहार गरे, त्यहाँ लागेन । राँगालाई नथी लगाएको थियो ।

लामो सास फेर्दै जसरी प्रकाशलाई राँगाले हेर्‍यो, प्रकाशको मनमा चिसो पस्यो । तर, फेरि हम्मर हानेर राँगालाई ढालेरै छाडे । प्रकाशलाई भने त्यसबेलाको क्षणले अहिले पनि झस्काउँछ ।

०००

२०७२ सालतिरको कुरा हो । दैनिकजसो उनले गरेको झगडाले आमा वाक्कदिक्क थिइन् । तनावमा थिइन् । भरोसा राखेको छोरा सुध्रिएला भन्ने आमाको चाहना थियो ।

त्यही भएर आमाले उनलाई विवाह गर्न सल्लाह दिइन् । उनलाई ठीकै लाग्यो । विवाह गरे पनि । विवाहपछि पारिवारिक जिम्मेवारीको बोझ थपियो । जुन स्वाभाविक थियो । परिस्थिति कस्तो आयो भने राँगा काटेर कमाएको पैसाले परिवार चल्ने अवस्था भएन । त्यहीबेला उनलाई श्रीमतीले काठमाडौंमा बसौँ भनेर दिनहुँ भन्थिन् ।

प्रकाशलाई लाग्थ्यो- काठमाडौं गएर के गर्नु ? बरु, विदेश गएर केही वर्ष पैसा कमाएर फर्किन्छु । यही कुरा श्रीमती र आमालाई प्रकाशले राखे । स्वीकार भयो । दुबई जान तयार भए । राहदानी बनाए । तर, जुन दिन उनी दुबई जान लागेका थिए, श्रीमतीलाई परपुरुषसँग अनैतिक सम्बन्ध राखिरहेकै बेला भेटे । यो प्रकाशका लागि कल्पनाबाहिरको घटना थियो । तर, दुबई भने गएरै छाडे । मनमा पर्नु पिर पर्‍यो । विक्षिप्त भए । यतिसम्म कि रक्सीसँगै अन्य नसालु पदार्थ सेवन गर्दै दुबईको बन्द कोठा छ महिना बिताए । त्यसपछि नेपाल फर्के । फर्किँदा प्रकाशको स्वभाव पहिलेको भन्दा विल्कुल फरक थियो । उनी एक्लै बस्थे । कसैसँग बोल्दैनथे । परिवारका सबैले पागल भयो भने ।

०००

एक दिन राति प्रकाश खाना खाँदै थिए । मौसम जाडोयामको थियो । एउटा कुकुरको सानो छाउरो आएर उनकै छेउमा बस्यो । खाएर सकिन लागेको थोरै खाना दिए । छाउरोले मज्जाले खायो । प्रकाश आनन्दित भए । छाउरोको जिउभरी घाउ नै घाउ थियो । घाउ देखेर छाउरोको माया लाग्यो ।

अँध्यारो भएकाले छाउरोलाई परालमा सुताए । भोलिपल्ट एक जना साथीले सोधे, ‘यस्तो कुकुरको छाउरो के गर्ने ? भेटेनरी जानू, औषधि ल्याएर लगाइदिनू ।’ साथीले भने अनुसार भेटेनरी गए । औषधि ल्याएर लगाइदिए । तर, छाउरो मर्‍यो । प्रकाश स्तब्ध भए । यही घटनाले प्रकाशको जीवनमा नयाँ मोड लियो ।

पहिले चिनियाँ कम्पनीमा राँगा काट्ने मात्रै होइन, जहिल्यै धारिलो हतियारसहित झै-झगडा गर्दै हिँड्ने प्रकाशमा पशुपन्छीप्रति प्रेमभाव जाग्यो । बेवारिसे जनावरलाई उद्धार गर्न थाले । शिलापत्रसँग उनले भने, ‘एक वर्ष भयो । बर्दियामै मैले सेल्टर खोलेको छु । मेरो एक जना विदेशी साथी छन् । सोल्टिज होप्स् नाममा उनले अमेरिकाबाट एउटा संस्था चलाउनुभएको छ । त्यही संस्थासँग सहकार्य गरेर सहयोगी पाइला नामको संस्था स्थापना गरेर काम गरिरहेको छु ।’

उनका संस्थामा देशका विभिन्न ठाउँमा बेवारिसे अवस्थामा फेला परेका ७० वटा कुकुर छन् । कुकुरको अलवा गाई र घोडालाई पनि उद्धार गरेर प्रकाशले पालिरहेका छन् । ‘सबैभन्दा गाह्रो यी जनावर बिरामी पर्दा हुन्छ । उपचारका निम्ति काठमाडौं ल्याउनुपर्छ’, उनले भने, ‘यसपटक पाँचवटा कुकुर बिरामी परे । उपचार काठमाडौंमै गरे ।’

प्रकाशलाई नरमाइलो त्यतिबेला लाग्छ, जतिबेला कुकुर बिरामी परेर काठमाडौंमा आउनुपर्दा गाडी बिग्रिएर धेरै समय लाग्दा कुकुरहरू भोकै हुन्छन् ।

हेर्नुस् भिडियो :