कांग्रेससँगकाे गठबन्धन टुट्दा मुख्यमन्त्रीकाे कुर्सीमा जम्मकट्टेल, प्रदेश झरेपछि निरन्तर सत्तामा

कांग्रेससँगकाे गठबन्धन टुट्दा मुख्यमन्त्रीकाे कुर्सीमा जम्मकट्टेल, प्रदेश झरेपछि निरन्तर सत्तामा

A+ A A-

धादिङबाट बागमती प्रदेशसभा निर्वाचनमा विजयी भएका नेकपा माओवादी केन्द्रका नेता शालिकराम जम्मकट्टेल दाेस्राे प्रयासमा मुख्यमन्त्री बनेका छन् । प्रदेशसभाकाे पहिलाे कार्यकालमा दुईपटक मन्त्री बनेका उनी दाेस्राे कार्यकालमा भने बागमतीकाे चाैथाे मुख्यमन्त्री बने ।

यसअघिकाे कांग्रेस नेतृत्वकाे गठबन्धन टुट्नुले नै जम्मकट्टेललाई मुख्यमन्त्रीकाे बाटाे खुलेकाे थियाे । बागमतीमा कांग्रेसले बलियाे दाबी गरेकाे थियाे । एमाले नेतृत्वकाे गठबन्धन बनेपछि भने जम्मकट्टेललाई पहिलाे चरणमै मुख्यमन्त्री हुने अवसर जुरेकाे हाे । उनी प्रदेश झरेपछि निरन्तर सत्तामा छन् । २०६४ मा राजेन्द्र पाण्डेलाई हराउँदै उनी संविधासभा सदस्य बनेका थिए । प्रदेशसभाकाे पहिलाे कार्यकालमा जम्मकट्टेल दुई पटक मन्त्री थिए ।

तत्कालीन नेकपा हुँदा डाेरमणि पाैडेल नेतृत्वकाे सरकारमा उनी तीन वर्ष आन्तरिक मामिला तथा कानुन मन्त्री भएका थिए । नेकपा फुटेपछि बागमतीमा नेकपा एमालेकाे एकल सरकारमा अष्टलक्ष्मी शाक्य मुख्यमन्त्री हुँदा जम्मकट्टेल ७२ दिन सरकार बाहिर थिए । कांग्रेससहितकाे माओवादी केन्द्र, एकीकृत समाजवादीकाे गठबन्धन बन्दा बागमतीमा राजेन्द्र पाण्डे नेतृत्वकाे सरकारमा जम्मकट्टेल १४ महिना आर्थिक मामिला तथा याेजना मन्त्री थिए ।

गठबन्धनमा भागवण्डा गरेअनुसार जम्मकट्टेल आधा कार्यकाल मुख्यमन्त्री हुनेछन् । आधा कार्यकाल भने एमाले नेतृत्वमा रहने गठबन्धनमा भागवण्डा लागेकाे छ ।

काे हुन् जम्मकट्टेल ?

नवनियुक्त मुख्यमन्त्री जम्मकट्टेल २०३० भदौ ४ मा गजुरी गाउँपालिका साविक किराञ्चोक-९ मा जन्मिएका थिए । बुवा लोकनाथ जम्मकट्टेल र आमा ओमकुमारी जम्मकट्टेलका जेठाे सन्तान उनी सानैदेखि राजनीतिमा क्रियाशील थिए । बिए र बिएलसम्मको अध्ययन गरेका जम्मकट्टेलले २०४४ मा अखिल छैठौँबाट राजनीति सुरु गरेका थिए । ०४८ मा मजदुर संगठन हुँदै ०५२ सालमा माओवादी जनयुद्धमा लागेका उनी ०५५ मा उनी धादिङ जिल्ला समिति सदस्य भएका थिए ।

उनी ०६० मा माओवादी केन्द्र निकट मजदुर संगठनको नेपाल ट्रेड युनियन महासंघको अध्यक्ष भएका थिए । २०६३ मा अन्तरिम संसदको विधायक समेत भएका उनी २०६४ मा संविधानसभा सदस्यमा धादिङ क्षेत्र नम्बर ३ बाट निर्वाचित सदस्य समेत हुन् । त्यतिबेला एमालेका प्रभावशाली नेता तथा बागमतीका निवर्तमान मुख्यमन्त्री राजेन्द्रप्रसाद पाण्डेलाई हराएर राष्ट्रिय राजनीतिमा छाएका थिए ।

२०७० मा भएको दोस्रो संविधानसभा निर्वाचनमा उनी पाण्डेसँगै पराजित भएका थिए । २०७४ को निर्वाचनमा धादिङ क्षेत्र नम्बर १(ख)बाट २३ हजार ३ सय ८२ मत ल्याइ बागमती प्रदेश सभा सदस्यमा निर्वाचित भएका थिए उनी । २०७४ फागुनमा तत्कालीन मुख्यमन्त्री डोरमणि पौडेलको नेतृत्वको सरकारमा जमकट्टेल आन्तरिक मामिला मन्त्री भएका थिए ।

०७७ पुस ५ मा पूर्वप्रधानमन्त्री केपी शर्मा ओलीले संसद् विघटन गरेपछि उनले राजीनामा दिएका थिए । ७२ दिनमात्रै सरकार बाहिर रहेका उनी प्रदेश झरेपछि निरन्तर सत्तामा पुग्ने भाग्यमानी नेतामा पर्छन् । माओवादीभित्र स्पष्ट र खरो नेताको रूपमा परिचित उनले पटक–पटक गरी चार वर्ष जेल जीवन बिताएका छन् ।

प्रकाशित मिति: सोमबार, पुस २५, २०७९ १७:१३