कांग्रेसभित्र देउवामाथि गठबन्धन भत्किएकोमा जवाफ दिन दबाब

A+ A A-

छैटाैँपटक प्रधानमन्त्री बन्ने अभिलासा राखेर पार्टीमा एक किसिमले एकछत्र राज गरिरहेका कांग्रेस सभापति शेरबहादुर देउवा अहिले दाेहाेराे तनावमा छन् । एकातिर प्रधानमन्त्री पद नपाएकाे तनाव छ भने अर्केतर्फ पार्टीभित्र र बाहिर उनकाे तीव्र आलाेचना भइरहेकाे छ ।

मुखैमा आएको सत्ता गुमाएपछि देउवाको आफ्नै किचेन क्याबिनेटका सदस्यले समेत आलोचना गर्न थालेका छन् । केन्द्रीय सदस्यहरूले चुनावी समीक्षा गर्न केन्द्रीय समितिको बैठक बाेलाउन माग गरेका छन् । मुखमा आएकाे सत्ता कसरी फुत्कियो र नेतृत्वको कमजोरी भयो भन्ने विषयमा नेतृत्वले जवाफ दिनुपर्ने माग गरेका छन् ।

कांग्रेसनेता डा शेखर काेइरालाले साेमबार साँझ विज्ञप्ति जारी गर्दै याे विषयमा केन्द्रीय समिति बैठकमा निर्मम समीक्षा गर्ने बताएका छन् ।

इतर समूहका नेता डा कोइरालाले विपरीत विचार बोक्नेहरूबीच चुनावमा गठबन्धन गरेर कैयौँ कांग्रेसजनको राजनीतिक हत्या गरिएको बिर्सन नसकिने भन्दै अहिले किन गठबन्धन भत्कियो, त्यसको जवाफ दिनुपर्ने बताएका छन् । उनले गठबन्धन भत्किएर कांग्रेस केन्द्रदेखि प्रदेशसम्म हठात् रूपमा विपक्षीमा बस्नुपर्ने अवस्था किन आयो भन्ने विषयमा पार्टीको केन्द्रीय कार्यसमितिमा निर्मम समीक्षा गरिने बताएका छन् ।

कांग्रेस सभापति शेरबहादुर देउवा र उनी निकट नेताकै कमजाेरीका कारण कांग्रेस केन्द्रदेखि प्रदेशसम्म विपक्षमा बस्नुपर्ने अवस्था आएकाे भन्दै सर्वत्र आलाेचना भइरहेकाे छ ।

सभापति देउवाले माओवादीले तत्कालीन गठबन्धनसँगै एमालेसँग समानान्तर कुरा गरेको थाहा भए पनि त्यसलाई नजरअन्दाज गरेको उनीनिकट एक नेता बताउँछन् । ‘शेरबहादुर दाइ भनेर मात्र भएन, भाउजूको (आरजु राणा) नायवीपन छँदैछ, यसले पनि पार्टी आज यो अवस्थामा पुगेको छ । अस्तव्यस्तता कहिलेसम्म ?,’ ती नेताले शिलापत्रसँग भने ।

कांग्रेस केन्द्रीय सदस्य अजयबाबु शिवाकोटी कांग्रेस पहिलो पार्टी भएर पनि प्रतिपक्षमा बस्नु र कार्यकर्ताको भावना सम्बोधन नगर्नु नेतृत्वको असक्षमता रहेको बताउँछन् । ‘गठबन्धन गर्न हुँदैन भनेर लाग्यौँ । तर गरियाे, त्यो पनि टिकाएनन्,’ उनले शिलापत्रसँग भने, ‘यो नेतृत्वको असक्षमता हो । नेतृत्वले परिपक्व ढंगले डिल गर्नुपर्थ्याे । त्यो पनि गरेन । न भरोसा दिलायो ।’

केन्द्रीय समिति बैठक तुरुन्तै बोलाउन उनको माग छ । ‘पार्टी सभापतिले धेरै लोभ देखाएर किन र्‍याल काढ्नुभयो, थाहा छैन । प्रधानमन्त्री नै नभई हुँदैन भनेर अडान लिनुभयो । गठबन्धनको स्पिरिटलाई उहाँको टिमले समेत नजरअन्दाज गर्दा यो अवस्था आयो,’ उनले भने । देउवा नेतृत्वको औचित्य सकिएको उनले बताए । ‘सबै कुराको समय हुन्छ । उहाँले दिनुभएको योगदानका लागि धन्यवाद भन्ने बेला आयो जस्तो लाग्छ,’ उनले भने ।

कांग्रेसनेता तथा सांसद अर्जुननरसिंह केसी पार्टीले निर्मम समीक्षा गर्नुपर्ने बताउँछन् । ‘सरकार गठन प्रक्रियाबारे हामी उदास हुनु आवश्यक छैन । अब चिन्ता होइन, चिन्तन गरौँ,’ उनले भने, ‘जे भयो, भयो । यसको कारक पक्ष के हो ? निर्भिक र निर्मम समीक्षा गर्दै यही बिन्दुबाट पार्टी पुनर्जागरण, सशक्तीकरण र रूपान्तरणका लागि सम्पूर्ण एकता, संस्थागत नवीनता र चिन्तनमा लाग्नुपर्छ ।’

केन्द्रीय सदस्य प्रकाश स्नेही पनि केन्द्रीय समितिको बैठक बोलाउन माग गर्छन् । ‘छिट्टै नै केन्द्रीय समिति बैठक बोलाउनुपर्छ । नेतृत्वले जवाफ दिनुपर्छ,’ उनले शिलापत्रसँग भने ।

कांग्रेस सांसद तथा केन्द्रीय सदस्य प्रतिमा गौतम गठबन्धन गर्न गलत भएको र त्यसलाई जोगाउन नसक्नु झन् ठूलो गल्ती भएको बताउँछिन् । ‘यो विषयमा पार्टीभित्र छलफल हुन जरुरी छ । गठबन्धन गरेर जाने कुरा पनि उचित थिएन । भएको गठबन्धन जोगाउन नसक्नु झन् ठूलो गल्ती हो,’ उनले शिलापत्रसँग भनिन् ।

कांग्रेस प्रवक्ता डा प्रकाशशरण महत नेतृत्वको कुनै पनि अर्थमा आलोचना हुने बताउँछन् । ‘नेतृत्वले जवाफ दिन त दुबै पद छाड्न हुँदैन भन्ने त उहाँहरू सबै नै होइनन् ? राष्ट्रपति र प्रधानमन्त्री दुवै छाड्न हुन्न भन्नुहुन्थ्यो । जसरी पनि आलोचना गर्ने भन्ने छ एउटा,’ उनले शिलापत्रसँग भने, ‘प्रचण्डलाई दिएको भए पनि प्रचण्डको पुच्छर लागेर हिँड्ने ? प्रचण्डलाई नेतृत्व सुम्पियो भनेर त्यत्तिकै आलोचना हुन्थ्यो ।’

परिपक्वता देखाउन कांग्रेस चुकेको उनले बताए । ‘हामीले परिपक्व ढंगले ह्यानिडल गर्नुपर्थ्याे, त्यो वातावरण बनाउन बसेकाहरूले कहाँकहाँ समानान्तर कुराकानी भइरहेको छ, यथार्थ रूपमा बुझ्नुपर्थ्यो । नपाउने भइसकेपछि जोगाउनुपर्थ्याे । त्यो एउटा पार्ट भयो,’ उनले भने ।

केन्द्रीय समिति बोलाउनेबारे आइतबार बालुवाटारमा कुरा भएको उनले बताए । छिट्टै केन्द्रीय समिति बोलाउनेबारे पार्टीमा छलफल भैरहेको उनले जानकारी दिए ।

प्रकाशित मिति: सोमबार, पुस ११, २०७९ १८:३८