जागिर छाडेर व्यापार, सिरकबाट परशुरामले गर्छन् करोडकाे काराेबार (भिडियोसहित)

जागिर छाडेर व्यापार, सिरकबाट परशुरामले गर्छन् करोडकाे काराेबार (भिडियोसहित)

A+ A A-

सात वर्षअघिसम्म परशुराम दुलाल स्कुलमा पढाउँथे । उनले जीवनका थुप्रै वसन्त विद्यार्थीमाझै बिताए । पढाउने क्रममा परशुरामलाई लागिरहन्थ्याे- सैद्धान्तिक ज्ञानलाई व्यवहारमा प्रयोग गर्न सकिएन भने के काम ! समाज र देशलाई समृद्धिको बाटोमा डोर्‍याउन सैद्धान्तिक र व्यावहारिक ज्ञानबीच तालमेल हुनैपर्ने उनी ठान्थे ।

यही सोचका साथ परशुरामले हाल फाइबर सिरक उत्पादन गरिरहेका छन् । यसबारे उनको ज्ञान थियो । त्यही भएर शिक्षण पेसा छाडेर फाइबर सिरक उत्पादनमा लागेका उनको लक्ष्य देशलाई फाइबर सिरकमा आत्मनिर्भर बनाउनु छ ।

भन्छन्, ‘जागिरे जीवनबाट उद्यमी बन्न सकिन्छ भनेर मैले जसरी विद्यार्थीलाई जे ज्ञान दिन्थेँ, त्यसैलाई कसरी प्रयोगमा ल्याउने, कसरी बजार बुझ्दै जाने भन्ने सिलसिला भयो ।’ जागिर गरेर केही रकम जम्मा गरेपछि उनलाई व्यवसाय नै गर्नुपर्छ भन्ने लाग्यो ।

२०७२ सालतिरको कुरा हो । जतिबेला नेपाली बजारमा चिनियाँ र अन्य विदेशी फाइबर सिरक र फ्याब्रिकका उत्पादनहरू नेपाली बजारमा छ्याप्छ्याप्ती थियो । त्यसबेला परशुरामले सोचे कि एकल प्रयासबाट पनि देशलाई आत्मनिर्भर बनाउन याेगदान गर्न सकिन्छ । त्यही भएर त फाइबरका सिरकमा रहेको परनिर्भरता अन्त्य गर्न भन्दै उनले ‘शिवपुरी फ्याब्रिक’ स्थापना गरे, जुन उद्योगले फाइबरका सिरकसँगै फाइबर, डाउन, डाउन अल्टरनेटिभलगायत उत्पादन गर्दै आएको छ ।

उद्योगबाट दैनिक करिब २५० फाइबरका सिरक उत्पादन हुँदै आएको छ । त्यसमध्ये करिब ८० प्रतिशत उत्पादन काठमाडौंमै खपत हुने गरेको परशुराम बताउँछन् । उनका अनुसार बाँकी २० प्रतिशतजति सिरक भने अन्यन्त्र खपत हुने गरेको छ ।

‘शिवपुरी फ्यार्बिक’ उद्योगले एउटा डबल सिरक होलसेलमा ८ सय ५० रुपैयाँमा बेच्दै आएको छ । मासिक करिब एक करोड रुपैयाँकाे काराेबार हुने गरेको परशुराम बताउँछन् । उनका अनुसार जाडोयाममा अन्य याममा भन्दा फाइबर सिरकको धेरै व्यापार हुने गरेको छ ।

कच्चा पदार्थ आयात गरिने मुलुक भने चीन र भारत नै हो । परशुराम भन्छन्, ‘फाइबर सिरकमा प्रयोग हुने कच्चा पदार्थ उत्पादन गर्ने उद्योग नेपालमा नहुँदा खोजेजस्तो कच्चा पदार्थ पाइँदैन । उनलाई नेपालमै कच्चा पदार्थका उद्योग स्थापना गर्ने हो भने फाइबर सिरक उत्पादन गर्ने उद्योगहरूलाई सहज हुने लाग्छ ।