प्रहरीका दुःख : न ओत लाग्ने गतिलो छाप्रो छ, न गस्तीमा हिँड्‌न सवारी

A+ A A-

एउटा काठको छाप्रो, त्यसमा पनि न ढोका न त झयाल । ढोका र झ्यालमा बोराले बारिएको छ । चारतिरबाट चिसो स्याँठ पस्छ । वर्षामा ठूलो पानी परे त्यही छाप्रो पनि छोडेर अन्तै हिँड्नुपर्छ ।

जेनतेन वर्षा त टर्‍यो । अब चिसो कटाउन भने मुस्किल छ । हेटौँडा उपमहानगरपालिकाभन्दा मकवानपुरगढी गाउँपालिका–२, स्थित जितपुरभञ्ज्याङ समुन्द्री सतहबाट निक्कै उचाइमा रहेकाले चिसो बढी हुन्छ । बिहान बेलुका बाक्लो हुस्सु, चिसो स्याँठ निरन्तर चलिरहन्छ ।

police chauki gadhi1671613592.jpg

हेटौँडाबाट करिब २० किलोमिटरको दूरीमा छ, जितपुरभञ्ज्याङ । यही भञ्ज्याङको थुम्कोमा एउटा अस्थायी प्रहरी चौकी छ । जितपुर भञ्ज्याङमा करिब १५ वर्षअघि अस्थायी प्रहरी चौकी स्थापना गरिएको थियो ।

पुरानो काठको घरमा जस्ताले घेरिएको जीर्ण संरचनामा डेढ दशकदेखि प्रहरी बसिरहेका छन् । बस्ने छाप्रो मात्र हैन, पानी ल्याउन पनि २ घण्टा पदैल जानुपर्छ । तल खोल्सामा पुगेर ल्याएको पानी ३–४ वटा ड्रममा भरेर राख्दै प्रहरीले जीविका चलाउँदै आएका छन् ।

जितपुर भञ्ज्याङमा कान्ति लोकपथ सडकसँगै स्थानीयक्षेत्रमा शान्ति सुरक्षा दिने उद्देश्यले प्रहरी चौकी राखिएको थियो । तर, धेरै प्रहरी चिसो ठण्डीमा काठको छाप्रोमा बस्न बाध्य भए । जिल्ला प्रहरी कार्यालय मकवानपुरबाट शान्ति सुरक्षाका लागि खटिएका प्रहरीहरू जितपुर भञ्ज्याङको अस्थायी प्रहरी चौकीमा बसिरहेका छन् । जीर्ण काठको छाप्रोको तलबाट सानो पहिरो गएको छ । वर्षात्‌को बेला पहिरोको डर उत्तिकै रहेको प्रहरीहरू बताउँछन् ।

chauki 41671613590.jpg

प्रहरी चौकीले मकवानपुरगढीको २ र ७ नम्बर वडासँगै बकैयाको ११ र १२ नम्बर वडासम्म सेवा दिँदै आएको छ । त्यही चौकीको काँधमा काठमाडौं–तराई द्रुत मार्गमा सुरक्षाको जिम्मेवारी पनि छ ।

चौकीमा प्रहरी हवल्दार राजकुमार महतोको कमाण्डमा सहायक हवल्दार दुई र प्रहरी जवान कार्यरत छन् । चिसोमा कष्टसँग बस्दै आएका प्रहरीहरूले भवन निर्माणका लागि सम्बन्धित निकायमा पहल गरिदिन आग्रह गरेका छन् ।

प्रहरी हवल्दार महतोले चिसोमा छाप्रोमा बस्न मुस्किल भएको बताए । वर्षात्‌को समयमा पानी परेपछि पहिरो जाने त्रासले सताउने गरेको उनले स्मरण गरे । छाप्रोमा खाना पकाउनेसहित तीनवटा कोठा मात्रै छन् ।

chauki 51671613590.jpg

बजेट अभावका कारण प्रहरी चौकीमा इन्टरनेटसमेट जडान गर्न नसकिएको महतो बताउँछन् । चौकी भएको क्षेत्रमा खानेपानीको पनि समस्या रहेको उनले बताए ।

‘करिब २ सय मिटर तलबाट पिउने पानी, कपडा धुने, नुहाउने र अन्य कामका लागि पानी ल्याएर ड्रममा जम्मा गर्नुपर्छ,’ उनले भने । निर्माणाधीन द्रुतमार्गको काम भइरहेकाले द्रुतमार्ग निर्माणस्थलमा हुने झैझगडा, सामान चोरी, कान्ति लोकपथ सडकमा हुने सवारी दुर्घटनाका घटनामा चौकीले काम गरिरहेको छ ।

chauki 31671613588.jpg

प्रहरीहरूलाई गस्ती गर्ने सवारीसाधनको अभाव पनि छ । कतै घटना भएको खबर आउँदा सडकमा निस्किएर अन्य सवारीसाधनलाई ठाउँमा पुर्‍याइदिन आग्रह गर्नुपर्ने अवस्था रहेको महतोले गुनासो गरे ।

स्थानीय सामुदायिक वनको जग्गामा आश्रय लिएर बसेका प्रहरीका लागि स्थायी भवन संरचना निर्माणका लागि जग्गासमेत छैन । यसअघि २०७७ सालमै मकवानपुरगढी र बकैया गाउँपालिकाका जनप्रतिनिधिहरूले व्यवस्थित प्रहरी चौकी निर्माणका लागि प्रतिबद्धता जनाउँदै निर्णय गरेका थिए । तर, कागजमा भवन बनाउने भन्दै हस्ताक्षर गरेका जनप्रतिनिधिहरूको प्राथमिकतामा नपरेपछि प्रहरीहरू हालसम्म पनि जीर्ण छाप्रोमै बस्न बाध्य भएका हुन् ।

chauiki 21671613588.jpg

प्रहरी चौकी निर्माण गर्न २०७७ साल मंसिर १९ गते यहाँका स्थानीय तथा सरोकारवालाले निर्णय गरेका थिए । जितपुरभञ्ज्याङमा अस्थायी प्रहरी चौकीको भवन निर्माणका लागि मोहरे ढुंगेगढी टोल विकास संस्थाका अध्यक्ष सुधारजित गोलेसहित तत्कालीन जनप्रतिनिधिहरूको उपस्थितिमा निर्णय गरिएको थियो ।

त्यतिबेलै चौकी निर्माणका लागि मकवानपुरगढी गाउँपालिका र बकैया गाउँपालिकाले आर्थिक सहयोग गर्ने, चौकीको घडेरी खार्न शिवम् सिमेन्ट उद्योगले सहयोग गर्नेलगायतको निर्णय भएका थिए । तर, निर्णय कार्यान्वयन गराउन भूमिका खेल्नेहरूको प्राथमिकतामा नपरेपछि निर्णय कागजमै सीमित भएको छ ।

प्रकाशित मिति: बुधबार, पुस ६, २०७९ १६:३८