उसेन बोल्टको रेकर्ड तोड्ने ७ वर्षे बालकको सपना

A+ A A-

जमैकाका उसेन बोल्टले ९.५८ सेकेन्डमा एक सय मिटरको स्प्रिन्ट पुरा गरे । यो विश्वरेकर्ड मात्र थिएन अविश्वसनीय टाइमिङ पनि थियो । अहिले बोल्टले रेसट्रयाकबाट सन्न्यास लिइसके । तर, धेरै एथ्लेटहरु अझैपनि बोल्टको त्यो रेकर्डको छेउछाउ समेत पुग्न सकेका छैनन् ।

तर, अमेरिकामा एकजना नयाँ धावक हरेक दिन रेसट्रयाकमा दौड लगाइरहेका छन् । र, उनको मुख्य लक्ष्य हो बोल्टको ९.५८ सेकेन्डको रेकर्ड तोड्ने । उनी, अर्थात ७ वर्षका फुच्चे एथ्लेट, रुडोल्फ इन्ग्राम जुनियर ‘ब्लेज’ ।

रेसकोर्समा उनले आफ्नो उमेरका सबैलाई पछि पार्छन् । उनको स्पिड देखेर उनले नयाँ उपनाम नै पाइसकेका छन्, ‘मिनि उसेन बोल्ट’ । यिनै मिनि उसेन बोल्ट अहिले ठूला उसेन बोल्टको रेकर्ड तोड्ने सपना लिएर रेसकोर्समा वेपत्तासँग दौडिरहेका छन् ।

७ वर्षकै उमेरमा इन्ग्राम एक सय मिटरको दुरी १३.४८ सेकेन्डमा पुरा गर्न सक्छन् । ओलम्पिकमा सहभागी हुन कम्तिमा १६ वर्षको हुनुपर्छ । अर्थात इन्ग्रामसँग तयारी गर्न अझै ९ वर्ष छ । ती ९ वर्षमा उनले ४ सेकेन्डको समयमात्र सुधार्न आवश्यक छ । अहिले उनको प्रदर्शन हेर्दा त्यो असम्भव देखिदैन ।

उनी अहिले सबैभन्दा छिटो दौडने ७ वर्षका एथ्लेट हुन् । उनको उमेरमा उनको स्पिडमा दौडिन सक्ने कोही छैनन् । त्यसैले त उनी जुनजुन दौडमा सहभागी भए ती सबैमा मेडल जितेका छन् ।

इन्ग्रामले ३ वर्षको हुँदादेखि नै दौडिन सुरु गरेका थिए । उनी ३ वर्षको हुँदा ब्राजिलमा ओलम्पिक आयोजना भएको थियो । एकरात उनी आफ्नो परिवारसँग बसेर ओलम्पिक हेर्दै थिए । भोलीपल्ट विहान उठेपछि उनी आफै ‘अन योर माक्र्स... गेट... सेट... गो...’ भने र बोल्टको शैलीमा कुदेर पर पुगे । उनको पहिलो दौड त्यही थियो ।

त्यसपछि उनका बुवा रुडोल्फ इन्ग्राम सिनियरले उनको ट्रेनिङ सुरु गरिदिए । सुरुवातमै उनी अन्य समकक्षिभन्दा तेज थिए । र, आजसम्म पनि उनी हरेक रेसमा सबैभन्दा अगाडी नै दौडिरहेका छन् ।

जबदेखि उनको ट्रेनिङ सुरु भयो, उनी अरु साथीभन्दा तिव्र गतिका छन् । उनको खुट्टा यति छिटो चल्छ कि उनलाई टक्कर दिन औसतभन्दा बढी फास्ट भएर मात्र पुग्दैन ।

गत वर्ष उनले १४.५९ सेकेन्डमा १०० मिटर पुरा गरेका थिए । यो वर्ष १३.४८ सेकेन्डमै पुरा गरे । ‘उनको प्रतिस्पर्धा आफैसँग मात्र छ । उनको उमेरका अरु कोही उनको छेउछाउ पनि आउन सकेका छैनन्,’ इन्ग्राम सिनियरले जुनियरका बारेमा बताएका छन् ।

इन्ग्रामको ५ लाख ३८ हजार फलोअर्स छन् । ७ वर्षकै उमेरमा सिक्स प्याक एब्स भएका इन्ग्राम इन्स्टाग्राममा फिटनेस मोडल पनि हुन्

उनको ट्रयाकरेकर्ड हेर्दा लाग्छ वास्तवमै उनी अरुलाई जित्न होइन, आफैलाई जित्न दौडिरहेका छन् । हरेक वर्ष आफ्नो समय सुधार्दै लगिरहेका छन् । त्यसैले, यही गतिमा उनले आफुलाई निखार्दै लगेमा बोल्टको रेकर्ड तोड्न धेरै समय नलाग्ला ।

इन्ग्राम रेसट्रयाकमा मात्र होइन अमेरिकन फुटबलमा पनि उस्तै अब्बल छन् । उनलाई दौड र अमेरिकन फुटबल दुवै मनपर्छ । उनी दुवै खेल्न चाहन्छन् । उनले यस विषयमा आफै रिसर्च पनि गरेको उनका बुवा बताउँछन् ।

‘दुईटा मध्ये कुन खेल खेल्नेभन्दा ऊ जहिल्यै दुईवटै खेल्छु भन्छ । उसले आफै रिसर्च पनि गरेछ । विश्वमा ४० जनाभन्दा बढी खेलाडी रहेछन् जसले ओलम्पिक र नेशनल फुटबल लिग (एनएफएल) दुवैमा सक्रिय रुपमा सहभागिता जनाएका छन् । त्यसैले अहिलेसम्म दुईटै खेलमा समानान्तर रुपमा सक्रिय हुने हाम्रो योजना छ । पछि उसले कुनै एउटा रोज्यो भने त्यो उसको निर्णय हुनेछ,’ इन्ग्राम सिनियरले बताएका छन् ।

जसरी इन्ग्रामलाई रेसट्रयाकमा कसैले भेट्न सक्दैन, ग्राउन्डमा पनि उनलाई कसैले रोक्न सक्दैन । उनले आफ्नो इन्स्टाग्राममा अमेरिकन फुटबल खेल्ने मन छ भन्दै पोर्टफोलियो जस्तै बनाएर एउटा भिडियो पनि हालेका छन् ।

त्यो भिडियोमा साना इन्ग्राम सबैलाई छक्याएर गोल गर्न सफल भएको देखिन्छ । अमेरिकन फुटबलमा पनि उनलाई उनको दौडने स्पीडले धेरै सहयोग गरेको छ ।

खेलकुदका अलावा सामाजिक सञ्जालमा पनि उनी निकै सक्रिय छन् । इन्स्टाग्रामका त उनी फुच्चे सेलिब्रेटी नै हुन् । आफ्नो उपनाम ‘ब्लेज’को नामबाट इन्स्टाग्राम चलाउने इन्ग्रामको ५ लाख ३८ हजार फलोअर्स छन् । ७ वर्षकै उमेरमा सिक्स प्याक एब्स भएका इन्ग्राम इन्स्टाग्राममा फिटनेस मोडल पनि हुन् ।

(एजेन्सीको सहयोगमा)

प्रकाशित मिति: शनिबार, साउन ३२, २०७६ ०३:२४