‘स्पट फिक्सिङ’ मा भण्डारी र भेषवाकरमाथि पनि सीआईबीको अनुसन्धान

A+ A A-

टी–२० लिग क्रिकेटमा भएको ‘स्पट फिक्सिङ’ को अनुसन्धानको घेरामा तीन जना चर्चित क्रिकेटर परेका छन् । प्रहरीको केन्द्रीय अनुसन्धान ब्युरो (सीआईबी) ले गरेको स्पट फिक्सिङको प्रारम्भिक अनुसन्धानमा तीन जना नेपाली खेलाडीहरू तानिएका छन् । उनीहरूसँग सीआईबीले बयानसमेत लिएको छ । सीआईबी स्रोतका अनुसार स्पट फिक्सिङको आशंका सीआईबीले विनोद भण्डारी र शरद भेषवाकरसँग बयान लिएको हो ।

विनोद भण्डारीले सन २००९ को एसीसी ट्वान्टी ट्वान्टी कपबाट नेपाली राष्ट्रिय टिमबाट डेब्यु गरेका थिए । उनी नेपाली क्रिकेटमा हिटर ब्याटरका रूपमा परिचित छन् । त्यस्तै भेषवाकरले २००४ देखि राष्ट्रिय टिमबाट क्रिकेट सुरु गरेका खेलाडी हुन् । उनी टिमका लागि मध्यक्रमका ब्याटर हुन् ।

‘स्पट फिक्सिङको पुरै अनुसन्धान हुन बाँकी नै छ । हामी थप प्रमाण र उनीहरूको खेलेको खेलको भिडियो अध्ययन गर्दैछौँ । प्रारम्भिक अनुसन्धानबाट विनोद भण्डारी, शरद भेषवाकरको भूमिका शंकास्पद देखिएको छ । हामी थप अनुसन्धान गर्दैछौँ । अहिले नै उनीहरूको संलग्नता पुष्टि भएको होइन । केही आशंका गर्ने ठाउँ भने छ,’ सीआईबी स्रोतले भन्यो ।

भण्डारीले फारवेस्ट युनाइटेड र भेषवाकरले पोखरा एभेन्चरबाट लिग खेलेका थिए । उनीहरूबाहेक पूर्वखेलाडीहरू र टिमसँग संलग्न भएका केही सदस्यको भूमिकासमेत शंकास्पद भएको सीआईबीको दाबी छ । जसमध्ये एक जना राष्ट्रिय टिमका पूर्वखेलाडी मेहबुब आलमको भूमिका शंकास्पद देखिएको सीआईबीले जनाएको छ ।

केही दिन यता टी–२० लिग क्रिकेटमा भएको स्पट फिक्सिङबारेको अनुसन्धानलाई सीआईबीले तीव्रता दिएको छ । स्पट फिक्सिङमा केही नेपाली खेलाडी र केही विदेशी खेलाडीको भूमिका शंकास्पद देखिएको सीआईबीका प्रवक्ता एसपी सञ्जय थापाको भनाइ छ । स्पट फिक्सिङमा आशंका गरिएका केही विदेशी खेलाडी भने नेपाल छोडिसकेका छन् ।

सीआईबीले क्रिकेटमा भएको फिक्सिङबारे अनुसन्धान गर्न डीएसपी सुन्दर तिवारीको नेतृत्वमा पाँच सदस्यीय अनुसन्धान टोलीसमेत बनाएको छ । सीआईबीको प्रारम्भिक अनुसन्धानबाट नेपाल टी–२० लिगको व्यापारिक तथा रणनीतिक साझेदारीसहित सञ्चालन अधिकार पाएको भारतीय कम्पनी सेभेन थ्री स्पोर्ट्समार्फत नै स्पट फिक्सिङ भएको आशंका सीआईबीको छ ।

सेभेन थ्री स्पोर्ट्ससँगकै साझेदारीमा क्यानले नेपाल टी–२० लिग सुरु गरेको हो । ९ पुसदेखि सञ्चालनमा रहेको प्रतियोगितामा देखिएका अस्वाभाविक नतिजा र केही खेलाडीको अस्वाभाविक प्रदर्शनबाट म्याच फिक्सिङको आशंका गरिएको थियो ।

म्याच फिक्सिङको आशंकामा क्यानलेसमेत अनुसन्धानका लागि सीआईबीलाई लिखित पत्राचार गरेको थियो । क्यानले लिगमा हुनसक्ने फिक्सिङको आशंकामा सीआईबीको अनुसन्धान टोलीलाई सुरुदेखि नै खेलाडीसँग याक एन्ड यतीमा राखेको थियो ।

१९ पुसमा गृहमन्त्री रवि लामिछानेलेसमेत अनुसन्धानका लागि निर्देशन दिएका थिए । गृहमन्त्रीको निर्देशनपछि सीआईबीले थप अनुसन्धान अघि बढाएको हो ।

यसअघि समेत सीआईबीले यूएई र नेपालको खेलमा त्रिवि खेल मैदानबाट ५० जना भारतीय नागरिकलाई बेटिङ गरेको आशंका पक्राउ गरेको थियो । जसमध्ये ३१ जनालाई प्रहरीले मुद्दा चलाएको थियो । टी–२० लिगमा ६ टिमका ९० जना खेलाडी सहभागी छन् । जसमा ३४ जना विदेशी खेलाडी समावेश छन् ।

प्रकाशित मिति: बुधबार, पुस २७, २०७९ १६:०८