प्रचण्डलाई 'गुन' लगाएर राष्ट्रपति आफूले लिने कांग्रेसको दाउ, सफल होला देउवाको रणनीति ?

प्रचण्डलाई 'गुन' लगाएर राष्ट्रपति आफूले लिने कांग्रेसको दाउ, सफल होला देउवाको रणनीति ?

A+ A A-

प्रदेश १ मा सत्ता गठबन्धनबाट सभामुख माओवादीले पायो, नेपाली कांग्रेसले उम्मेदवारी दिएन । बागमती प्रदेशमा माओवादीले मुख्यमन्त्री पायो, कांग्रेसले विश्वासको मत दियो । मधेस प्रदेशमा जसपाले मुख्यमन्त्री पायो, त्यहाँ पनि कांग्रेसले विश्वासको मत दियो । लुम्बिनी प्रदेशसभामा माओवादीले सभामुख पाउँदा कांग्रेसले उम्मेदवारी दिएन ।

कर्णाली र सुदूरपश्चिममा मात्र माओवादी-कांग्रेसको सहकार्य देखिएन । सुदूरपश्चिम प्रदेशको सभामुखमा आफ्नै उम्मेदवार उठायाे भने कर्णालीमा विश्वासकाे मत दिएन । अन्यत्र माओवादीबाहेकका सत्ता साझेदार पार्टीबाट उम्मेदवार हुँदा कांग्रेस चुनाव भिड्यो ।

माओवादी उम्मेदवार भएको ठाउँमा कांग्रेसले उम्मेदवारै नउठाउनु संयोग मात्र नभई उसको रणनीति नै भएको देखिन्छ । ‘यही सहकार्य राष्ट्रपति चुनावमा हुन्छ । केन्द्रमा सभामुख माओवादीले पाएको भए हामीले उम्मेदवार दिने थिएनौँ,’ कांग्रेसका एक नेताले शिलापत्रसँग भने, 'संघमा सभामुख एमालेले पाएको थियो, त्यसमा कांग्रेसले उम्मेदवार उठायो ।'

सभामुखको मनोनयनपछि गत बुधबार प्रधानमन्त्री पुष्पकमल दाहाल प्रचण्ड र कांग्रेस सभापति शेरबहादुर देउवाबीच टेलिफोन संवाद भयो । सहमतिमा राष्ट्रपतिकाे कुरा उठाएर प्रचण्डले कांग्रेसलाई आशा देखाएका छन् । सभामुख निर्वाचनपछि बिहीबार संसद्‌ भवनबाट बाहिरिने क्रममा पनि उनले राष्ट्रपतिमा सहमतिको प्रयास भइरहेको बताएका थिए ।

प्रचण्डका ती अभिव्यक्तिले सभापति देउवा कांग्रेसबाट राष्ट्रपति हुनेमा ढुक्क भएकाे उनलाई भेटेका एक नेता बताउँछन् । ‘राष्ट्रपति कांग्रेसबाट हुन्छ भन्नेमा सभापतिज्यू ढुक्क हुनुहुन्छ,’ मंगलबार देउवालाई भेटेका ती नेताले भने, ‘प्रचण्डको लाइन पनि त्यस्तै देखिन्छ । उहाँले राष्ट्रपति कांग्रेसको होस् भन्ने चाहनुभएको छ ।’

प्रधानमन्त्री प्रचण्डको सार्वजनिक टिप्पणीबाट पनि ती नेताले भनेझैँ संकेत मिल्छ । सत्ता समीकरण निर्माणकै क्रममा राष्ट्रपति आफ्नाे भागमा राखेकाे एमाले भने यसबाट सकारात्मक छैन । उसको नेताहरूको टिप्पणी कांग्रेसलाई राष्ट्रपति नभएर उपराष्ट्रपति र उपसभामुख दिन सकिने बताउँछन् । ‘राष्ट्रिय सहमति गर्ने भए कांग्रेसलाई उपराष्ट्रपति र उपसभामुख दिन सकिन्छ । अब उपसभामुखको पनि चुनाव हुँदैछ । उपराष्ट्रपतिमा कांग्रेसले मान्छ र त्यसमा प्रधानमन्त्रीज्यूले पनि मनाउन सक्नुभयो भने के नराम्रो छ र ?,’ एमाले प्रचार विभाग उपप्रमुख विष्णु रिजालले भने ।

कांग्रेस प्रवक्ता डा. प्रकाशशरण महत कांग्रेसले राष्ट्रपतिमा सहमति भए एक नीति र नभए अर्को नीति लिएर जाने बताउँछन् । ‘राष्ट्रपति तटस्थ भूमिका निर्वाह गर्नुपर्ने र संविधानको संरक्षक हुने संवैधानिक पद हो । यसमा सहमति हुन्छ भने ठीकै छ, नभए कांग्रेसले आफ्नो बाटो तय गर्छ,’ प्रवक्ता महतले भने ।

सभामुख निर्वाचनको दिन बिहीबार कांग्रेस नेता रामचन्द्र पौडेल पनि प्रधानमन्त्री प्रचण्ड भेट्न बालुवाटार पुगेका थिए । सभामुखको उम्मेदवारी दिनसमेत प्रचण्डको सिग्नल कुर्नुपर्ने आशय पदाधिकारी बैठकमा राखेका पौडेल आफैँ राष्ट्रपतिको दौडमा छन् । कांग्रेसलाई राष्ट्रपतिमा स्वीकार्न माओवादीलाई मनाउन उनी लागिपरेका छन् ।

प्रचण्डले गठबन्धन गरेर चुनावमा गएको र विश्वासको मत दिएको गुन तिर्ने बेला राष्ट्रपतिको चुनाव रहेको कांग्रेस नेताहरू बताउँछन् । ‘प्रचण्डले विश्वासको मतको गुन तिर्ने बेला आएको छ । पाँच वर्षमा राष्ट्रपतिबाट दलहरू र संसद् कसरी पेलियो, त्यो प्रचण्डले बुझ्नुभएको छ,’ कांग्रेसका अर्का सांसदले भने ।

कांग्रेसले गरेको गल्तीको कोर्स करेक्सन भएकाले र प्रचण्डको कोर्टमा बल पुगेको कांग्रेस नेताको टिप्पणी छ । ‘१० गते गरेको गल्ती कांग्रेसले विश्वासको मत दिएर सच्यायो । अब प्रचण्डजीले के गर्नुहुन्छ, हेरौँ,’ कांग्रेस नेता गोपालमान श्रेष्ठले भने ।

राष्ट्रपतिका लागि कांग्रेसबाट उम्मेदवार को हुने र कांग्रेसको नीति कस्तो हुने भन्ने स्पष्ट चित्र कांग्रेसले दिएको छैन । ‘पर्खौं न २–४ दिन । सभामुख र उपसभामुखको चुनाव सकियोस् । त्यसपछि कुरा क्लियर हुँदै जान्छ,’ कांग्रेस सांसद रामहरि खतिवडाले भने ।

प्रचण्डलाई विश्वासको मत दिएर राष्ट्रपतिको लबिङ सुरु गरेको कांग्रेस सांसदहरू बताउँछन् । ‘हाम्रो मुख्य ध्यान राष्ट्रपति हो । यसमा सभापति लागिराख्नुभएको छ । अरु जे भए पनि चाहेको यही पद हो,’ कांग्रेसका अर्का नेता भन्छन् ।

प्रकाशित मिति: शुक्रबार, माघ ६, २०७९ २०:२३