राेनाल्डाेकाे तलब महिनाकाे २ अर्ब ३४ कराेड, उनीमाथि साउदीले किन गर्दै छ यति ठूलाे लगानी ?

राेनाल्डाेकाे तलब महिनाकाे २ अर्ब ३४ कराेड, उनीमाथि साउदीले किन गर्दै छ यति ठूलाे लगानी ?

A+ A A-

कतार विश्वकपको क्वार्टर फाइनलमा मोरक्कोसँग १-० ले हारेपछि पोर्चुगल फुटबल टिमका कप्तान क्रिस्टियानो रोनाल्डो रुँदै मैदानबाट बाहिरिएको एक महिना पनि भएको छैन ।

विश्वकप जित्ने सपना चकनाचुर भएको केही सातापछि नै रोनाल्डोले युरोपेली क्लब म्यानचेस्टर युनाइटेड छोडेर साउदी अरबको ‘अल नासर’ सँग साइनो जोडेका छन् ।

अल नासर र रोनाल्डोबीच भएको करारलाई अहिलेसम्मकै महँगो मानिएकाे छ । अल नासरले सन् २०२५ सम्म हरेक वर्ष रोनाल्डोलाई करिब ७ करोड ७० लाख पाउन्ड (झन्डै २८ अर्ब) पारिश्रमिक दिने छ । नेपाली रुपैयाँमा भन्ने हाे भने, पाेर्चुगिज स्टार राेनाल्डाेले साउदी क्लबबाट अब हरेक महिना करिब २ अर्ब ३४ कराेड पारिश्रमिक पाउने छन् ।

नयाँ क्लबसँग जोडिएपछि रोनाल्डोले भनेका छन्, ‘युरोपमा धेरै रेकर्ड बनाइसकेको छु, अब साउदी अरबमा रहेर केही रेकर्ड बनाउन चाहन्छु ।’

गएको विश्वकप रोनाल्डोका लागि सुखद् रहेन । अन्तिम दुई खेलमा उनलाई सुरुदेखि नै मैदानबाहिर राखियो । उनले म्यानचेस्टर युनाइटेडको यस सिजनमा पनि कुल १६ म्याचमा जम्माजम्मी ३ गोल गर्न सके । यीमध्ये पनि २ गोल पेनाल्टीमार्फत गरेका थिए ।

यसका बाबजुद रोनाल्डो अल नासरसँग जोडिनुले मध्यपूर्वी देशमा निकै उत्साह छाएकाे छ । अल नासर क्लबले पनि टिमको जर्सीमा रोनाल्डोको तस्वीर सामाजिक सञ्जालमा शेयर गर्दै हर्ष प्रकट गरेकाे छ ।

यद्यपि, ३७ वर्षे रोनाल्डोसँग अल नासरले गरेको यति महँगो करारलाई कतिपयले साउदी अरबका क्राउन प्रिन्स मोहम्मद बिन सलमानको सुधारवादी नीतिसँग पनि जोडिरहेका छन्, जसको लक्ष्य पश्चिमी देशलाई पछाडि पारेर साउदी अरबलाई वैश्विक शक्तिका रूपमा स्थापित गर्नु हो ।

कतार विश्वकपमा साउदी अरबको फुटबल टिमले २२ नोभेम्बरमा भएको सुरुवाती म्याचमा अर्जेन्टिनालाई २-१ ले हराएको थियो ।

सबैले म्याच हेरुन् भनेर त्यो दिन साउदीका मन्त्रालय, सरकारी एजेन्सी, विद्यालय र विश्वविद्यालयमा समयभन्दा पहिल्यै छुट्टी दिइएको थियो । साउदी अरबको जितपछि राजा सलमानले भोलिपल्ट राष्ट्रिय बिदाको घोषणा गरेका थिए ।

त्याे जितले साउदीमा मात्रै होइन, पूरै यो क्षेत्रमा उत्साह भरेको थियो । सामाजिक सञ्जालमा अन्य अरबी देशका मानिसले पनि साउदीको जितलाई आफ्नै जित जसरी मनाएका थिए ।

यो जित कुनै संयोग थिएन । साउदी अरबका खेलमन्त्री प्रिन्स अब्दुलालजिज बिन तुर्की अल फैजलका अनुसार उनको टिमले तीन वर्षदेखि विश्वकपको तयारी गरिरहेको थियो । खेल मन्त्राययले फुटबललाई यसरी बढावा दिनुले उसको दिशा र लक्ष्यतिर इशारा गर्छ ।

क्राउन प्रिन्स मोहम्मद बिन सलमान कतार विश्व कपका क्रममा कतिपटक फिफाका प्रमुख जी वी इनफेन्तिनोसँग देखिए । खेललाई सन् २०१६ मा मोहम्मद बिन सलमानको ‘भिजन २०३०’ अन्तर्गतका प्राथमिकतामा राखिएको छ । यसपछि नै साउदी अरबको खेल जगतमा ठूलो परिवर्तन देखिँदै छ ।

भिजन २०३० अन्तर्गत तीन लक्ष्य राखिएको छ । खेलमा मानिसहरूको सहभागीता २०३० सम्म ४० प्रतिशतसम्म बढाउनु, विदेशमा साउदीका खेलाडीहरूकाे प्रदर्शनलाई सुधार्नु र खेल अर्थव्यवस्थालाई बढावा दिनु ।

फुटबलबारे जानकार पत्रकार उरी लेभीले मोहम्मद बिन सलमानको एक भिडियो ट्वीट गरेका छन् । उनले भनेका छन्, 'रोनाल्डो साउदी अरब पुग्नु ठूलै परिवर्तनको संकेत हो ।'

भिडियोमा साउदी क्राउन प्रिन्सले भनिरहेका छन्, 'मध्य पूर्व अब नयाँ युरोप बन्ने छ । अबको पाँच वर्षमा साउदी अरब बिल्कुल अगल हुने छ । उत्कृष्ट एकदम फरक हुने छ । कुवेत..यहाँ सम्म कि कतार पनि.. उनीहरूसँग हाम्रो मतभेदका बाबजुद..ती एक मजबुद अर्थव्यवस्था हुन् र अबको पाँच वर्षमा बिल्कुल अलग हुनेछन् । यूएई, ओमान, लेबनान, जोर्डन, इजिप्ट, इराक र यहाँ जुन अवसर छ.. यदि आगामी पाँच वर्षमा हामी सफल भयौँ भने धेरै देशले हाम्रो पदचिन्हलाई पछ्याउने छन् । आउँदो ३० वर्षमा नयाँ वैश्विक पुनर्जागरण मिडिल ईस्टमा हुने छ । यो साउदीको युद्ध हो । यो मेरो युद्ध हो र जसम्म म मिडिल ईस्टले संसारको अगुवाई गरेको देख्दिनँ, तबसम्म यो युद्धमा म मर्न चाहन्नँ । मलाई लाग्छ, यो लक्ष्य १०० प्रतिशत हासिल हुने छ ।’

अक्सफोर्ड विश्वविद्यालयबाट पढाइपछि भूराजनीतिक विषयमा टिप्पणी गर्दै आएका गोकुल साहनीले पनि एमबीएसको यही भिडियो शेयर गर्दै लेखेका छन्, 'शायद अब साउदी अरब धर्मलाई अगाडि राख्ने प्राथमिकतालाई छोडेर एक मानक र अधिक व्यावहारिक शक्तिको रूपमा उदाउन चाहन्छ ।'

रोनाल्डो लगेर साउदीलाई के फाइदा हुन्छ ?

तस्वीर साैजन्यः अल नासर क्लब ।

क्रिस्टियानो रोनाल्डोको हस्ताक्षरपछि अल नासरले ट्वीट गर्‍यो, 'इतिहास बन्दै छ । यो सम्झौताले हाम्रो क्लबलाई ठूलो सफलता हासिल गर्न प्रेरित त गर्छ नै, हाम्रो लिग, हाम्रो देश र आगामी पुस्तालाई, केटा र केटीहरूलाई उत्कृष्ट प्रदर्शनका लागि प्रोत्साहित पनि गर्ने छ ।’

रोनाल्डोले सम्झौताको घोषणा गर्दै भने, ‘म एक अलग देशमा नयाँ फुटबल लिगको अनुभव पाउनका लागि उत्साहित छु ।’

अल नासर जुन भिजनका साथ काम गरिरहेको छ, पुरुष तथा महिला फुटबलका लागि जसरी साउदीमा विकसित भइरहेको छ, त्यो प्रेरणादायक छ । हामीले विश्वकपमा साउदी अरबले हालै गरेको प्रदर्शन देखिसकेका छौँ । फुटबलका लागि यो निकै क्षमतावान देश हो ।

कुनै शंका छैन, सम्झौताले रोनाल्डोलाई इतिहासमै सबैभन्दा धेरै पारिश्रमिक पाउने फुटबलर बनाइदिएको छ तर उनको स्टारडमको फाइदा साउदी अरबलाई पनि मिल्न सक्छ ।

मिडिल ईस्ट इकोनोमी नामको वेबसाइट लेख्छ, 'रोनाल्डोले साउदी अरबको २०३० फिफा विश्वकपको आयोजना हासिल गर्ने प्रयासलाई बल दिन सक्छन् । जसरी रोनाल्डो आउँदै गर्दा मिडियाहरू पूर्णतः साउदी फुटबलतिर केन्द्रित भएका छन् ।'

वेबसाइटले साउदीका पर्यटनमन्त्री अहमद अल-खतीबलाई उद्धृत गर्दै लेखेको छ, 'साउदी अरबले फिफा विश्व कप २०३० का लागि इजिप्ट र ग्रीससँग संयुक्त आयोजनाको प्रस्ताव दिन सक्छ ।'

अहमद अल-खतीबले एक अन्तर्वार्तामा भनेका छन्, ‘हामी इजिप्ट र ग्रीससँग मिलेर प्रस्ताव दिनेबारे सोचिरहेका छौँ । हामीलाई सफल हुने आशा छ । तीन देशले आधारभूत रूपमा ठूलै लगानी गर्नेछौँ । मलाई के थाहा छ भने, त्यतिबेलासम्म साउदी अरबमा विशेष रंगशाला बनिसकेको हुने छ ।'

साउदी अरबले यसअघि बर्सेनि हुने फर्मुला १ रेस र एसियन विन्टर गेम्स २०२९ सहित अन्य अन्तर्राष्ट्रिय खेल प्रतियोगिताको आयोजना गर्ने अवसर पाइसकेको छ ।

अल नासर क्लबको इतिहास

रोनाल्डोले नाता जोडेको अल नासर क्लबको स्थापना साउदी अरबको राजधानी रियादमा सन् १९५५ मा भएको थियो । यो क्लब देशको सदी प्रोफेसनल लिग (एसपीएल) मा खेल्छ, जसमा कुल १८ टिम छन् ।

लिगमा सबैभन्दा बढी गोल गर्ने माजिद अब्दुल्लाहले पनि अल नासरका लागि खेल्दै हरेक म्याचमा एकको औसतले कुल १ सय ८९ गोल गरेका छन् । अल नासर एसपीएलको दोस्रो ठूलो सफल टिम हो, जसले अहिलेसम्म ९ पल्ट उपाधि जितेको छ । अन्तिमपल्ट अल नासरले सन् २०१८-१९ मा यो उपाधि हात पारेको थियो । अल हिलाल क्लब नै सबैभन्दा बढी उपाधि जित्नेमा अल नासरभन्दा अगाडि छ ।

अल नासरका वर्तमान कोच रुडी गार्सिया हुन् । क्लबमा क्यामरुनका वर्ल्डकप हिरो विनसेन्ट अबुबकर र ब्राजिलका मिडिफिल्डर रहिसकेका लुइज गस्ताभो पनि छन् ।

गोल डटकमको खबरअनुसार, दिवंगत साउदी प्रिन्स अब्दुल रहमान बिन साउद अल साउदले सन् १९६० मा क्लबको कमाण्ड सम्हालेका थिए । उनले अल नासरलाई देशकै सर्वश्रेष्ठ क्लब बनाउनमा महत्त्वपूर्ण भूमिका खेलेका थिए ।

सन् २००४ मा उनको निधनपछि पनि क्लबलाई साउदीको शाही परिवारबाट वित्तीय सहायता मिलेको थियो । त्यसैले क्लबले ठूला खेलाडीहरूलाई भित्र्याउन सकेको हो ।

क्रिस्टियानो रोनाल्डोले अल नासरसँग सन् २०२५ सम्मका लागि सम्झौता गरेका छन् । अल नासर क्लबले यसका लागि रोनाल्डोलाई हरेक वर्ष करिब १ सय ७७ मिलियन पाउण्ड अर्थात करिब १७ करोड ७० लाख पाउन्ड पारिश्रमिक भुक्तान गर्ने छ ।

गएको वर्ष साउदीको अर्को टिम अल-हिलालले पनि रोनाल्डोलाई अफर दिएको थियो । तर त्यो बेला रोनाल्डोले यो प्रस्ताव अस्वीकार गर्दै भनेका थिए, उनी म्यानचेस्टर युनाइटेडमै खुसी छन् ।

यद्यपि, म्यानचेस्टर युनाइटेडसँग कुरा बिग्रिएपछि गत वर्ष रोनाल्डोले एक अन्तर्वार्ताका क्रममा क्लबका म्यानेजर एरिक टेनप्रति असन्तुष्टि पोखेका थिए । त्यसपछि म्यानचेस्टर युनाइटेडले उनलाई स्वतन्त्र छोडिदिएको थियो ।

प्रकाशित मिति: शनिबार, पुस २३, २०७९ ०६:३२