शीर्ष नेताको साइड टकदेखि पहिलोपटक संसद छिर्दाको उल्लाससम्म

A+ A A-

न सत्ता पक्ष । न प्रतिपक्षी । न घोचपेच । सबै समान ।

बिहीबार संसद भवनमा नवनिर्वाचित सांसदहरूले हार्दिकताकासाथ शपथ खाए । प्रतिनिधिसभामा निर्वाचित भएका २७५ सांसदमध्ये २७१ सांसद मात्र उपस्थित भए । प्रतिनिधिसभाका ज्येष्ठ सदस्य राप्रपाका पशुपतिशमशेर राणाले उनीहरूलाई पद तथा गोपनीयतको शपथग्रहण गराए । तर ४ सांसद शपथमा सहभागी भएनन् । कांग्रेसकी माया राई, माओवादीका रामकुमार राई, नेकपा एसका प्रमेहबहादुर आले र नेपाल समाजवादी पार्टीका महिन्द्र राय यादवले शपथ लिएनन् ।

शपथ लिन आएका सांसदहरू आ–आफ्नो वेशभूषामा सजिएर आएका थिए । विविधतामा एकता देखिन्थ्यो संसद भवन परिसरमा । तर, पहिलो पटक संसद छिरेकाहरू भने अलमलमा देखिन्थे । कताबाट छिर्ने हो भन्दै गेट खोजिरहेका थिए ।

‘कता बाट छिर्ने हो ?,’ एमालेका ६६ वर्षीय सांसद कालुराम राई (केआर खम्बु) अलमलमा परे । आँखा कमजोर रहेका राईलाई श्रीमती शुभलक्ष्मी राईले डोर्‍याएर ल्याएकी थिइन् । लौरो टेक्दै उनी श्रमतीको साथमा संसद भवन छिरेका थिए ।

‘आँखा कमजोर छ । सहयोगी आएको हुँ,’ शुभलक्ष्मीले भनिन् । केहीबेर उनी गेटमै रोकिए । संसद सचिवालयका एक कर्मचारी उनको विद्यार्थी रहेछन् । उनको सहयोगमा कालुराम शपथ ग्रहणस्थल छिरे । श्रीमती शुभलक्ष्मी बाहिरै परिन् । अनि उनले श्रीमान् एमालेबाट समानुपातिक संसाद भएको सुनाइन् ।

‘श्रीमान् जीव वैज्ञानिक हुनुहुन्छ । लामो समय विश्वविद्यालयमा पढाउनु भयो । मैले पनि पढाउँथे । सांसद भएकोमा खुसी लागेको छ,’ उनले भनिन् । प्राध्यापकसँगै राई वामसमर्थक रहेको उनले बताइन् । झापा विद्रोहको समर्थक थिए, राई । झापा क्षेत्र नम्बर ३ बाट एमालेले उनलाई समानुपातिकमा सिफारिस गरेको थियो । सबैको प्रिय शिक्षक रहेका राइले प्रेसरको कारण आँखाको ज्योति गमाउनु पर्‍यो । सफल वैज्ञानिकबाट अब उनी सांसद भएका छन् । उनी खासै मिडियाको नजरमा परेनन् ।

उनी आएको केहीबेरपछि एकनाथ ढकाल संसद भवनमा छिरे । उनलाई मिडियाले घेरा हालिहाले । तपाईंको योजना के छ ? पत्रकारको प्रश्नमा उनले आफ्नो योजनाको फेहरिस्त सुनाउन थाले । हामीले अर्को प्रश्न गर्‍यौँ तपाईं कुन पार्टीको सांसद ? उनी केहीबेर मौन भए । जवाफ दिन सकेनन् । धन्यवाद फर्काएर उनी शपथका लागि भित्र छिरे । परिवार दलका अध्यक्ष रहेका ढकाल एमालेबाट समानुपातिक संसद बनेका हुन् । एमालेभित्र ढकाललाई सांसद बनाएकोमा विरोध भइरहेको छ ।

जनभावनाअनुसार काम गर्ने प्रतिबद्धता

पहिलो पटक संसद छिरेका राष्ट्रिय स्वतन्त्र पार्टी, जनमत र नागरिक उन्मुक्तिका सांसदहरूलाई मिडियाले घेरेको दृश्य पनि हेर्न लायक थियो । त्यतिमात्र होइन संसद सचिवालयका कर्मचारी र मर्यादापालकसेत रास्वपाका सांसदहरूसँग फोटो खिच्न तम्सिरहेका थिए । नयाँ पार्टीका नयाँ सांसदहरू जनभावनाअनुसार काम गर्ने प्रतिबद्धता जनाइरहेका थिए ।

‘आक्रोश र आशाको मत पाएका हौँ । कुनै न कुनै उभार आउने आशा थियो । त्यो हामीले पाएका छौँ । अब इमानदारिताकासाथ देश र जनातको भलो चिताएर काम गर्ने हो,’ रास्वपाका संसाद रवि लामिछानेले भने । आफूहरूको एजेन्डामा सहमत भए सरकारमा जान सकिने उनले बताए । ‘हाम्रो पार्टी भन्दा एजेन्डा जाने हो,’ उनले भने ।

शपथ खाएपछि नागरिकको अपेक्षाअनुसार काम गर्ने बताइन् नागरिक उन्मुक्ति पार्टीकी रञ्जिता श्रेष्ठले । ‘जनताले विश्वास गर्नुभएको छ । अब नागरिकको अपेक्षाअनुसार काम गर्ने हो । शपथ खाएपछि जिम्मेवारी थपिएको छ,’ उनले भनिन् ।

पहिलो पटक संसद छिरेका जनमत पार्टीका सिके राउत पनि धेरैको नजरमा परे । जनतम पार्टीले शिक्षा, स्वास्थ्य र कृषिलाई प्राथमिकता दिएको उनले सुनाए । उनले सरकारमा जानसमेत लचक रहेको बताए । ‘सदन, सरकार र सडकमा संघर्ष गर्छौं । सरकारमा गएर हाम्रो माग उठाउँछौँ,’ उनले भने । जनमतले मधेश प्रदेशमा आफ्नो पार्टीको सरकार बन्नुपर्ने बताए ।

भित्र सांसदहरू शपथको लागि छिरेपछि आफन्तहरू भने बाहिर कुरेर बसिरहेका थिए । जनमत पार्टीकै सांसद सोनु मुर्मुका ५ वर्षीय छोरा बाहिरै थिए । सोनुकी बहिनी आरती छोरालाई कुरेर बाहिर बसेकी थिइन् । माननीय भएकाहरूका आफन्ती खुसी साटासाट गरिरहेका थिए । कोही सांसदका बुमा आमा, कोहीका श्रीमान् श्रीमती, कोहीका दिदीबहिनी कोहीका दाजुभाइहरू आएका थिए ।

मुख्यमन्त्रीले लिए शपथ

बागमती प्रदेशका मुख्यमन्त्री राजेन्द्र पाण्डेले पनि प्रतिनिधिसभा सदस्यको शपथ लिए । मुख्यमन्त्रीबाट राजीनामा नगरी प्रतिनिधिसभा सदस्यको शपथ लिएको भन्दै उनको आलोचना भइरहेको छ । अघल्लो चुनावमा एमालेबाट प्रदेशसभा सदस्यमा निर्वाचित भएका थिए । यसपटक नेकपा एसबाट उनी धादिङबाट प्रतिनिधिसभा सदस्यमा निर्वाचित भएका हुन् ।

फरक-फरक भाषामा शपथ

२८ सांसदले १४ वटा भाषामा शपथ खाएका थिए भने बाँकीले नेपालीमा । संसद सचिवालयका अनुसार उर्दु, तमाङ, भेजपुरी, थारु, मैथिली, नेपाली खस, मधेसी, सन्थाली, नेपाल भाषा, अवदी, मुस्लिम, हिन्दी, संस्कृत र कोई/कोयू भाषामा सांसदहरूले शपथ खाएका थिए ।

संस्कृतमा शपथ खाएका सांसद किरण कुमार साह संस्कार र संस्कृति जोगाउन संस्कृतमा शपथ खाएको बताउँछन् । ‘संस्कृत मानव सभ्यतासँग जोडिएको छ । सबै भाषाको जननी संस्कृत हो । आज नेपालीको शीर ठाडो भएको छ । हाम्रो संस्कृति हराएको अवस्थामा उजागर भएको छ,’ उनले भने । उनी रौतहट–२ बाट स्वतन्त्र निर्वाचित सांसद हुन् ।

राप्रपाको थप शपथ, भ्रष्टाचार नगर्ने

राष्ट्रिय प्रजातन्त्र पार्टीका १४ सांसदले संसदले खुवाएको शपथसँगै थप शपथ पनि खाएका छन् । थप शपथका रूपमा भ्रष्टाचार नगर्ने कसम खाएका हुन् । उनीहरूले ‘भ्रष्टाचार गरेर खानु आमाको रगत खानु सरह मानेर काम गर्नेछु’ भनेर कसम खाएका हुन् । रोचक त के छ भने अघिल्लो राप्रपाबाट राजेन्द्र लिङ्देन एक्लो सांसद थिए । अघिल्लो संसदको अन्तिम बैठकमा उनले थप साथी लिएर आउने बाचा गरेका थिए । १ बाट १४ संख्या पुर्‍याएर उनी संसदमा छिर्दा उनी खुसी देखिन्थे ।

के भनेर खाए शपथ ?

‘म मुलुक र जनताप्रति पूर्ण वफादार रही सत्य निष्ठापूर्वक प्रतिज्ञा गर्छु । इश्वरको नाममा शपथ लिन्छु कि नेपालको सार्वभौम सत्ता र राजकीय सत्ता नेपाली जनतामा रहेको नेपालको संविधानप्रति पूर्ण वफदार रहदै प्रतिनिधिसभाको सदस्य पदको कामकाज प्रचलित कानुनको अधिनमा रही मुलुक र जनातको सोझो चिताइ कसैको डर नमानि पक्षपात नगरि पूर्वाग्रह वा खारब भावना नलिइ पदीय गोपनियता कायम राखि इमानदारतका साथ गर्ने छु । ’

ठूला दलको ध्यान सरकार गठनतर्फ

कांग्रेस, एमाले, माओवादी, नेकपा एसका नेताहरू भने सरकार गठनको जोड घटाउमा देखिन्थे । शपथपछि चियापानमा सहभागी भएका शेरबहादुर देउवा, केपी ओली, प्रचण्डलगायतका नेता लहरै बसेका थिए, एक आपसामा ‘साइट टक’ गरिरहेका थिए । अन्य सांसदहरू भनिरहेका थिए, बल्ल सुरू भयो सरकार गठनको प्रक्रिया । कसको नेतृत्वमा सरका बन्छ त ? भन्ने प्रश्नमा प्रचण्डले भने, ‘गठबन्धनकै बन्छ । छलफलमा छौँ ।’ प्रधानमन्त्री देउवा र एमाले अध्यक्ष ओली भने प्रतिक्रिया नदिइ बाहिरिए ।