एक वर्षअगावै छुट्न लागेका शोभराजको ६ महिनामै छाडेकी छोरी भेट्ने इच्छा पूरा होला ?

एक वर्षअगावै छुट्न लागेका शोभराजको ६ महिनामै छाडेकी छोरी भेट्ने इच्छा पूरा होला ?

A+ A A-

सर्वोच्च अदालतको बुधबारको फैसलाअनुसार 'विकिनी किलर'का नामले कुख्यात अन्तर्राष्ट्रिय अपराधी चार्ल्स शोभराज जेलमुक्त हुनेछन् । फ्रान्सेली नागरिक शोभराजलाई सर्वोच्चले कारागार नियमावली २०२० को नियम २९ (२क) अनुसार जेलमुक्त गर्न आदेश गरेको हो ।

उक्त नियमअनुसार ६५ वर्ष उमेर पुगेका कैदीहरूलाई असल चालचलनको आधार र गम्भीर प्रकारको रोग लागेमा ७५ प्रतिशत कैद काटिसकेका कैदीको कैद सजाय मिनाहा गर्न सकिने व्यवस्था छ ।

सोही कानुनी व्यवस्थाको आधारमा सर्वोच्चले उनलाई जेलमुक्त गरेर १५ दिनभित्र आफ्नो देश (फ्रान्स) फर्काउन आदेश गरेको हो । शोभराज कारागार नियमावली २०२० अनुसार कैद सजाय छुट पाउनुपर्ने भन्दै १९ कात्तिक २०७५ मा सर्वोच्चमा निवेदन दिएका थिए ।

सोही निवेदनका आधारमा सर्वाेच्चका न्यायाधीशद्वय सपना प्रधान मल्ल र तिलप्रसाद श्रेष्ठको इजलासले उनलाई जेलमुक्त गर्ने आदेश गरेको हो । ७८ वर्षीय शोभराजले १९ वर्ष कैद सजाय भोगिसकेका छन् । पछिल्लो समय शोभराजलाई सुन्धारा कारागारको गोलघरभित्र राखिएको थियो ।

उनीमाथि विभिन्न देशमा गरी २० जनाभन्दा बढीको हत्या गरेको अभियोग छ । नेपाल घुम्न आएका अमेरिकी महिला पर्यटक कोनी जो ब्रोन्जिचको सन् १९७५ मा हत्या गरेको आरोपमा सर्वोच्च अदालतले उनलाई जन्मकैदसहित आजीवन कारावासको सजाय सुनाएको थियो ।

शोभराज २०६० सालमा काठमाडौंबाट पक्राउ परेका थिए । कतिपय महिलालाई बलात्कारपछि हत्या गरेको आरोप उनीमाथि छ । उनीमाथिको अधिकांश अपराध महिलामाथिका छन् ।

होला त छोरी भेट्ने इच्छा पूरा ?

कारागारभित्र रहँदा शोभराजले अन्तिम इच्छा छोरी भेट्ने रहेको बताउँदै आएका थिए । समयसमयमा कारागारका नाइकेसँग भेट हुँदा उनले आफू जेलमुक्त भएपछि घर फर्किने समेत सुनाउने गरेका थिए ।

कारागारका नाइकेलाई उनले आफूले जापानी नागरिकसँग विवाह गरेको र उनीबाट एक छोरी जन्मिएको बताएका छन् । आफू नेपाल आउँदा छोरीको उमेर ६ महिना मात्र पुगेको शोभराजले बताएका छन् ।

जेलमै रहँदा शोभराजसँग अधिवक्तासमेत रहेकी निहिता विश्वासले विवाह गरेको दाबी गरेकी थिइन् । जापानमा रहेकी छोरी र निहितासमेतलाई फ्रान्स लैजाने शोभराजको योजना रहेको कारागार स्रोतको दाबी छ । तर, पछिल्लो समय भने उनीहरूबीचको प्रेम पहिलाको जस्तो नदेखिने गरेको कारगार स्रोतको दाबी छ । यद्यपि, बुधबारको बहसमा भने निहिता र शकुन्तला थापाले समेत बहस गरेका थिए ।

सर्वोच्चको आदेशसँगै अन्य देशमा उनी पक्राउ परेनन् भने फ्रान्स पुग्नेछन् । २ असोज २०६० देखि सुन्धारा कारागारमा बस्दै आएका शोभराज २०८० असोजसम्म जन्मकैदमा बस्नुपर्नेमा यो आदेशसँगै अब उनी तोकिएको सजायभन्दा करिब एक वर्षअघि नै जेलमुक्त भएका छन् ।

१९ वर्षको जेल जीवन शोभराजका लागि कष्टकर बन्दै गएको थियो । २९ जेठ २०७४ मा शोभराजको गंगालाल अस्पतालमा ओपन हार्ट सर्जरीसमेत भएको थियो ।

याे पनि पढ्नुहाेस् :

प्रकाशित मिति: बुधबार, पुस ६, २०७९ १९:४६