टी-२० लिग क्रिकेटको ‘स्पट फिक्सिङमा’ कीर्तिमानी खेलाडी मेहबुब आलमको भूमिका शंकास्पद

टी-२० लिग क्रिकेटको ‘स्पट फिक्सिङमा’ कीर्तिमानी खेलाडी मेहबुब आलमको भूमिका शंकास्पद

A+ A A-

प्रहरीको केन्द्रीय अनुसन्धान ब्युरो (सीआईबी) ले टी-२० लिग क्रिकेटमा भएको स्पट फिक्सिङबारेको अनुसन्धानलाई तीव्रता दिएको छ । स्पट फिक्सिङमा केही नेपाली खेलाडी र केही विदेशी खेलाडीको भूमिका शंकास्पद देखिएको सीआईबीका प्रवक्ता एसपी सञ्जय थापाले बताए ।

‘हामीले क्रिकेटमा भएको फिक्सिङबारे अनुसन्धान समिति नै बनाएर अनुसन्धान थालेका छौँ । प्रारम्भीक अनुसन्धानबाट पूरै म्याच फिक्सिन भएको नदेखिए पनि स्पट फिक्सिङ भएको देखिन्छ । थप अनुसन्धान गर्दैछौँ,’ एसपी थापाले भने ।

सीआईबी स्रोतका अनुसार स्पट फिक्सिङमा केही पुराना र केही अहिले खेलिरहेका खेलाडीकाे प्रभाव परेकाे देखिएकाे छ । ‘अहिले खेलिरहेका केही खेलाडीलाई पूर्वखेलाडीहरूले प्रभावमा पारेर स्पट फिक्सिङ गरेको जस्तो देखिन्छ । जसमध्ये एक जना राष्ट्रिय टिमका पूर्वखेलाडी मेहबुब आलमको भूमिकासमेत शंकास्पद देखिन्छ,’ स्रोतले भन्यो ।

आलम नेपाली टिमका पूर्व अल राउन्डर खेलाडी हुन् । उनी बायाँ हाते ब्याट्सम्यान र तीव्र गतिका बलर हुन् । उनले नेपाल राष्ट्रिय क्रिकेट टोलीको प्रतिनिधित्व सन् २००८ को आईसीसी वर्ल्ड क्रिकेट लिग डिभिजन फाइभको एक खेलमा मोजाम्बिक राष्ट्रिय क्रिकेट टोलीका १० वटै खेलाडीलाई आउट गरेका थिए । सो खेलमा दशवटै विकेट लिने कीर्तिमानका लागि उनलाई गिनिज वर्ल्ड रेकर्डस्‌ले आफ्नो सूचीमा सूचीकृत गरेको थियो ।

उनीबाहेक केही पूर्व खेलाडीमाथि समेत अनुसन्धान भइरहेको सीआईबी स्रोतको भनाइ छ । सीआईबीले क्यानका अध्यक्ष चतुरबहादुर चन्दसँगसमेत सोधपुछ गरेको छ । त्यस्तै, हाल लिगका विभिन्न टिममा रहेका ९ जना नेपाली र केही विदेशी खेलाडीलाई सोधपुछ गरिएको छ ।

सीआईबीको प्रारम्भीक अनुसन्धानबाट नेपाल टी-२० लिगको व्यापारिक तथा रणनीतिक साझेदारीसहित सञ्चालन अधिकार पाएको भारतीय कम्पनी सेभेन थ्री स्पोर्ट्समार्फत नै स्पट फिक्सिङ भएको आशंका सीआईबीको छ । सेभेन थ्री स्पोर्ट्ससँगकै साझेदारीमा क्यानले नेपाल टी-२० लिग सुरु गरेको हो । ९ पुसदेखि सञ्चालनमा रहेको प्रतियोगितामा देखिएका अस्वाभाविक नतिजा र केही खेलाडीको अस्वाभाविक प्रदर्शनबाट म्याच फिक्सिङको आशंका गरिएको थियो ।

म्याच फिक्सिङको आशंकामा क्यानले समेत अनुसन्धानका लागि सीआईबीलाई लिखित पत्राचार गरेको थियो । क्यानले लिगमा हुनसक्ने फिक्सिङको आशंकमा सीआईबीको अनुसन्धान टोलीलाई सुरुदेखि नै खेलाडीसँग याक एन्ड यतीमा राखेको थियो ।

बुधबार लिगको फाइनल खेल लुम्बिनी र विराटनगरबीच हुँदैछ । १९ पुसमा गृहमन्त्री रवि लामिछानेले समेत अनुसन्धानका लागि निर्देशन दिएका थिए । गृहमन्त्रीको निर्देशनपछि सीआईबीले थप अनुसन्धान अघि बढाएको हो । स्पट फिक्सिङका अनुसन्धान गर्न सीआईबीले डीएसपी सुन्दर तिवारीको नेतृत्वमा पाँच सदस्यीय टोलीसमेत बनाएको छ ।

यसअघि समेत सीआईबीले यूएई र नेपालको खेलमा त्रिवि खेल मैदानबाट ५० जना भारतीय नागरिकलाई बेटिङ गरेको आशंका पक्राउ गरेको थियो । जसमध्ये ३१ जनालाई प्रहरीले मुद्दा चलाएको थियो । टी-२० लिगमा ६ टिमका ९० जना खेलाडी सहभागी छन् । जसमा ३४ जना विदेशी खेलाडी समावेश छन् ।

प्रकाशित मिति: मंगलबार, पुस २६, २०७९ १८:०३