के छ चेलीको खबर भन्दै सोवितालाई ओलीले भनेका थिए– तपाईंको राम्रो छ, तयारी गर्नुस्

के छ चेलीको खबर भन्दै सोवितालाई ओलीले भनेका थिए– तपाईंको राम्रो छ, तयारी गर्नुस्

A+ A A-

सत्तारुढ गठबन्धनबाट उपसभामुखमा राष्ट्रिय स्वतन्त्र पार्टीले इन्दिरा रानामगरलाई उम्मेदवार बनायो । उनी रास्वपाको समानुपातिक सांसद हुन् । तर, धेरैको अनुमान थियो– काठमाडौं क्षेत्र नम्बर २ बाट निर्वाचित सोविता गौतमलाई रास्वपाले उपसभामुखको उम्मेदवार बनाउने छ । चर्चा पनि सोविताकै थियो । उनले तयारी पनि गरेकी थिइन् ।

एमाले अध्यक्ष केपी शर्मा ओली र माओवादी केन्द्रका अध्यक्षसमेत रहेका पुष्पकलम दाहाल प्रचण्डले पनि सोवितालाई ‘ग्रिन सिग्नल’ दिएका थिए । पार्टी नेतृत्वले पनि विज्ञताको आधारमा चयन गर्ने भनिरहेको थियो । त्यसैले कानुनको जानकार रहेकी सोविताले उपसभामुखका दाबी गर्नु स्वभाविक नै थियो ।

बिहीबार सभामुखको निर्वाचनपछि संसद् भवनभित्र अध्यक्ष ओली र प्रचण्डसँग सोविताको सम्वाद भएको थियो । प्रधानमन्त्री प्रचण्ड र अध्यक्ष ओलीले उपसभामुखको तयारी गर्न सोवितालाई संकेत गरेका थिए । संसद् भवनमा ओली र प्रचण्डसँग सम्वाद भएको सोविताले नै पुष्टि गरेकी छिन् ।

‘के छ चेलीको खबर भनेर अध्यक्ष ओलीले सोध्नुभएको थियो । तपाईंको राम्रो छ, तयारी गर्नुहोस् भन्नुभएको थियो,’ सोविताले भनिन् । अध्यक्ष ओलीसँग कुरा भएपछि प्रधानमन्त्री प्रचण्डसँग पनि संसद् भवनमै उनको छलफल भएको थियो । प्रधानमन्त्री प्रचण्ड र अध्यक्ष ओलीसँग उनको भेट संयोगले भएको थियो ।

मन्त्रीका लागि पनि उनले पहल गरेकी थिइन् । उनको दाबी कानुन मन्त्रालयमा थियो । गृह, शिक्षा र श्रम मन्त्रालय रास्वपाले पाएपछि विज्ञताको आधारमा मन्त्री छनोट गर्दा उनी ब्याक हुनु परेको थियो । त्यसपछि उनले उपसभामुखको दाबी गरेकी थिइन् । ‘कानुनसँगको विषय भएकाले मेरो नाम आएको थियो । संसदीय प्रणालीमा आकांक्षा राख्नु स्वभाविक हो । आशा अपेक्षा राख्नु ठूलो कुरा होइन,’ संसदीय दलको बैठकपछि उनले भनिन् ।

अनि ब्याक भइन् सोविता...
तर शुक्रबार रास्वपाको संसदीय दलको बैठकले रानामगरलाई उम्मेदवार बनाउने सर्वसम्मत निर्णय गर्‍यो । सोविताले दाबी कायमै राखेकी थिइन् । पार्टीका सभापति रवि लामिछनेसहितका अन्य संसादहरूले उपसभामुखबाट ब्याक हुन उनलाई सुझाए । उनी ब्याक हुनुपर्ने कारण थियो, समावेशिता ।

रास्वपाका चार जना मन्त्री खस आर्यबाट भएपछि समावेशी नभएको भन्दै आलोचाना भएको थियो । त्यसैले उपसभामुखमा खस आर्यबाहेकको नाम छनोट गर्ने निर्णयमा रास्वपा पुगेको हो । ‘मन्त्री छनोटमा समावेशी नभएको प्रश्न उठेको थियो । त्यसैले इन्दिराजीलाई उठाउने निर्णय गरेका हौँ,’ रास्वपाका एक नेताले भने । सबैको सल्लाह सुझाव अनुसार अन्ततः सोविता उपसभामुखबाट ब्याक भइन् ।

उनी आफैँ उपसभामुखको उम्मेदवार रानामगरको प्रस्तावक बन्ने निर्णय गरिन् । ‘सर्वसम्मत रूपमा निर्णय गरेका हौँ । प्रस्तावक म आफैँ बसेको छु । राष्ट्रिय मात्र होइन अन्तर्राष्ट्रिय जगतले नै चिनेको र विज्ञतालाई मध्यनजर गरेर पठाउने निर्णय गरेको हो,’ उनले भनिन् । सोविताको भूमिका संसद् र पार्टीको लागि प्रभावकारी हुने भएकाले उपसभामुखबाट ब्याक गराइएको रास्वपाका नेताहरू बताउँछन् । अब उनलाई संसदीय समितको सभापति बनाउने रास्वपाको तयारी छ ।

तस्वीर :सुशील श्रेष्ठ

सम्बन्धित समाचार

प्रकाशित मिति: शुक्रबार, माघ ६, २०७९ १७:२२