समाचारमा पनि नाच्ने आर्यन सिग्देल कसरी अभिनेता बने ? (भिडियो)

A+ A A-

रामचन्द्र सिग्देल र शारदा सिग्देलको जेठो सन्तान हुन्- आर्यन सिग्देल । बुबा रामचन्द्र सरकारी जागिरे थिए । सानो छँदा हरेक शनिबार बुबाले हलमा लगेर सिनेमा हेराउने गर्थे ।

घरमा आएपछि आर्यन कोठा बन्द गरेर हेरेका सिनेमाका डान्स स्टेप र अभिनयको नक्कल गर्थे । यतिसम्म कि उनले समाचारमा पनि नाँच्न भ्याए ।

त्यसबेला टेलिभिजनमा छोटाछोटा गीत र नाँच आउँथ्यो । हरेक गीत कण्ठ मात्रै होइन, डान्स स्टेपमा पनि उनी अभ्यस्त हुन प्रयास गर्थे । कुरो २०५६ सालतिरको हो । उनलाई जीवनमा आफ्नो बाटो आफैँ तय गर्नुपर्छ भन्ने लाग्यो । तर, बुबाआमाको चाहना सरकारी जागिरे बनोस् भन्ने थियो ।

त्यसो त उनी आफैँले जीवनमा के हुने ? निर्क्योल गरेका थिएनन् । अर्कातिर सरकारी जागिर खाने मन पनि थिएन, उनलाई । तर, नाटकप्रति भने उनको आकर्षण बढ्यो । नाटकमा अभिनय गर्ने हुटहुटी चल्यो । अन्ततः विस्तारै नाटक सिके । स्टेजहरूमा बाल कलाकारका रूपमा नाटकमा अभिनय गर्न थाले । उनी नाच क्लब ‘त्रिकोण कलाकेन्द्र’सँग आबद्ध भए । सोही संस्थाबाट विभिन्न कार्यक्रमहरूमा सहभागी हुन थाले ।

aryan-sigdel (3)1671611904.jpg

त्यसपछि सडक नाटकहरूमा अभिनय गर्ने अवसर उनलाई मिल्यो । तर, अभियनमा करिअर बनाउने आधार भने ‘जनताको प्रजातन्त्र’मा बन्यो । परिर्वतन नेपालले आयोजना गरेको यो सडक नाटक नै थियो । उनको नाटकमा मुख्य भूमिका थियो । यो नाटकले उनलाई अभिनयलाई नै पेसा बनाउने उत्प्रेरणा दियो, जहाँ उनी अभिनय पनि सिक्थे । उनी अभिनयमा खारिँदै गए । अभिनयको काम म्युजिक भिडियो र टेलिभिजनमा भ्याइनभ्याई हुनेगरी पाउन थाले । तर, आर्यनको अभिनय र त्यसप्रतिको रुचिलाई भने परिवारले मन पराएन ।

हुन पनि त्यसबेला कलाकारिता र नेपाली चलचित्र क्षेत्र व्यावसायिक भइसकेको थिएन । त्यस्तोमा आफ्ना सन्तानको सुरक्षित र सुनौलो भविष्य चाहने अभिभावकले कलाकारितामा लाग्न खोज्ने छोराछोरीलाई समर्थन गर्ने कुरै भएन ।

उसो त बाल्यकालदेखि नै घरमा अत्यधिक चलचित्र हेर्ने हुनाले आर्यनमा कलाकारिताप्रतिको छुट्टै छाप परेको थियो । त्यही भएर त अभिभावकको साथ नभए पनि अभिनयलाई निरन्तरता दिए । अभिनयमै रमाए । त्यसबेला उनले नसोचेको चाहिँ कलाकारिता क्षेत्रमा भविष्य सुरक्षित छ कि छैन भनेर हो । तर, पनि कलाकारितामै जम्ने निधो गरे ।

उनले सन् २००७ मै ‘किस्मत’ चलचित्रबाट नेपाली चलचित्र क्षेत्रमा डेब्यु गरे । डेब्यु चलचित्रमा गरेको उनको अभिनय रुचाइयो । चलचित्र राम्रो चल्यो । लगत्तै सन् २००८ मा ‘मौसम’ र २००९ मा ‘मेरो एउटा साथी छ’ चलचित्रमा अभियन गरे । यी चलचित्रहरूमा गरेको अभियनबाट उनलाई लगातार उत्कृष्ट अभिनेताको अवार्ड प्राप्त भयो ।

उनले सन् २०१० मा ‘कोही मेरो’ चलचित्रमार्फत् द सिने उत्कृष्ट अभिनेता अवार्ड जिते । सोही वर्षको अर्को चलचित्र ‘कसले चोर्‍यो मेरो मन’ले नेफ्टा उत्कृष्ट अभिनेता अवार्ड दिलायो । यही चलचित्र हो, जसले चलचित्रले नेपाली बक्स अफिसका सबै रेकर्ड तोडिदियो ।

सन् २०१४ मा आर्यन अभिनित ‘नोभेम्बर रेन’ चलचित्र सुपरहिट भयो ।

aryan-sigdel (2)1671611903.jpg

आर्यन भन्छन्, ‘सुरुदेखि नै म यो क्षेत्रमा रमाएँ । अभिनय क्षेत्रमै लाग्ने भन्ने त थिएन तर आज विचार गर्दा मभित्र बाल्यकालदेखि नै अभिनयको भोक जागेको रहेछ, जसले मलाई यहाँसम्म ल्याइपुर्‍यायो ।’

उनै अभिनेता आर्यन विगत तीन वर्षयता कुनै चलचित्रमा देखिएका छैनन् । कतिले उनलाई चलचित्र क्षेत्रबाट पलायन भएको भनिसके । तर, उनी हालै ‘डिसेम्बर फल्स्’ लिएर चलचित्र क्षेत्रमा फेरि आएका छन् ।

‘सस्पेन्स् लभस्टोरी’ रहेको यो चलचित्रमा आर्यन र उपासनाका साथै सलोन बस्नेत, सुमन थापा, नागेन्द्र रिजाल, दयाराम दाहाल, नरेश भट्टराईलगायतको अभिनय छ ।

‘तपाईंहरूको धेरै गाली पनि खाएँ । तपाईंहरूलाई पर्खाएँ पनि धेरै । तर, पर्खाइको फल मिठो हुन्छ भनिन्छ’, आर्यनले भने, ‘त्यो मीठो फल डिसेम्बर फल्स् हो । जुन यही पुस १४ मा आउँदै छ । मलाई चलचित्रमा जुन रूपमा देख्न चाहनुभएको छ र जुन सिनेमा कुरिरहनुभएको छ त्यो सिनेमा पनि डिसेम्बर फल्स् नै हो ।’

बीपीका खनालको कथा रहेको ‘डिसेम्बर फल्स्’को पटकथा र संवाद भने केदार भुसालले तयार पारेका हुन् ।

प्रकाशित मिति: बुधबार, पुस ६, २०७९ १४:२१