कांग्रेस महाधिबेशन प्रतिनिधिलाई विधान विपरित प्रशिक्षण

A+ A A-

नेपाली कांग्रेसको विधानको दफा ३६ को प्रावधानविपरित गठन भएको केन्द्रीय नीति, अनुसन्धान तथा प्रशिक्षण प्रतिष्ठानले शुक्रबारदेखि महाधिवेशन प्रतिनिधिलाई प्रशिक्षण दिन थालेको छ ।

२२ असारदेखि १४ वटा एजेण्डामा छलफल गरिरहेको पार्टी केन्द्रीय कार्यसमितिको बैठकलाई दुई सातासम्म स्थगित गरेर सभापति शेरबहादुर देउवा प्रतिष्ठानले आयोजना गरेको प्रशिक्षण प्रतिष्ठानमा सहभागी भएका छन् ।

प्रतिष्ठानको प्रमुखको हैसियतले उपसभापति निधिले निधिले २९ चैत २०७५ मा ३८ र त्यपछि ८ जना महाधिवेशन प्रतिनिधिलाई प्रतिष्ठानको सदस्यमा मनोनित गरेका थिए ।

केन्द्रीय कार्यसमितिको बैठकमा पेश भएका १४ एजेण्डामध्ये संक्रमणकालीन अवस्थामा संगठनको अन्तरिम व्यवस्था गर्ने कार्यविधि निर्माण गरी पास गर्ने वाहेक कुनै पनि एजेण्डामा निर्णय हुन सकेको छैन ।

पार्टी महामन्त्री डा. शशांक कोइराला पारिवारिक भ्रमणको क्रममा बैंककमा रहेको र प्रवक्ता विश्वप्रकाश शर्मा विदेश भएको मौकामा प्रतिष्ठानका प्रमुख उपसभपाति निधिले शुक्रबारदेखि दुई दिनको लागि भन्दै गण्डकी प्रदेशका महाधिवेशन प्रतिनिधिलाई पोखरामा प्रशिक्षण आयोजना गरेको छ ।

पार्टीको अघिल्लो विधान कार्यान्वयन हुँदै एक बर्षअघि निधिले बरिष्ठ पत्रकार पुरुषोत्तम दाहाललाई प्रतिष्ठानको सदस्य सचिवमा मनोनित गरेका थिए । प्रतिष्ठानको सदस्यमा थप ८ जनालाई निधिले मनोनित गरिसकेका छन् ।

पार्टीको विधानको दफा ३६ को उपदफा १ को ‘ग’ अनुसार ३८ महाधिवेशन प्रतिनिधिको मनोनयन गरिएको दाबी गरिएको छ । तर, सो दफामा प्रतिष्ठानको प्रमुखले सभापतिसँगको परामर्शमा प्रदेश कार्य समितिका सभपातिले तोकेका प्रदेश उपसभापति नियुक्त गर्नुपर्ने व्यस्था गरेको छ ।

पार्टीले विधान अनुसार कुनै पनि प्रदेश कार्य समिति गठन गरेको छैन । सात प्रदेशबाट प्रतिनिधित्व गर्ने उपसभापति को हो भन्ने स्पस्ट नहुँदै प्रमुख निधिले ५० सदस्यलाई प्रतिष्ठानको सदस्यमा नियुक्त गरिसकेका छन् ।

विधानमा ५१ सदस्यीय प्रतिष्ठान गठन गर्न सक्ने व्यवस्था छ । तर निधिले अब ७ प्रदेशका ७ उपसभापतिलाई सदस्यमा चयन गर्ने सख्या नै पुग्दैन । प्रशिक्षण प्रतिष्ठानले जिल्लाहरुमा समेत प्रशिक्षण कार्यक्रम आयोजना गर्दा सम्वन्धित जिल्ला कार्यसमितिसँग सल्लाह नगरी कार्यक्रम राखेको भन्दै आलोचना हुँदै आएको छ ।

निधिले कोपनहेगनमा जनसम्पर्क समितिका महाधिवेशन प्रतिनिधिको लागि आयोजना गरेको प्रशिक्षण प्रतिष्ठानको वरिष्ठ नेता रामचन्द्र पौडेलले समेत आलोचना गरिसकेका छन् ।

केन्द्रीय कार्यसमिति बैठकमा नेता डा. मिनेन्द्र रिजालले समेत प्रतिष्ठानले जिल्लासँग समन्वय नगरी जथाभावी प्रशिक्षणको नाममा कार्यक्रम आयोजना गरिएको भन्दै आलोचना गरेका थिए ।

विधानको दफा ३६ को उपदफा १ ‘च’ ले प्रदेश तथा जिल्लामा तोकिए बमोजिमको कार्य संचालन गर्नुपर्ने भनेको छ भने सोही उपदफाको ‘छ’ मा प्रतिष्ठानको कार्यक्षेत्र, कार्ययोजना, सचिवालयसम्वन्धी अन्य व्यवस्था तोकिए बमोजिम हुने भनिएको छ ।

प्रतिष्ठानले जिल्ला र प्रदेशमा के के कार्यक्रम गर्ने भनेर निर्देशिका तयार गरिसकेको छैन भने भने सचिवालयसम्वन्धी कामको अनुमोदन केन्द्रीय कार्यसमिति बैठकमा समेत पेश भएको छैन ।

प्रतिष्ठानको ४ साउनमा बसेको बैठकले ७ प्रदेशका १२ स्थानमा १६ साउनदेखि महाधिवेशन प्रतिनिधिलाई प्रशिक्षण दिने निर्णय गरेको थियो । प्रतिष्ठानले यसअघि डेनमार्कको कोपनहेगनमा समेत असारमा यस्तै प्रशिक्षणको आयोजना गरेको थियो ।

३१ साउन देखि ६ भदौसम्म पहिलो चरणमा ३ वटा प्रदेशमा प्रशिक्षण कार्यक्रम संचालन गर्ने निर्णय बमोजिम शुक्रबार र शनिबार पोखरामा गण्डकी प्रदेशका, २ र ३ भदौमा भैरहवामा पाँच नम्वर प्रदेशका ५ र ६ भदौमा वीरेन्द्रनगरमा कर्णाली प्रदेशस्तरीय प्रशिक्षण संचालन गर्ने निर्णय गरिसकेको छ ।

प्रशिक्षणमा कांग्रेसको सांगठनिक संरचना, विधान र विशेषता, राजनीतिक, आर्थिक प्रस्ताव दृष्टिकोण, नेपाल कम्युनिष्ट पार्टीको सरकारको मूल्यांकन तथा जनतसँग सम्पर्क र संवाद जस्ता विषयहरु राखिएका छन् ।

प्रशिक्षणमा सहभागीहरु सबैले यातायात तथा आवासको व्यवस्था आफैले गर्नुपर्ने निर्देशन दिइएको छ । केन्द्रीय कार्यसमितिको बैठक स्थगित गर्न लगाएर प्रतिष्ठानका प्रमुख निधिले सभापति शेरबहादुर देउवालाई समेत प्रभावमा पारेको भन्दै उनको निवासमा समेत आलोचना हुन थालेको छ ।

प्रकाशित मिति: शनिबार, साउन ३२, २०७६ ०५:४५