विज्ञापन गर्दै ठग्ने गिरोहको फन्दामा विद्यार्थी (भिडियो)

A+ A A-

संखुवासभाकी प्रिया खनालले प्राविधिक शिक्षा तथा व्यावसायिक तालिम परिषद् (सीटीईभीटी) बाट स्टाफ नर्समा नाम निकालिन् । उनलाई कहाँ पढ्ने भन्ने टुङ्गो भएन । कलेजको खोजी गर्न थालिन् । भर्ना हुन कलेज फेला पार्न सकिनन् ।

कुरा असोज १८ गतेको हो । सामाजिक सञ्जाल फेसबुक पेजमा भक्तपुरको सूर्यविनायकस्थित सुवाल इन्टरनेसनल कलेजले स्टाफ नर्समा एक सिटका लागि विज्ञापन गरेको देखिन् । विज्ञापनमा सम्पर्क नम्बर थियो । उनले फोन गरिन् ।

फोनमा कलेजले तोकेको सम्पर्क व्यक्तिले त्यस बेला भनेको सम्झिँदै खनालले भनिन्, ‘छिटो आउनुहोस् । स्टाफ नर्सको एउटा कोटा मात्र छ । ढिला गर्नुभयो भने अवसर पाउनुहुन्न ।’

प्रियाले आफू संखुवासभामा भएको र आइपुग्नै चार दिन लाग्ने बताइन् । जवाफमा ती सम्पर्क व्यक्तिले भने, ‘सकेसम्म छिटो आउनुहोस् । तपाईंलाई एउटा सिट राखिदिन्छौँ ।’

कलेजमा सिट त सुरक्षित भयो । तर, भर्ना शुल्क सोध्ने मन प्रियालाई भयो र सोधिन्, ‘भर्ना शुल्क कति लाग्छ ?’ जवाफ आयो, ‘हाम्रो नयाँ कलेज हो । तपाईं निकै भाग्यमानी हुनुहुँदोरहेछ । तपाईंले पढ्न पाउनु नै ठूलो कुरा हो । भर्ना शुल्क १ लाख ७५ हजार लाग्छ ।’

बाल्यकालदेखि नै नर्स बन्ने सपना प्रियाको थियो । सपनालाई विपनामा बदल्ने उनमा हुटहुटी भयो । त्यही भएर उनी सुवाल इन्टरनेसनल कलेज आइन् ।

कलेजले ७५ हजार शुल्क लिएर भर्ना गरिदियो । तर, शैक्षिक योग्यतासहितका अन्य केही कागजात कलेजले मागेन । प्रिया अचम्म परिन् । किनभने हरेक कलेज/क्याम्पसले भर्ना हुन चाहेको विद्यार्थीको शैक्षिक योग्यतासहितका आवश्यक अन्य कागजात माग्छ नै । तर, सुवाल इन्टरनेसनल कलेजले मागेन । कलेज भने भर्ना भइन् ।

भर्ना हुनेमा प्रिया एक्ली होइनन् । सर्लाहीको लालबन्दीका मनिष कुमार र उनका भाइ पनि फार्मेसी विषय पढ्न सोही कजेलमा भर्ना भए । उनी उक्त कजेलमा ‘एजेन्ट’का माध्यमबाट आइपुगेका हुन् ।

कपिलवस्तुकी सुस्मिता कार्कीले पनि प्रियाले जसरी सीटीईभीटीबाट स्टाफ नर्समा नाम निकालेकी हुन् । उनले धेरै कलेज चहार्दा पनि भर्ना हुन पाएकी थिइनन् ।

त्यत्तिकैमा सीटीईभीटीकै बोर्ड मेम्बरहरूको फेसबुक ग्रुपमा उनी जोडिन् । त्यहाँ अन्य विद्यार्थीहरू पनि जोडिएका थिए । यही ग्रुपमा विभिन्न कलेज र ती कलेजहरूमा भर्नासम्बन्धी जानकारी हुन्थ्यो ।

हो, त्यही ग्रुपमा सुस्मिताले सुवाल इन्टरनेसनल कलेजमा स्टाफ नर्सका लागि एउटा सिट खाली रहेको विज्ञापन देखिन् र उक्त कलेज पुगिन् । कलेजमा उनको भर्ना पनि भयो । शुल्क ७५ हजार नै तिरिन् । उनलाई पनि प्रियालाई जस्तै कलेजले शैक्षिक योग्यतासहितका कागजात केही मागेन । मनमा उनलाई शंका लागिरहेको थियो, ‘कतै कलेजले ठगिरहेको त छैन ?’

नभन्दै ‘अवैध कलेज खोलेर करोडौँ असुली’ शीर्षकमा कान्तिपुर दैनिकले समाचार प्रकाशित गर्‍यो । सुस्मिता, प्रिया, मनिषसहित भर्ना भएका विद्यार्थी र तिनका अभिभावकहरूले त्यसपछि मात्रै ठगिएको थाहा पाए ।

यसपछि विद्यार्थीहरू कलेजको वैधानिकता बुझ्न शिक्षा मन्त्रालय पुगे । मन्त्रालय पुग्दा थाहा भयो कि अध्ययन गरिरहेको कलेज शिक्षा मन्त्रालयमार्फत शैक्षिक संस्था सञ्चालनका लागि मान्यता प्राप्त रहेनछ ।

तर, अमेरिकी विश्वविद्यालयबाट सम्बन्धन प्राप्त गरेको दाबी कलेजको थियो । त्यही भनेर नर्सिङ, फार्मेसी र एचएमा करिब ३ सय विद्यार्थी भर्ना गरेर सुवालले प्रतिविद्यार्थी भर्ना शुल्क ७५ हजार र पढाइ शुल्कबापत केही विद्यार्थीसँग ३ लाख ५० हजारका दरले पैसा उठाएको थियो ।

प्रियाकी आमा कृष्णकुमारी भन्छिन्, ‘जग्गा धितो राखेर छोरीलाई पढाउन पैसा निकालेर पठाएकी थिएँ । कलेज नै नक्कली परेछ । अहिले थाहा पाएपछि त छाँगाबाट खसेजस्तै भयो । छोरीको भविष्य सोचेर राम्रो होला भनेर पैसा पठाएका थियौँ । अहिले ठगीमा परेको थाहा पाउँदा साह्रै चित्त दुखेको छ ।’

उनले कलेजले भर्ना र पढाइ शुल्क भनेर उठाएको पैसा फिर्ता पाउनुपर्ने माग गरेकी छिन् ।

प्रकाशित मिति: बिहीबार, पुस ७, २०७९ १६:३३