पार्टीको संसदीय भूमिकाप्रति कांग्रेस सांसदकै गुनासो- नेताले के गरे गरे, कच्चा खेल खेले

पार्टीको संसदीय भूमिकाप्रति कांग्रेस सांसदकै गुनासो- नेताले के गरे गरे, कच्चा खेल खेले

A+ A A-

बिहीबार १ बज्नै लागेको थियो- संसद भवन बानेश्वरमा चार जना महिला सांसदसहित सभामुखकी उम्मेवादर ईश्वरी न्यौपाने गाडीबाट ओर्लिइन् ।

१ बजे संसदको कारबाही अघि बढ्ने तालिका भएकाले हतारमा देखिन्थिन् उनी । चिनजानको व्यक्तिहरूले शिष्टाचारमा नमस्कार गरे । नमस्कार गर्नेमध्ये ‘एक जनाले सोधे दिदीले के गर्‍या ?’ एक जना सांसदले जवाफ फर्काइन्, ‘सबैले नाई भन्न कहाँ सक्छन् र ? हामी भए नाई भन्थ्यौँ । दिदीले सक्नुभएन ।’

ती सांसदले 'खै दिदी हार्न किन तयार हुनुभयो ?' भन्दा न्यौपाने एकैछिन् सोचमग्न भइन् र संसद भवन प्रवेश गरिन् ।

‘जसरी पनि जिताउनुस् नि !’ एक शुभेच्छुकले ती सांसदलाई भने । उनी ‘प्रयास गर्छौं’ भनेर संसद प्रवेश गरिन् ।

हारको मानसिकता स्वीकार गरेर कांग्रेस सांसद बानेश्वर पुगेका थिए । विश्वासको मत दियो खाली हात भयो । अब सच्चा प्रतिपक्ष रहेन भन्नको लागि मात्र प्रतिपक्ष भयो त कांग्रेस भन्ने शिलापत्रको जिज्ञासामा एक सांसदले भने, ‘खै कांग्रेसले के गर्‍यो गर्‍यो । कच्चा खेल खेल्यो । राष्ट्रपति पाउने आस त छ, परिपक्व छैन ।’

सत्ता गठबन्धनको समर्थनमा उम्मेदवार बनेका एमाले सांसद देवराज घिमिरे १६७ मत पाउँदै सभामुखमा निर्वाचित भएपछि न्यौपानेलाई सभामुखमा निर्वाचित गरियोस् भन्ने प्रस्तावमाथि मतविभाजन नै हुन पाएन । घिमिरेको पक्षमा १६७ मत पर्दा विपक्षमा १०० सांसदले मत दिएका थिए भने एक मत तटस्थ बसेका थिए ।

समामुख र उपसभामुखमा विपक्षी दलहरूसँग मोर्चाबन्दी गरेर राष्ट्रपतिमा आफ्ना उम्मेदवार विजयी गराउने रणनीति कांग्रेसको छ । त्यसमा सफल हुन प्रधानमन्त्री पुष्पकमल दाहाल 'प्रचण्ड' र माओवादीको 'मुभ'को प्रतिक्षाको अन्तिम आस पालेर कांग्रेस बसेको देखिन्छ ।

सत्ता गठबन्धन भत्काउने रणनीतिमा कांग्रेसले प्रधानमन्त्री प्रचण्डलाई विश्वासको मत दिएको थियो । कांग्रेस नेताहरू सभामुखको चुनावसँगै गठबन्धन भत्काउने आफूहरूको लक्ष्यका बारे औपचारिक रूपमै बोल्न थालेका छन् । विश्वासको मत दिएर कांग्रेसले सत्तामा फर्किने रणनीति सुरु गरिसकेको बुझ्न गाह्रो छैन ।

‘कांग्रेसको अबको मिसन राष्ट्रपति हुन्छ । गठबन्धन टुटाउने काम जसले पनि गर्छ नि,’ संसद भवनमा कांग्रेस सांसद चन्द्र भण्डारीले भने, ‘पहिलेको गठबन्धन टुटाएर अहिलेको गठबन्धन बनेको हो ।’

सदनमा न्यौपानेलाई विश्वासको मत माग्दै एकीकृत समाजवादीका सांसद प्रकाश ज्वालाले प्रधानमन्त्रीलाई विश्वासको मत दिएको र राष्ट्रिय सहमतिको सरकारको चर्चा चलेकाले माओवादीले न्यौपालेलाई मत दिएर गुन तिर्ने अपेक्षा गरेका थिए । विपक्षी दलहरू मिलेर राष्ट्रपति/उपराष्ट्रपति र सभामुख/उपसभामुखको चुनाव लड्दैछन् ।

कांग्रेसलाई उपराष्ट्रपति र उपसभामुख दिन तयार एमाले अध्यक्ष केपी शर्मा ओली राष्ट्रपतिबारे एमाले उम्मेदवारमा सहमति हुनुपर्ने बताउँछन् । ‘राष्ट्रपतिमा एमालेले उम्मेदवार उठाउँछ त्यसमा राष्ट्रिय सहमति हनुपर्छ, त्यसो हुन सक्छ,’ ओलीले भने ।

प्रधानमन्त्री प्रचण्डले भने राष्ट्रपतिमा सहमति भइदिए हुन्थ्यो भन्ने आकांक्षा राखेका छन् । ‘राष्ट्रपति निर्वाचनको लागि समय अझै बाँकी छ । छलफल भैरहेको छ । सत्ता साझेदार दल र मैले पनि एउटा समझदारी बनिदिए हुन्थ्यो भन्ने कोसिस हो हामी प्रयास गरिरहेका छौँ,’ प्रचण्डले भने ।

कांग्रेसलाई ढोक्सामा माछा पर्छ भन्ने देखेको भए त्यो नदेख्दा हुन्छ भनेर एमाले अध्यक्ष ओलीले राष्ट्रपतिमा आँखा नलगाउन सन्देश दिइसकेका छन् । अर्को ढोक्सा थाप्ने प्रयासमा रहेको कांग्रेस ओलीलाई असफल बनाएर आफू सफल हुने रणनीतिमा छ । ‘ढोक्सा ओलीले थाप्नुभएको रहेछ उहाँ सफल हुनुभयो । माओवादीसँग गठबन्धन १० वर्ष जाने भन्ने थियो,’ कांग्रेस महामन्त्री विश्वप्रकाश शर्माले भने ।

मन्त्रीहरू भने कांग्रेसको रणनीति प्राकृतिक रूपमा हुनुपर्ने बताउँछन् । ‘प्राकृतिक हिसाबमा सबै कुरा हुनुपर्छ । अहिले गठबन्धन बलियो हुँदै गइरहेको छ । विगतमा भएका असमझदारी कम हुँदै गएका छन्,’ कानुनमन्त्री ध्रुवबहादुर प्रधानले शिलापत्रसँग भने, ‘सत्तापक्ष र प्रतिपक्ष देश बनाउन अघि बढ्नुपर्छ ।’

प्रकाशित मिति: बिहीबार, माघ ५, २०७९ १९:५२