अन्जनदेखि अनन्तसम्म भित्र्याएको चर्च ब्वाइजको शीर्ष ६ मा पर्ने लक्ष्य

A+ A A-

२०७६ मा मनाङ मर्स्याङ्दी क्लबको दबदबा तोड्दै त्यही क्लबका कप्तानसहित सात खेलाडीलाई मछिन्द्र क्लबले अनुबन्धित मात्रै गरेन आफ्नो उदय गरायो । अहिले त्यस्तै, शैलीमा देखिएको छ, चर्च ब्वाइज क्लब ।

त्यसअघि लगातार दुई सिजन ए डिभिजन लिग च्याम्पियन बनेको मनाङले आफ्नै कारण खेलाडीलाई टिकाई राख्न सकेन । हुन पनि खेलाडीले पारिश्रमिक नपाएपछि त्यसको विकल्प रोज्नु स्वभाविकै हो । विराज महर्जन, सुजल श्रेष्ठ, विशाल श्रेष्ठ, विशाल राई, हेमन गुरुङ, अभिषेक रिजाल र देवेन्द्र तामाङलाई मनाङबाट एकसाथ मछिन्द्र क्लबमा अनुबन्धित गराइएको थियो । त्यसको परिणाम स्वरुप मछिन्द्र लागतार दुई सिजन ए डिभिजन लिग च्याम्पियन बन्यो । आफ्ना राम्रा खेलाडी गुमाएको मनाङको त्यही बेलाबाट पतन सुरू भयो ।

यस्तै कथा बोकेर शहीद स्मारक ए डिभिजन लिग खेल्दैछ, नव प्रवेशी टिम चर्च ब्वाइज युनाइटेड फुटबल क्लब । फागुन १९ गतेदेखि सुरू हुने ए डिभिजन लिग खेल्न लागेको नयाँ टिम हो, चर्च ब्वाइज ।

आफ्नो गोरेटो बनाउने दौडमा रहेको चर्च ब्वाइज डेब्यू लिगमै दमदार प्रदर्शन गर्ने लक्ष्यमा छ । त्यसैका लागि चर्च ब्वाइजले राष्ट्रिय फुटबल टिममा उत्कृष्ट प्रदर्शन गरिरहेका चार जना खेलाडीलाई आफ्नो क्लबमा अनुबन्धित गरिसकेको छ । अन्जन बिष्ट, अनन्त तामाङ, तेज तामाङ, दिनेश राजवंशी, एरिक बिष्ट र आशिष चौधरी र प्रशान्त लिम्बूलाई ए डिभिजन लिगका लागि चर्च ब्वाइज क्लबले अनुबन्धित गरेको छ । अन्जनले एक वर्षको सम्झौता गरेका छन् भने, अनन्त, तेज र दिनेशले सात महिनाको सम्झौता क्लबसँग गरेका छन् ।

क्लबका अध्यक्ष टंकलाल राईले डेब्यू प्रतियोगितामै राम्रो प्रदर्शन गर्नका लागि राम्रो टिम बनाइरहेको बताए । उनले भने, ‘क्लबमै भएका र अनुबन्धित भएका नयाँ गरी अहिलेसम्म १५ जना खेलाडीसँग सम्झौता गरिसकेका छौँ । अब विदेशी खेलाडी ल्याउने तयारीमा छौँ । तर यही खेलाडी ल्याउने भनेर टुंगो लागेको छैन । सुरुमा ट्रायल हेर्छौं । लिग धान्न सक्छ सक्दैन त्यसपछि हामी टुंगो लगाउने छौँ ।’

Church Boys United 21673353503.jpg

नियमित लिग नहुँदा र नेपाली फुटबल व्यवसायिक नबन्दा राम्रा खेलाडीहरू नेपाल छोडेर विदेसीएका छन् । जसले गर्दा ए डिभिजन क्लबहरूले राम्रा खेलाडी पाउनै मुश्किल भएको छ । सन्तोष तामाङ, सुमन लामा, आशिष लामा, दर्शन गुरुङ, अभिषेक रिजाल, सुमन अर्याल, हेमन्त थापा मगर, विमल राना, राजेन्द्र रावल, दिलेन लोक्ताम लिग नभएकै कारण बाहिरिए । यति मात्रै होइन, एन्फा पदाधिकारीको द्वन्द्वमा पिल्सिएका अमिर श्रेष्ठ, शिव गुरुङ, नविन गुरुङ, निरज बस्नेत, मिक्चेन तामाङ, रोहित कार्की, राजन गुरुङ, सूर्य अधिकारी, प्रविन सैंजु, सन्जोक राई, रोशन खड्का, गानदिप खड्का र विवेक बस्नेत, जगजित श्रेष्ठ, एलन न्यौपाने, विमल बस्नेत र हेमन गुरुङ फुटबल छोडेर बाहिरिए ।

राम्रा खेलाडीहरू विदेसीएपछि ए डिभिजन लिग सुरु हुनै लाग्दा क्लबहरूले त्यहि अनुसारको खेलाडी पाइरहेका छैनन् । त्यसको मुख्य असर चर्च ब्वाइज जस्तो उदयीमान क्लबहरूलाई परेको छ ।

चर्च ब्वाइजको यात्रा

चर्च ब्वाइज युनाइटेड फुटबल क्लब २०६६ सालमा राष्ट्रिय खेलकुद परिषद्‌मा दर्ता भयो । त्यसपछि आधिकारिक रूपमा चर्च ब्वाइजले फुटबल यात्रा सुरू गरेको हाेे । सी डिभिजन छनोटदेखि ए डिभिजन प्रवेशसम्मको यात्रालाई हेर्ने हो भने चर्च ब्वाइजले छोटो समयमै राम्रो उपलब्धि पाएको छ ।

अध्यक्ष राई भन्छन्, ‘हाम्रो लगातार परिश्रमपछि यहाँसम्मको यात्रा पार गर्न सकेका छौँ । १३ वर्षको प्रायासले हामी ए डिभिजन लिगमा उक्लिएका हौँ ।’

त्यसो त चर्च ब्वाइजले पाँचपटक सी डिभिजनको छनोट खेल्दा मात्रै सफलता मिलेको थियो । २०१८–०१९ को संस्करणमा सी डिभिजनमा बढुवा भएको चर्च ब्वाइज २०२१ मै सी डिभिजन च्याम्पियन बन्यो । त्यसपछि २०२१–०२२ को बी डिभिजन लिग च्याम्पियन भएसँगै चर्च ब्वाइज ए डिभिजन लिगमा उक्लियो ।

324499971_1558386494586710_2187156017254451995_n1673415951.jpg

नजर शीर्ष ६ मा

पहिलोपटक ए डिभिजन लिग खेल्न लागेको चर्च ब्वाइजले सुरूमै सबैको ध्यान तानेको छ । अनन्त तामाङ जस्तो नेपालकै नम्बर एक डिफेन्डर र अन्जन विष्ट जस्तो उत्कृष्ट फरवार्ड लगायतका खेलाडी अनुबन्धित गरेपछि चर्च ब्वाइज राम्रो प्रदर्शन गर्छ भन्ने कुरामा दुई मत रहेन ।

केही दिनअघि मात्रै सम्पन्न आहा रारा गोल्डकप खेलेर फर्किएको चर्च ब्वाइज केही दिनमै ए डिभिजन लिगको तयारीमा जुट्दै छ । ‘हामी केही दिनअघि मात्रै आहा रारा गोल्डकप खेलेर फर्किएका छौँ । खेलाडीलाई केही दिन विश्राम दिएका छौँ । अब सबै खेलाडी काठमाडौं आइसकेपछि केही दिनमै तयारी थाल्छौँ’, अध्यक्ष राई भन्छन् ।

बी डिभिजन लिग च्याम्पियन बनाएका खेलाडी र ए डिभिजन लिग खेलिरहेका अनुभवि खेलाडीको समिश्रणमा राम्रो नतिजा निकाल्ने चर्च ब्वाइजको लक्ष्य छ । त्यसो त, विदेशी खेलाडीको आगमनले पनि चर्च ब्वाइज टिमलाई बलियो बनाउने छ ।

अध्यक्ष राई भन्छन्, ‘हाम्रो लक्ष्य भनेको सके उपाधि नसके शीर्ष ६ भित्र पर्ने हो । डेब्यू लिगमै राम्रो गर्ने लक्ष्यमा छौँ ।’

church boys club 11673353526.jpg

अखिल नेपाल फुटबल संघ (एन्फा) ले ए डिभिजन लिग खेल्ने प्रत्येक टिमलाई ३२ लाख ५० हजार रुपैयाँ दिँदैछ । पूर्व तयारीबापत १५ लाख उपलब्ध गराउने एन्फाले जनाएकाे छ । लिगको बीचमा आधा रकम उलब्ध गराउने र लिग सकिएको सात दिनमा बाँकी रकम उपलब्ध गराउने एन्फा र क्लबबीचमा सहमति भएको छ।

योपटक लिग डबल राउण्ड रोविनको आधारमा हुनेछ । यसअघि एन्फाले ए डिभिजन लिग पुस २८ गतेबाट गर्ने निर्णय गरेको थियो । तर क्लबले तयारी खर्च नपाएको भन्दै लिग नखेल्ने भन्दै आएका थिए । एन्फा र क्लबबीच सहमति भएपछि फागुनको १९ देखि लिग सुरू गर्ने भएको हो ।

प्रकाशित मिति: मंगलबार, पुस २६, २०७९ १९:०५