२५ वर्षे सागर, जसले २५ भन्दा बढी चर्चित म्युजिक भिडियो निर्देशन गरे

A+ A A-

गोरखाको बारपाक सुलिकोट गाउँपालिका-६, ताकुकोटमा जन्मिएका सागरबाबु भट्ट पाँच वर्षसम्मको बाल्यकाल सुलिकोटमै बित्यो । २०५८ सालको कुरा हो । जतिबेला देश माओवादी सशस्त्र द्वन्द्व उत्कर्षतर्फ उन्मुख थियो । गाउँघरमा गरिखान सहज थिएन । त्यही भएर सागरको परिवार रोजगारीको अवसर खोज्दै राजधानी काठमाडौं छिर्‍यो ।

गाउँमा दोहोरी, रोधी, झ्याउरे, चुड्का तथा देउडाजस्ता स्थानीय संगीत सुन्दै हुर्केका सागरको परिवार पनि संगीतमय थियो । बाबु ईश्वर भट्ट संगीतप्रेमी थिए । काका प्रकाश भट्टको त पेसा नै संगीत थियो । त्यसैले हुन सक्छ, सागरलाई पनि संगीतले तान्यो । उनै सागरले २०७७ मा ‘छोटो छ जिन्दगी, फोटो खिचेर राख’ म्युजिक भिडियोमार्फत निर्देशनमा डेब्यु गरे । साराङकोटको डाँडैमा, फोटो फिरिममालगायत निकै चर्चित २५ भन्दा बढी म्युजिक भिडियो निर्देशन गरिसकेका छन् उनले । यो दुई वर्षको अन्तरालमा उनले निर्देशन गरेका म्युजिक भिडियोको संख्या हो ।

सागर म्युजिक भिडियोमा डेब्यु गर्दाको प्रसङ्ग कोट्याउँदै भन्छन्, ‘यस क्षेत्रमा केही गर्नुपर्छ भनेर मलाई प्रोत्साहन गर्ने दाइ पवन सिम्खडाले भूपू पाण्डेले गीतको ‘कन्सेप्ट’ सुनाएपछि उहाँलाई मेरोबारेमा कुरा गर्नुभएछ । नयाँ भाइ छ । मिहिनेती छ । राम्रो गर्न सक्छ भनिदिनुभएछ । र त मैले निर्देशन गर्ने मौका पाएँ ।’

भूपू पाण्डे ‘छोटो छ जिन्दगी, फोटो खिचेर राख’ का गायक पनि हुन् । यसमा अभिनय उनकै छ । उनी म्युजिक भिडियोका निर्मातासमेत हुन् । उनले सागरलाई मौका दिएसँगै निर्देशकीय कौशल मात्र खर्चिएनन्, मिहिनेत र लगनका साथ काम गरे । अन्ततः ‘छोटो छ जिन्दगी, फोटो खिचेर राख’ राम्रो म्युजिक भिडियो मात्र बनेन, सागरलाई पहिले कामले नै कुशल निर्देशक स्थापित गर्‍यो । त्यसपछि उनले कामको खोजी गर्नै परेन ।

‘सराङकोटको डाँडैमा’ र ‘फोटो फिरिममा– दुई’ जस्ता चर्चित म्युजिक भिडियोले त झन् सागरलाई थप उचाइमा पुर्‍यायो । सागर भन्छन्, ‘सराङकोटको डाँडैमा’ गीत त मीठो छँदै थियो । हरिश निरौला, जसलाई ‘स्लो मोसन’ उपनाम र चरित्रले धेरैले चिनेका थिए ।’

०००

त्यसमा हामीले उहाँलाई फरक चरित्रमा प्रस्तुत गर्‍यौँ । उहाँलाई त्यसरी फरक रूप दिँदा झनै मान्छेले मन पराए, जसले गर्दा ‘सराङकोटको डाँडैमा’ लाई अझ धेरै सफलता मिल्यो । म्युजिक भिडियो एउटा कलाकै पाटो हो । त्यसले गर्दा कलाबाट मान्छेले मनोरञ्जन र सन्देश खोजिरहेका हुन्छन् । म्युजिक भिडियोले आमनागरिकका दैनिकीलाई छुन सक्नुपर्छ । उनीहरूका कथा बोल्नुपर्छ ।

त्यस्ता म्युजिक भिडियो मान्छेको मनसँग जोडिन्छन् र सफल हुन्छन् भन्ने बुझाइ २५ वर्षे सागरको छ । म्युजिक भिडियोको अबको भविष्य कस्तो देख्नुहुन्छ भन्ने प्रश्नमा सागर भन्छन्, 'पछिल्लो पुस्ताका लागि संगीत, क्यामेरा तथा निर्देशन पनि पढ्ने तथा सिक्ने राम्रो अवसर छ ।'