सन्दीपलाई अदालतले धरौटीमा छाड्न आदेश दिएपछि अब के हुन्छ ?

A+ A A-

किशोरी बलात्कार प्रकरणमा पुर्पक्षका लागि थुनामा रहेका नेपाली क्रिकेट टिमका निलम्बित पूर्वकप्तान सन्दीप लामिछानेलाई २० लाख रुपैयाँ धरौटीमा थुनामुक्त गर्न उच्च अदालत पाटनले आदेश दिएको छ । योसँगै सन्दीपले अब काठमाडौं जिल्ला अदालतमा आफूविरुद्ध लागेको बलात्कारको मुद्दा बाहिर बसेर लड्ने छन् ।

बिहीबार उच्च अदालत पाटनले सन्दीपलाई २० लाख धरौटीमा थुनामुक्त गर्न आदेश दिएको हो । काठमाडौं जिल्ला अदालतले सन्दीपले पुर्पक्षका लागि थुनामा पठाएकामा त्यसलाई उल्ट्याउँदै उच्च अदालतका न्यायाधीशद्वय ध्रुवराज नन्द र रमेश ढकालको इजलासले सन्दीपलाई धरौटीमा रिहा गर्न आदेश दिएको हो । सन्दीपले ‘बेरितको आदेश बदर गरी पाउँ’ भन्दै मंसिर २९ गते उच्च अदालत पाटनमा निवेदन दिएका थिए ।

धरौटीमा रिहा गर्न आदेश दिए पनि अदालतले केही सर्त राखेको छ । सन्दीप सम्भवतः शुक्रबार रिहा हुँदैछन् । तर उनी वैदेशिक भ्रमणमा जाने पाउने छैनन् । त्यस्तै उनले पीडित भनिएकी किशोरीसँग सम्पर्क गर्न पनि पाउने छैनन् । सन्दीपलाई किशोरीको परिवारसँग पनि सम्पर्क गर्न अदालतले रोक लगाएको छ ।

पीडित किशोरीले भदौ ५ गते सन्दीपले आफूलाई होटलमा लगेर बलात्कार गरेको बयान दिएकी थिइन् । गत भदौ २१ गते नुवाकोटकी एक नाबालिकाले प्रहरी वृत्त गौशालामा सन्दीपविरुद्ध पिंगलास्थानको काठमाडौं होटल इनमा राखेर बलात्कार गरेको बयान दिएकी थिइन् ।

५ गते दिउँसो ती किशोरीलाई घुम्नका लागि नगरकोट लगेको आरोप सन्दीपमाथि छ । साँझ काठमाडौं फर्केर उनीहरू होटलमा बास बसेको र राति बलात्कार गरेको किशोरीले प्रहरीसामु बयान दिएकी थिइन् । त्यस लगतै प्रहरीले पनि नगरकोट गएको सीसीटीभी फुटेजदेखि होटलको सीसीटीभी फुटेज हेर्दै अनुसन्धानलाई अगाडि बढाएको थियो ।

यो उजुरीसँगै यो घटनाले अन्तर्राष्ट्रिय जगतमै चर्चा पायो । किनभने सन्दीप लामिछाने नेपालको कप्तान मात्रै नभएर विश्वका सबै फ्रेन्चाइज लिग खेलिसकेका खेलाडी थिए ।

यता, पीडितले उजुरी दिँदा सन्दीप भने क्यारेवियन प्रिमियर लिग (सीपीएल) खेल्न वेष्ट इन्डिजमा पुगेका थिए । केन्यासँग ३–२ ले नेपाललाई टी–२० क्रिकेट सिरिजको उपाधि दिलाएका सन्दीपविरुद्धको बलात्कारको आरोपले हंगामा मच्चाएको । त्यसको केही दिनपछि आफू निर्दोष रहेको बताउँदै सामाजिक सञ्जालमा पोष्ट हानेका सन्दीप एकाएक गायब भए ।

गत असोज २० गते नेपाल फर्किएसँगै त्रिभुवन विमानस्थलबाटै प्रहरीले सन्दीपलाई पक्राउ गरेको थियो । नेपाल फर्किनुअघि सन्दीपले फेसबुकमा आफू निर्दोष रहेको पुनः दोहोर्‍याउँदै भनेका थिए, ‘म मेरो देश अक्टोबर ६ तारिखमा आउँदैछु । कानुनी रूपमा लडाइँ लड्न म तयार छु ।’

गत कातिक १४ गते किशोरी बलात्कार गरेको आरोपमा पक्राउ परेका क्रिकेटर सन्दीपविरूद्ध सरकारी वकिलको कार्यालयले काठमाडौं जिल्ला अदालतमा १२ वर्ष कैद सजायको माग गर्दै मुद्दा दर्ता गरेको थियो । पक्राउ परेका सन्दीपलाई तीन पटकसम्म म्याद थप गरी प्रहरीले अनुसन्धान गरेको थियो ।

कातिक १८ गते काठमाडौं जिल्ला अदालतले सन्दीपलाई पुर्पक्षका लागि थुनामा राख्ने आदेश दिएको थियो । जिल्ला न्यायाधीश माधव घिमिरेको इजलासले उनलाई थुनामा पठाउने आदेश दिएको थियो ।

सन्दीपका तर्फबाट पाँच जना वरिष्ठ अधिवक्तालगायतले बहस गरेका थिए । वरिष्ठ अभिवक्ता शम्भु थापा, रमण श्रेष्ठलगायतले बहसका क्रममा पीडित भनिएकी किशोरी नाबालिग नभएको जन्मदर्ताको प्रमाणपत्र पेस गर्दै सन्दीपलाई धरौटीमा छाड्न दलिल गरेका थिए ।

नेपालमा सन्दीपकै कारण धेरैले क्रिकेट खेल्न थाले, धेरैले क्रिकेट बुझे । सन्दीपलाई आइडल मान्दै उनकै पथमा हिँड्ने प्रयास धेरैले गरे । नेपालबाट अन्तर्राष्ट्रियस्तरमा सबै फ्रेन्चाइज लिग खेलेका सन्दीप सबैको प्रीय र आदर्श पात्र थिए । इन्डियन प्रिमियर लिग क्रिकेटमा दिल्ली क्यापिटल्समा अनुबन्धित भइसकेपछि उनले अन्य अन्तर्राष्ट्रिय फ्रेन्चाइज लिग खेले । उनको चर्चा विश्वभरि नै भयो । सबैको तारिफ पाए । प्रदर्शन पनि त्यहीअनुसारको गर्दै गए ।

१६ वर्षको उमेरमै राष्ट्रिय टिममा डेब्यु गर्दै सनसनी मच्चाएका उनले छोटो समयमा धेरै प्रगति गरे । तर, त्यो प्रगति र आफ्नो उचाइलाई उनले कायम राख्न सकेनन् । शून्यबाट सुरु भएको उनको करिअरले सगरमाथाको उचाइ चुमेको थियो । तर, उनको करिअरमै ठूलो दाग लाग्यो ।

कारागारमै रहेका सन्दीपको पक्षमा बोल्दै राष्ट्रिय क्रिकेट टिमका सदस्य आरिफ शेखले सन्दीपले न्याय पाउनु पर्ने धारणा राखेका थिए । उनले पुस २० गते सामाजिक सञ्जाल फेसबुकमा ‘जस्टिस फर सन्दीप’ भन्दै लेखेका थिए ।

प्रकाशित मिति: बिहीबार, पुस २८, २०७९ २०:४६