राष्ट्र संघको सुरक्षा परिषदमा काश्मीरको चर्चा

A+ A A-

भारतले काश्मीरलाई विशेष राज्यको दर्जा दिने धारा ३७० को खारेजगरेपछि संयुक्त राष्ट्र संघको सुरक्षा परिषदमा यसबारे अनौपचारिक छलफल भएको छ । पाकिस्तानले काश्मीरबारे सुरक्षा परिषदमा चर्चा हुनुपर्ने माग गर्दै पत्र लेखेपछि शुक्रबार बैठक बोलाइएको थियो ।

संयुक्त राष्ट्र संघका लागि भारतीय राजदूत सैयद अकबरुद्दीनले धारा ३७० हटाउने विषय भारतको आन्तरिक मुद्दा भएको बताउँदै यसमा बाहिरी मान्छेको कुनै लेनदेन नरहेको बताए । कश्मीरको आर्थिक तथा सामाजिक विकासका लागि भारत सरकारले यो कदम चालेको उनको भनाइ थियो ।

चिनियाँ राजदूत झाङ जुनले काश्मीर विवादलाई शान्तिपूर्ण तरिकाबाट समाधान गरिनुपर्ने बताए । उनले यो विषयमा एकतर्फी निर्णय लिन नहुने पनि स्पष्ट पारे । काश्मीरको अवस्था खतरापूर्ण बन्दै गएको बताउँदै चीनले संयुक्त राष्ट्र संघको प्रस्तावअन्तर्गत यो विवाद समाधान गर्नुपर्ने बताए ।

चिनियाँ राजदूतले लद्दाखको मुद्दा पनि उठाए । उनले लद्दाखबाट पनि धारा ३७० हटाइएको भन्दै आफूहरुले यसलाई चिनियाँ सम्प्रभुतामाथिको आक्रमणको रुपमा लिएको बताए ।

बैठकपछि संयुक्त राष्ट्र संघका लागि पाकिस्तानी राजदूत मलीहा लोधीले काश्मीरको मुद्दालाई आफूहरुले अन्तर्राष्ट्रियकरण गर्न सफल भएको बताइन् । संयुक्त राष्ट्र संघको सुरक्षा परिषदमा यस विषयमा चर्चा भैसकेकाले यो भारतको आन्तरिक मामिला मात्रै नभएको उनको भनाई थियो ।

भारत र पाकिस्तानका राजदूतले संयुक्त राष्ट्र संघको प्रधान कार्यालयमा पत्रकार सम्मेलन गरे पनि उनीहरु भने बैठकमा सहभागी भएका होइनन् । भारत र पाकिस्तान दुवै संयुक्त राष्ट्र संघको सुरक्षा परिषदका सदस्य होइनन् । संयुक्त राष्ट्र संघको सुरक्षा परिषदमा पाँच देश स्थायी सदस्यका रुपमा रहेका छन् । चीन, फ्रान्स, रुस, बेलायत र अमेरिका सुरक्षा परिषदका स्थायी सदस्य हुन् ।

प्रकाशित मिति: शनिबार, साउन ३२, २०७६ १६:३१