कांग्रेसमा देउवाको राजीनामा र विशेष महाधिवेशन सम्भव छ ?

A+ A A-

नेपाली कांग्रेसको विधानको धारा २६ को उपधारा २ मा भनिएको छ, ‘केन्द्रीय कार्यसमितिले राजीनामा स्वीकृत गरेमा उप–सभापतिले कार्यवाहक सभापति भई कार्यभार सम्हाल्नेछ र छ महिनाभित्रमा विशेष केन्द्रीय महाधिवेशन बोलाई केन्द्रीय सभापतिको निर्वाचन गरिनेछ ।’ त्यस्तै, धारा १ मा केन्द्रीय सभापतिले राजीनामा दिन चाहेमा उप–सभापतिमार्फत केन्द्रीय कार्यसमितिमा प्रस्तुत गर्नुपर्नेछ भनिएको छ ।

विधानमा यस्तो व्यवस्था भए पनि संस्थापन इतर पक्षका कांग्रेस नेताहरूले पार्टी सभापति शेरबहादुर देउवाको राजीनामा माग्न थालेका छन् । त्यसैमध्येमा पर्छन् कांग्रेसनेता गुरुराज घिमिरे । उनले भनेका छन्, ‘राजीनामा नदिए चाँडै विशेष महाधिवेशन बोलाइनेछ ।’

सभापति देउवाले राजनीनामा दिनुपर्ने उनको माग छ । ‘सभापति तथा संसदीय दलका नेता शेरबहादुर देउवाले नैतिकताका आधारमा दुवै पदबाट तत्कालै राजीनामा दिनुपर्छ,’ घिमिरेले भने, ‘पार्टीका साथीहरूले गठबन्धन गलत हो भन्दाभन्दै किन गरियो र आज किन जोगाउन सकिएन ? यसमा सत्तालिप्सा र भजनमण्डली कति जिम्मेवार छ ?’

पछिल्लो घटनाबाट देउवाले सम्मानजनक अवकाश लिनुपर्ने घिमिरेले बताए । ‘उहाँको आत्मबलले पार्टी संगठन चल्दैन । उहाँले संसदीय दल पनि छोड्नुपर्छ । यो घटनालाई देखाएर उहाँले सम्मानजक रूपमा अवकाश लिनुपर्छ । पार्टीमा अभिभावक भएर बस्नुपर्छ,’ उनले भने । देउवाको नेतृत्वमा कांग्रेस पाँच वर्षमा थप नाजुक हुने उनले बताए ।

केन्द्रीय सदस्य अजयबाबु शिवाकोटी पनि सभापति देउवाले राजनीतिबाट विश्राम लिनुपर्ने बताउँछन् । ‘सबै मान्छेको औचित्य एक समयमा हुन्छ । अहिलेसम्म पार्टी र सरकारको नेतृत्व उहाँले गर्नुभयो । त्यसका लागि धन्यवाद तर, अब उहाँको नेतृत्वको औचित्य सकिएको देखियो,’ उनले शिलापत्रसँग भने ।

बालुवाटारमा पहिलो पार्टी कांग्रेसले हातमा आएको सत्ता गुमाउँदै गर्दा कांग्रेसका महामन्त्रीद्वय गगन थापा र विश्वप्रकाश शर्मा पोखरामा साहित्यिक महोत्सवमा थिए । सत्ता रणनीतिमा बालुवाटारको निषेधमा परेका उनीहरूले 'अहिले पार्टी सुध्रन्छ, चिन्ता नगर्नुस्' भनेर कार्यकर्तालाई भनेका छन् ।

महामन्त्री थापाले पार्टी सभापतिले सोधीखोजी नगरेको बताए । राजनीनामा माग र विशेष अधिवेशनको माग गर्ने घटनालाई महामन्त्रीको अभिव्यक्तिसँग जोड्छन् पार्टी प्रवक्ता प्रकाशशरण महत । ‘पार्टीको जिम्मेवारी लिएर बसेका पदाधिकारीले मलाई खबर छैन भन्न मिल्छ ?,’ महतले शिलापत्रसँग भने, ‘जिम्मेवार व्यक्तिले बाहिर अभिव्यक्ति दिने होइन, पार्टीभित्र आफ्नो जिम्मेवारी पूरा गर्ने हो । गगनजी हिजो कार्यदलमा पनि हुनुहुन्थ्यो । आफैँ बैठकमा आउन छाड्नुभयो । गठबन्धनमा के भैराखेको छ, पार्टीमा के भैरहेको छ, त्यसको नियमन गर्नुपर्ने ठाउँमा हुनुहुन्छ ।’

पार्टीका हरेक गतिविधिमा सबै उत्तिकै जिम्मेवार हुने महतले बताए । ‘सभापतिको राजनीनामा माग गर्नु गैरजिम्मेवारपूर्ण अभिव्यत्ति हो,’ प्रवक्ता महतले भने ।

कांग्रेस सहमहामन्त्री भीष्म आङदेम्बे विशेष महाधिवेशन माग गर्नुको प्रस्ट कारण हुनुपर्ने बताउँछन् । ‘कसरी हुन्छ, विशेष महाधिवेशन ? के आधारमा बोलाउने ? कसै व्यक्तिले चाहँदैमा विशेष महाधिवेशन हुन्छ ?,' उनले शिलापत्रसँग भने ।

पार्टीमा अप्ठेरो नीति लिएर दबाबमा पार्ने काम भएको उनले बताए । ‘एउटा प्रधानमन्त्री छोड्दै नछोड्ने, अर्को माओवादीलाई प्रधानमन्त्री दिँदा विद्रोह गर्ने, यी दुई लाइन थिए पार्टीमा उहाँहरूको,’ उनले भने ।

प्रकाशित मिति: मंगलबार, पुस १२, २०७९ १९:०९