बागमतीमा तीन दलको स्पष्ट बहुमत, माओवादीले मुख्यमन्त्री पाउने सम्भावना

A+ A A-

केन्द्रमा नयाँ गठबन्धन बनेसँगै बागमती प्रदेशमा पनि नयाँ सत्ता समीकरण बन्ने निश्चित भएको छ ।

वाम–लोकतान्त्रिक गठबन्धन टुटेर नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी (रास्वपा), राष्ट्रिय प्रजातन्त्र पार्टी (राप्रपा), जनता समाजवादी पार्टी (जसपा), जनमत पार्टी र तीन जना स्वतन्त्र सांसदसहितको नयाँ गठबन्धन बनेको छ । केन्द्रमा माओवादी केन्द्रका अध्यक्ष पुष्पकमल दाहाल 'प्रचण्ड'ले सरकारको नेतृत्व गर्ने गरी नयाँ गठबन्धन बनेपछि देशका सात वटै प्रदेशमा पनि सोहीअनुसार सत्ता समीकरण बन्ने भएको हो ।

बागमतीमा यसअघि स्पष्ट बहुमत रहेको वाम–लोकतान्त्रिक गठबन्धन फुटे पनि सरकार बनाउन नयाँ गठबन्धनको पनि बहुमत पुगेको छ । बागमती प्रदेशसभाको कुल १ सय १० सिटमा सरकार बनाउन ५६ सिट भए पुग्छ । नयाँ गठबन्धनका एमाले, माओवादी केन्द्र र राप्रपासँग मात्रै ६१ सिट रहेको छ । प्रदेशसभामा एमालेसँग २७ सिट छ । माओवादी केन्द्रसँग २१ र राप्रपासँग १३ सिट छ । सरकार बनाउन बागमतीमा यी तीन दल भए मात्रै पनि पुग्ने भएको हो ।

बागमती प्रदेशसभामा ३७ सिटसहित ठूलो दल नेपाली कांग्रेस प्रमुख प्रतिपक्षी दल बन्ने देखिएको छ । प्रदेशसभामा कांग्रेस, एमाले, माओवादी र राप्रपासहित ७ दलको प्रतिनिधित्व छ । नेकपा (एकीकृत समाजवादी) सँग ७ सिट छ । समाजवादीले प्रत्यक्षमा ५ र समानुपातिकमा २ सिट ल्याएको छ । नेपाल मजदुर किसान पार्टी (नेमकिपा) सँग ३ सिट छ । प्रत्यक्षतर्फ १ सिट जितेको नेमकिपाले समानुपातिकबाट २ सिट ल्याएको हो । यसैगरी, हाम्रो नेपाली पार्टीले प्रत्यक्षमा १ र समानुपातिकमा १ गरी २ सिट ल्याएको छ ।

सरकारमा एकीकृत समाजवादी, नेमकिपा र हाम्रो नेपाली पार्टी सहभागी नहुने देखिए पनि बागमतीमा सरकार बनाउन एमाले, माओवादी र राप्रपाकै ६१ सिट पर्याप्त बनेको हो । बागमतीमा कसको सरकार बन्ने भन्ने विषय अहिले नै नटुंगिए पनि माओवादी केन्द्रको सम्भावना उच्च रहेको चर्चा छ । माओवादी केन्द्रले नै बागमतीमा आफ्नो नेतृत्वमा सरकार बन्ने दाबी गरेको छ ।

मओवादी केन्द्र बागमती प्रदेश कमिटी उपाध्यक्ष तथा प्रदेशसभा सदस्य प्रेमबहादुर पुलामीले बागमतीमा माओवादी नेतृत्वको सरकार बन्ने दाबी गरे । उनले एमालेले १ नम्बर प्रदेश, गण्डकी र कर्णाली लिने भन्दै बागमतीमा माओवादी केन्द्रले नेतृत्व गर्ने शिलापत्रलाई बताए । ‘अघिल्लो कार्यकालमा पनि एमालेले साढे ३ वर्षभन्दा बढी सरकार चलाएको हो । हामीले त्यति बेला पनि नेतृत्वमा दाबी गरेका थिएनौँ । यसपाली बागमतीमा हाम्रै नेतृत्व हुन्छ,’ पुलामीले भने ।

माओवादीबाट मुख्यमन्त्रीमा दाबी कसको ? भन्ने शिलापत्रको प्रश्नमा उनले केही दिनपछि निर्णय हुने बताए । ‘मुख्यमन्त्री को भनेर अहिले नै टुंगिसकेको छैन । पहिला संसदीय दलको नेता चयन गरौँ, त्यसपछि थाहा भइहाल्छ नी । १४ गते नयाँ दलको नेता पाउँछौँ,’ पुलामीले भने ।

माओवादी नेताहरूका अनुसार सुदुरपश्चिमपछि लुम्बिनी र बागमतीमा माओवादीको दाबी रहने जनाइएको छ । लुम्बिनीमा नागरिक उन्मुक्ति पार्टीले भाग पाए माओवादीले बागमतीमा दाबी गर्ने जनाइएको छ । १ नम्बर प्रदेश, गण्डकी र कर्णालीमा एमालेको दाबी रहने चर्चा छ । प्रदेश १ मा हिक्मत कार्की, गण्डकीमा खगराज अधिकारी र कर्णालीमा यमलाल कँडेल मुख्यमन्त्रीका प्रमुख दाबेदार हुन् । उनीहरू पार्टी स्थायी कमिटी सदस्य भएकाले पनि मुख्यमन्त्रीका प्रबल दाबेदारका रूपमा हेरिएको छ ।

एमालेले यी तीन प्रदेश लिए बागमती माओवादी केन्द्रले पाउने निश्चित प्रायः हो । बागमतीमा माओवादी केन्द्रमा पनि संसदीय दलको नेता बन्दै मुख्यमन्त्री बन्न दुई जना दाबेदारको रूपमा देखिएका छन् । माओवादीको बागमती प्रदेशको संसदीय दलको नेता बन्न शालिकराम जम्मकट्टेल र सरल सहयात्री पौडेलबीच प्रतिस्पर्धा हुने देखिएको हो । एकले अर्कोलाई सजिलै छाड्ने स्थिति नभएपछि चुनाव समेत हुन सक्ने बताइएको छ ।

पहिलो कार्यकालमा दलको नेता जम्मकट्टेल भइसकेकाले यसपटक पौडेलले आफू हुनुपर्ने दाबी प्रस्तुत गरेका छन् । माओवादीको बागमती प्रदेश अध्यक्षसमेत रहेकाले आफू दलको नेता बन्दै मुख्यमन्त्री बन्नुपर्ने बताउँछन् पौडेल । प्रदेशसभाको पहिलो कार्यकालमा दलको नेता, सरकारको आन्तरिक मामिला तथा कानुनमन्त्री र आर्थिक मामिला तथा योजनामन्त्री बनिसकेका जम्मकट्टेल दोस्रो कार्यकालमा आफूले मुख्यमन्त्री बन्न पाउनुपर्ने दावी गरिरहेका छन् ।

भागवण्डामा बागमती एमालेलाई परेमा मुख्यमन्त्रीको दाबेदारका रूपमा चितवनबाट निर्वाचित जगन्नाथ थपलिया (जेएन) देखिएका छन् । मुख्यमन्त्रीमा दाबी रहने भन्दै प्रदेशसभा निर्वाचन लडेका निवर्तमान सभामुख सानुकुमार श्रेष्ठ र एमाले प्रदेश अध्यक्ष तथा पूर्वआन्तरिक मामिला तथा कानुनमन्त्री केशव पाण्डे पराजित भएपछि थपलिया शक्तिशाली बनेका हुन् । एमालेले पनि संसदीय दलको नेता चयन गरेको छैन । एमालेमा सर्वसम्मतिमा संसदीय दलको नेता चयन हुने देखिए पनि दलको नेता केही दिनपछि मात्रै टुंगिने जनाइएको छ ।

प्रकाशित मिति: आइतबार, पुस १०, २०७९ २०:११