सर्वदलीय बैठक बोलाउने तयारीमा संसद सचिवालय, पहिले बैठकको एजेन्डा के ?

A+ A A-

संसद सचिवालयले सर्वदलीयल बैठक बोलाउने तयारी गरेको छ । राष्ट्रपति विद्यादेवी भण्डारीले २५ पुसका लागि संसद बैठक आह्वान गरेपछि सचिवालयले सर्वदलीय बैठक बोलाउने तयारी गरेको हो । सचिवालयले पहिलो बैठकमा पेस गर्ने एजेन्डाका विषयमा छलफल गर्न सर्वदलीय बैठक बोलाउन लागेको हो । ‘अर्को हप्तासम्म बैठक बोलाउँछौँ,’ सचिवालयका महासचिव डा. भरतराज गौतमले भने ।

नियमावली कस्तो बनाउने, विश्वासको मत कहिले लिने, सभामुख चयन कहिले गर्ने, पहिलो बैठकमा कुन-कुन नेता सांसदले बोल्नेलगायतका विषयमा सर्वदलीय बैठकमा छलफल हुनेछ ।

राष्ट्रियसभाका सदस्यहरू संसदको यो अधिवेशनमा मुलुकको अर्थतन्त्र बलियो बनाउने एजेन्डा ल्याउनुपर्ने बताउँछन् । ‘राष्ट्रिय गौरवको आयोजनालाई तीव्रता दिनुपर्छ । अर्थतन्त्र बलियो बनाउनु पर्नेछ । जनसेवाका कुरामा सहज बनाउनु पर्नेछ,’ राष्ट्रियसभाका सदस्य खिमलाल देवकोटा भन्छन्, ‘यो अधिवेशनमा सीमासँग जोडिएका र राष्ट्रिय स्वाधिनताका कुरा ल्याउनुपर्छ ।’

संघीय कानुन बनाउनुपर्नेमा पनि उनको जोड छ । ‘प्रदेश र स्थानीय तहसँग जोडिएका कानुन बनाउनु पर्नेछ । केन्द्र, प्रदेश र स्थानीयको अन्तरसम्बन्धसँग जोडिएको कानुन बनाउनु पर्नेछ,’ उनले भने ।

निष्कृय भए विधेयकहरू

अघिल्लो सदनमा पेस भएका कतिपय विधेकहरू राष्ट्रियसभाले पास गरी प्रतिनिधिसभामा र प्रतिनिधिसभाले पास गरी राष्ट्रियसभामा पेस गरिएको थियो । अघिल्लो प्रतिनिधिसभामा रहेका विधेयकहरू निष्कृय हुने भएका छन् । राष्ट्रियसभामा रहेका विधेयक मात्र अबको प्रतिनिधिसभामा आउने भएको छ ।

‘अघिल्लो प्रतिनिधिसभामा पेस भएका विधेयक निष्कृय हुन्छ । सरकारले फेरि शून्यबाट सुरु गर्नुपर्ने हुन्छ,’ संसद सचिवालयका प्रवक्ता डा. रोजनाथ पाण्डेले भने, ‘राष्ट्रियसभामा रहेका विधेयक भने अबको प्रतिनिसिधामा पेस गर्न मिल्छ ।’

राष्ट्रियसभाले पारित गरी पठाएको १२ वटा विधेयक प्रतिनिधिसभामा विचाराधीन अवस्थामा थियो । संसद सचिवालयका अनुसार जेष्ठ नागरिकसम्बन्धी पहिलो संशोधन विधेयक, २०७६, नेपाल मिडिया काउन्सिल विधेयक २०७५, नेपाल इन्जिनियरिङ परिषद् पहिलो संशोधन विधेयक २०७६, काठमडौं उपत्यका सार्वजनिक यातायात प्राधिकरण विधेयक २०७६, नीति अनुसन्धान प्रतिष्ठान विधेयक २०७६, नेपाल विशेष सेवा विधेयक २०७६, नेपाल नागरिक उड्ययन प्राधिकरण विधेयक २०७६, नेपाल हवाइ सेवा विधेयक २०७६, तथ्यांङ्क विधेयक २०७६, योगमाया आयुर्वेद विश्वविद्यालय विधेयक २०७६, नाप तौल विधेयक २०७६, प्रत्यायन विधेयक २०७६ विचारधीन थियाे ।

प्रतिनिभिसभाले पारित गरी राष्ट्रियसभामा पेस गरिएको दुई वटा विधेयक पनि विचारधीन थियो । यी विधेयक निष्कृय भएका छन् । संसद सचिवालयका अनुसार मदन भण्डारी विज्ञान तथा प्रविधि विश्वविद्यलय विधेयक २०७६ र खानेपानी तथा सरसफाई विधेयक २०७६ राष्ट्रियसभामा विचारधीन रहेको छ ।

अघिल्लो सदनमा कुन–कुन विधेयक कहाँ कुन अवस्थामा थिए ?