जब एकै ठाउँमा बसेका ओली र प्रचण्डलाई देउवाले पालैपालो पाँचवर्षे प्रधानमन्त्रीको अफर गरे

जब एकै ठाउँमा बसेका ओली र प्रचण्डलाई देउवाले पालैपालो पाँचवर्षे प्रधानमन्त्रीको अफर गरे

A+ A A-

बिहान ११ बजेर १० मिनेट जाँदा एमाले अध्यक्ष केपी ओलीलाई सम्पर्क गर्दा उनी बालकोट निवासमा पाँचथर, रोल्पा, सिरहाको नेता कार्यकर्ताको टोलीसँग घाम ताप्दै चुनावी समीक्षा गरिरहेका थिए । उता प्रधानमन्त्री निवास बालुवाटारमा भने सरकार गठनको रस्साकस्सी चलिरहेको थियो ।

कांग्रेस सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल 'प्रचण्ड' प्रधानमन्त्रीका लागि ‘वान टु वान’ वार्तामा थिए । बालकोट भने गठबन्धनको निर्णयको प्रतीक्षामा थियो ।

तर, प्रचण्डले बालुवाटार जानुअघि नै एमाले अध्यक्ष ओलीलाई सन्देश पुर्‍याएका थिए, ‘बालुवाटारलाई टुंग्याएर आउने ।’

वान टु वान वार्तामा प्रचण्ड र देउवाले एकअर्कालाई गलाउने प्रयास गरे तर सकेनन् । देउवाले प्रधानमन्त्रीमा सहयोग नगर्ने भएपछि अन्ततः कांग्रेससँगको गठबन्धन छोडेर प्रचण्ड करिब पौने १ बजे बालुवाटारबाट निस्किए ।

‘प्रचण्ड बालुवाटार जानुअघि नै टुंग्याएर आउने सन्देश आएको थियो,’ बालकोट स्रोतले भन्यो, ‘हाम्रोविरुद्ध बनेको गठबन्धन नतोडेसम्म छलफल अगाडि बढ्ने सम्भावना थिएन ।’

321566880_845300830078337_365784088599764787_n1671972229.jpg

एमालेको बटमलाइन माओवादीले कांग्रेससँग गठबन्ध तोड्नुपर्ने थियो । त्यसैले कांग्रेससँगको गठबन्धन तोड्ने र एमालेसँग सहकार्य गर्ने विषयमा एमाले र माओवादीका दोस्रो तहका नेता बिहानैदेखि छलफलमा जुटिसकेका थिए । एमालेबाट उपाध्यक्ष विष्णु पौडेल, सुवास नेम्वाङ, उपमहासचिव विष्णु रिमाल र माओवादीबाट महासचिव देव गुरुङ, नेता वर्षमान पुन, देवेन्द्र पौडेललगायतका नेताहरू गोप्य छलफलमा थिए ।

यिनै दोस्रो तहका नेताहरूको सहजीकरणमा अध्यक्ष ओली र प्रचण्डबीच भेटवार्ता भएको हो । बालुवाटारबाट प्रचण्डले गठबन्धन टुंग्याएलगत्तै एमालेका विष्णु रिमाल र माओवादीका वर्षमान पुनबीच संवाद भएको थियो । स्रोतका अनुसार रिमालले ओलीलाई प्रचण्ड आउँदै गरेको जानकारी गराएका थिए । १ बजेपछि प्रचण्ड ओली निवास बालकोट पुगेका थिए । ‘दुई अध्यक्षबीच छिट्टै कुरा मिल्यो । सहमतिका लागि धेरै समय नै लागेन,’ बालकोट स्रोतले भन्यो ।

रोचक त के छ भने, अध्यक्ष ओली र प्रचण्डबीच सहमति भइसकेको थियो, बलुवाटारबाट कांग्रेसनेताहरूको फोन अध्यक्ष ओली र प्रचण्डलाई पालैपालो आइरहेको थियो । बालुवाटारबाट ओली र प्रचण्डलाई फोनबाट प्रधानमन्त्रीको अफर आएको थियो ।

‘बालुवाटारबाट फोन आउँदा धेरै ढिला भइसकेको थियो । दुई अध्यक्षबीच सहमति भएपछि पहिलो फोन अध्यक्ष प्रचण्डलाई आयो । त्यसलगत्तै अध्यक्ष ओलीलाई आएको थियो । ओली र प्रचण्ड सँगै हुनुहुन्थ्यो,’ बालकोट स्रोतले भन्यो, ‘पाँच वर्ष नै प्रधानमन्त्री हुने प्रस्ताव आएको थियो ।’

स्रोतका अनुसार एकै ठाउँमा भएको समयमा बालुवाटारबाट फोन आएपछि ओली र प्रचण्ड झस्किए । ‘कांग्रेसले एकातिर अध्यक्ष ओलीलाई अर्कोतिर अध्यक्ष प्रचण्डलाई प्रस्ताव गरेपछि विश्वास भएन,’ बालकोट स्रोतले भन्यो ।

त्यसपछि राष्ट्रिय स्वतन्त्र पार्टी, जसपा, जनमत, नागरिक उन्मुक्ति पार्टीलाई पनि बालकोट बोलाइयो । यसअघि राप्रपा अध्यक्ष राजेन्द्र लिङ्देनले पनि ओलीसँग भेट गरेका थिए । एकाएक बालुवाटारबाट सरकारको चाबी बालकोट छिर्‍यो । ७ दलका बीच प्रचण्डलाई प्रधानमन्त्री बनाउने सहमति बन्यो । र, अध्यक्ष प्रचण्डले आफूलाई प्रधानमन्त्री बनाउन १६९ जना सांसदको समर्थन रहेको पत्र राष्ट्रपति विद्यादेवी भण्डारीलाई बुझाए ।

सबैको विजय भयो : उपाध्यक्ष नेम्वाङ

यसरी एमाले र मओवादीको नेतृत्वमा सरकार बन्ने भएपछि सबैको विजय भएको बताउँछन् एमाले उपाध्यक्ष सुवास नेम्वाङ । ‘नयाँ जनादेशले सबै दललाई मिलेर जान सन्देश दिएको थियो । यो सहमतिले सबैको विजय भएको छ,’ उनले भने, ‘सरकार गठनसँगै परिवर्तनको ढोका खुलेको छ ।’

सबैभन्दा ठूलो दल कांग्रेसले सरकार बनाउन असफल भएपछि आफू अग्रसर भएको एमालेको भनाइ छ । प्रचण्डलाई प्रधानमन्त्री बनाउने निर्णयपछि महासचिव शंकर पोखरेलले कांग्रेसले सरकार बनाउने कामलाई निष्कर्ष निकाल्न नसकेपछि दोस्रो भएको एमाले अग्रसरता लिन बाध्य भएको बताए ।

सम्बन्धित समाचार

प्रकाशित मिति: आइतबार, पुस १०, २०७९ २०:४६