बिदेशीलाई नागरिकता दिएको अभियोगमा महानगरपालिकाका वडाध्यक्ष पक्राउ

A+ A A-

तिब्बतीयन शरणार्थीलाई नेपाली नागरिकता दिलाउन भूमिका खेलेको आरोपमा पोखरा महानगरपालिकाका–१८ का वडाअध्यक्ष सहित ३ जना पक्राउ परेका छन् । उनीहरुलाई जिल्ला प्रहरी कार्यालय कास्कीले पक्राउ गरेको हो ।

तिब्बती शरणार्थीलाई नेपाली नागरिकता बनाउन सहयोग र सिफारिस गरेको आरोपमा उनीहरुलाई आज प्रहरीले पक्राउ गरेको हो । अध्यक्ष थापासहित वडा सदस्य ज्ञानबहादुर थापा र स्थानीय पञ्जिकाधिकारी राजेन्द्र पौडेललाई पक्राउ गरिएको जिल्ला प्रहरी कार्यालय कास्कीका प्रवक्ता एवं डिएसपी राजकुमार केसीले जानकारी दिए ।

वडाध्यक्षले नागरिकताका लागि वडाबाट अन्तिम सिफारिस गरेका थिए भने वडासदस्य र पञ्जिकाधिकारीले नागरिकता सिफारिस गर्नमा सहयोगी भूमिका खेलेको प्रहरीको भनाइ छ ।

घटनामा संलग्न अन्य ८ जनालाई कास्की प्रहरीले केहीदिन अघि नै पक्राउ गरिसकेको छ । झुटो विवरण पेस गरी तिब्बतीयनलाई छोरी बनाएर जिल्ला प्रशासन कार्यालय कास्कीबाट नागरिकता निकाल्ने कार्यमा सहयोग गर्ने पोखरा–१८ सराङकोटका लेखबहादुर थापा सहित ८ जनालाई कास्की प्रहरीले पक्राउ गरी अनुसन्धान अघि बढाएको थियो ।

तिब्बती बाबु र नेपाली आमाबाट जन्मिएका सरु थापा मगर र तासी आङ्मो थापा मगरले गत जेठ २५ र असार ६ गते जिल्ला प्रशासन कार्यालय कास्कीबाट नागरिकता लिएका थिए । लेखबहादुर थापाका छोरी बनेर सरु थापामगर र तासी आङ्मो थापामगरले कास्की प्रशासनबाट नागरिकता लिएका हुन् ।

मुचुल्का गरेका स्थानीयहरू बेलबहादुर थापा, इमा थापामगर, सन्तोष थापामगर, ज्ञानबहादुर थापा क्षेत्री, कमल थापालाई पनि कास्की प्रहरीले नियन्त्रणमा लिएको छ ।

‘अनुसन्धानकै क्रममा छौँ, उनीहरू तिब्बती हुन भन्ने अध्ययनले देखाएपछि नागरिकता रद्द भइसकेको छ,’ डिएसपी केसीले भने, ‘अनुसन्धान भइरहेको छ । सबै कानुनी दायरामा आउँछन् ।’

लेखबहादुरकी छोरीले तिब्बती शरणार्थीसँग विवाह गरेकी हुन । उनीहरूलाई वंशजको नागरिकता दिलाउन लेखबहादुरले झुटो विवरण पेश गरेका भेटिएको हो । नातीनीहरूको नागरिकता बनाउन लेखबहादुरले सबै विवरणहरू झुटो बनाएको खुलासा भएको हो । कागजका आधारमा ती दिदीबहिनीको उमेरमा ७ महिनाको अन्तर छ ।

कस्तो कानूनी कारबाही होला

भूटा विबरण पेशगरी नागरिकता दिलाउने कार्यमा संलग्न कर्मचारीलाई विभागीय कारबाही हुने व्यवस्था छ । जिल्ला प्रशासन कार्यालयले विभागीय कारवाहीको लागि नागरिकता फाँटमा काम गर्ने प्रशासकीय अधिकृत ऋषिराम आचार्य, पेस गर्ने नासु डाँसीराम लामिछाने, खरिदार परशुराम पौडेल र रामचन्द्र थापालाई सिफारिस गरिएको छ । त्यस्तै, वडाका पञ्जिधिकारी राजेन्द्र पौडेल र विष्णु पौडेललाई समेत विभागिय कारवाहीको लागि सिफारिस गरिएको छ ।

नागरिकता ऐन, २०६३ अनुसार कुनै विदेशीले नेपाली नागरिक भएको दाबी गरी झुठो विवरण दिई नेपाली नागरिकता लिएमा १ वर्षदेखि ५ वर्षसम्म कैद वा ५० हजार रुपैयाँदेखि १ लाखरुपैयाँसम्म जरिमाना वा दुवै सजाय हुने व्यवस्था छ ।

झुठो विवरणका आधारमा विदेशीलाई नागरिकता दिलाउन सनाखत वा सिफारिस गर्नेलाई ६ महिनादेखि ३ वर्षसम्म कैद वा २५ हजारदेखि ५० हजार रुपैयाँसम्म जरिमाना वा दुवै सजाय हुने ऐनमा उल्लेख छ ।

प्रकाशित मिति: शनिबार, साउन ३२, २०७६ ०३:४८