बागमतीका उद्योग सचिवले मानसिक यातना दिएको आरोप लगाउँदै अधिकृतले दिए राजीनामा

बागमतीका उद्योग सचिवले मानसिक यातना दिएको आरोप लगाउँदै अधिकृतले दिए राजीनामा

A+ A A-

बागमती प्रदेशको उद्योग वाणिज्य तथा आपूर्ति मन्त्रालयअन्तर्गतका अधिकृतले मन्त्रालयका सचिवबाट यातना दिइएको भन्दै सेवाबाट राजीनामा दिएका छन् ।

सचिवले आफूभन्दा कनिष्टलाई कार्यालय प्रमुख बनाएको, भेट गरेर गुनासो गर्ने मौकासमेत नदिएकोलगायतका आरोप लगाउँदै अधिकृतस्तर आठौँ तहका प्रशिक्षण अधिकृत गणेश राउतले सेवाबाट राजीनामा बुझाएका हुन् । बुधबार हेटौँडामा पत्रकार सम्मेलन गर्दै अधिकृत राउतले मन्त्रालयका सचिव विश्वबाबु पुडासैनीले आफ्नो करियर नै सिध्याउन लागेको गम्भीर आरोप लगाएका छन् । उनले पुरानो घटनालाई लिएर सचिवले मानसिक यातना दिएको आरोप लगाएका छन् ।

प्राविधिक फाँटका राउत यसअघि घरेलु तथा साना उद्योग कार्यालय भरतपुर, चितवनमा कार्यरत थिए । घरेलु कार्यालयमा मन्त्रालयका सचिव पुडासैनीले लेखा अधिकृत धिरेन्द्र पोख्रेललाई आर्थिक अधिकारसहितको निमित्त प्रमुखको जिम्मेवारी दिएपछि यो विवाद सुरु भएको पाइएको छ । सचिव पुडासैनीले ३० असोज २०७९ मा पोख्रेललाई निमिक्त भई कामकाज गर्ने अधिकार दिएका हुन् । तर, अधिकृत राउतले भने आफूभन्दा कनिष्टलाई कार्यालय प्रमुख बनाएको भन्दै काम गरेनन् ।

घटना यतिमा मात्रै सीमित रहेन । निमिक्त प्रमुख पोखरेलले १४ कात्तिक २०७९ मा जिम्मेवारी तथा अधिकार प्रत्यायोजन सम्बन्धमा ८ बुँदामा काम लगाएपछि विवाद थप चर्किएको देखिएको छ । राउतले आफूभन्दा कनिष्टको अण्डरमा बसेर काम नगर्ने भन्दै ‘कार्यालयमा मार्नेसम्मको धारणा व्यक्त गरेको, तथानाम गाली गर्ने गरेको, आफूलाई सातवटासम्म भुत चढ्ने भन्दै धम्क्याएको’ लगायतका गतिविधिले कर्मचारीहरूले सचिव पुडासैनीलाई पत्राचार गरेका थिए ।

१२ जना कर्मचारीहरूले हस्ताक्षरसहित राउतको व्यवहार ठीक नभएको आरोपपत्र सचिवलाई पठाएपछि उनलाई चितवनबाट हेटौँडास्थित उद्योग वाणिज्य तथा उपभोक्ता हित संरक्षण निर्देशनालयमा २८ मंसिर २०७९ मा काज सरुवा गरेपछि भने राउतले सेवाबाटै राजीनामा दिएका छन् । राउतले आफूलाई तीन महिनासम्म मानसिक यातना दिइएको, अन्यायमा पर्दा न्यान दिनुपर्नेलाई उल्टै सचिवले सरुवा गरेको, मानसिक पीडा बढाउने गरी सचिव पुडासैनीले भेट्नसमेत नदिएको गुनासो गरे ।

पत्रकार सम्मेलनमा आफू घरेलु कार्यालय ललितपुरमा हुँदा हालका सचिव पुडासैनी गुणस्तर विभागमा रहेको र उनले भनेको अनुसार आर्थिक लाभ हुने काम नगरेको रिस अहिले आएर पोखेको गम्भीर आरोप लगाए । सचिव पुडासैनीले उनीसँग काम गर्ने एउटा मात्रै कर्मचारीले राउतको आचरण र गतिविधि ठीक रहेको भनेमा आफूले उनलाई सच्चिने मौका दिने बताए । शिलापत्रसँग कुरा गर्दै सचिव पुडासैनीले सेवा अवधिमा राउत जस्तो व्यवहारको कर्मचारी कहिल्यै नदेखेको आरोप लगाए ।

‘उहाँलाई मैले बाटोमा भेट्दा पनि चिन्दिनँ । तपाईंहरूसँग ललितपुरमा हुँदा यस्तो गरेको भनेर मलाई आरोप लगाइएको रहेछ । त्यो आरोप सरासर गलत छ । मैले उहाँलाई भर्खर चिन्दैछु,’ पुडासैनीले भने । घरेलु कार्यालय चितवनका १२ जना कर्मचारीले राउतबाट असुरक्षा भएको पत्र पठाएपछि निर्देशनालयमा सरुवा गरेको उनको भनाइ छ ।

कार्यालयमा रहँदा उनले कामसमेत नगरेकाले कारबाही गरिएको बताए । ‘उनले सेवाग्राहीलाई समेत दुःख दिने गरेको पाइयो । आवश्यक नै नपर्ने कागजात ल्याउन सेवाग्राहीलाई धम्क्याउँदा रहेछन्,’ उनले भने । अधिकृत राउतले आफूलाई धम्क्याउन राजीनामा दिएको सचिव पुडासैनीले बताए ।

उनको गतिविधिबारे पर्याप्त प्रमाण रहेकाले मन्त्रालयले राउतलाई बर्खास्त गर्न लागेको उनले जानकारी दिए । राउतले आफूलाई समेत भौतिक रूपमा धम्क्याएको उनको गुनासो छ । अशोभनीय व्यवहार देखाएकै कारण आफूले भेट गर्न नदिएको उनको भनाइ छ ।