गगनको टिमले सांसदलाई भेटेको बेला आरजु र प्रकाशमानको एकपछि अर्को फोन

A+ A A-

दुई दिनको लगातार बैठकपछि कांग्रेसइतर समूहको प्रारम्भिक निष्कर्ष आयो- संसदीय दलको उम्मेदवार महामन्त्री गगन थापा बन्ने । तर, त्यसको 'फाइनल टच'को काम बाँकी थियो । नेता डा. शेखर कोइराला आफैँ महामन्त्री थापाको नाममा सकारात्मक भए पनि समूहका अन्य नेता सकारात्मक थिएनन् ।

चुनावमा प्रधानमन्त्रीको एजेन्डा लिएर गएका थापा जनताबाट अनुमोदन भएर आए । तर, आफ्नै समूहमा आफ्नो नाममा सहमति जुटाउन भने थापालाई निकै सकस पर्‍यो । सोमबार होटल एम्बेस्डरको बैठकअघि थापानिकट एक नेताले शिलापत्रसँग भनेका थिए, ‘गगनलाई उठाएर तेस्रो बनाउने खेल भयो ।’

तर, गगनलाई अघि सार्न शेखर तयार भए । उनले मानेपछि गगन हुँदैन भन्ने खेमाका नेताहरू पछि हट्न बाध्य भए । रामचन्द्र पौडेल अघिल्लो संसदीय दलको चुनावबाट बाहिरिएपछि गुटकै नेताबाट समेत बाहिरिन पुगे । सो नियति दोहोरिन नदिन शेखरलाई सजग गराउने समूहले मौन समर्थन गर्‍यो ।

त्यसपछाडिको कारण हो, पार्टीको १५औँ महाधिवेशनमा शेखरलाई सभापतिको रूपमा प्रस्ताव गर्ने । अर्को सरकारमा देउवाको विकल्प खोज्ने हो भने शेखरले नेतृत्व लिने । संसदीय दलमा थापाले प्रतिस्पर्धा गरेपछि सरकारको नेतृत्व महामन्त्री थापाले गर्ने हुन् ? दोस्रो विकल्प कसरी सम्भव छ ? भन्ने शिलापत्रको जिज्ञासामा शेखरनिकट एक नेता भन्छन्, ‘जित्ने ग्यारेन्टी के छ ?’

गगनले जित्ने ग्यारेन्टी देखिएन । किनकि पार्टीभित्रको अंकगणित सभापति शेरबहादुर देउवाको पक्षमा छ । त्यो आफ्नो पक्षमा पार्न थापाले ठूलै मिहिनेत गर्नुपर्ने छ । मध्याह्नमा एम्बेस्डरबाट सिंहदरबारनजिकै बसेरा होटलमा समूहको भेला हुँदासम्म संसदीय दलको उम्मेदवार को भन्नेमा टुंगो थिएन । तर, लैनचौरबाट बाहिरिँदै गर्दा सूचना आयो- शेखर आफैँले संसदीय दलको नेताको रूपमा थापालाई प्रस्ताव गर्ने ।

सो समाचार बनिसक्दासमेत स्वयम् शेखर र थापा बसेरा पुगेर भनिरहेका थिए, ‘होइन छलफल जारी छ ।’ बसेरामा ८९ मध्ये ३४ जना भेला भएको आँकडा इतर समूहको थियो । तीमध्ये २–३ जना अनुपस्थित थिए । स्वास्थ्य समस्या र व्यस्तताका कारण योगेश गौचन थकालीलगायत सांसद बसेरामा उपस्थित थिएनन् ।

बसेरा बैठकमा शेखरले भने, 'पुस्तान्तरण र रूपान्तरणसहित १४औँ महाधिवेशन सम्पन्न गरेका हौँ । त्यही स्पिरिटलाई मानेर उहाँ (गगन) लाई प्रस्ताव गरेको छु । तपाईंहरूले पनि समर्थन गर्नुहोला ।’ हलले ताली बजाएर शेखरको प्रस्ताव पारित गर्‍यो ।

सुरुमा बसेरामा अर्का महान्त्री विश्वप्रकाश शर्मा थिएनन् । बीचमा उनको इन्ट्री भयो । उनले संसदीय दलको नेतामा थापालाई प्रस्ताव गर्ने उद्घोष गरेका थिए । बैठकमा महामन्त्री शर्माले भने, ‘बदलिएको समय र बदलिएको सोचतर्फ कांग्रेस जाने खुड्किलो हो । यो समूहको नेतृत्व गर्ने शेखर कोइरालाको प्रस्ताव छ । उम्मेदवारी दर्ता गर्ने समयसम्म देउवाले पनि वैकल्पिक नामलाई प्रस्ताव गर्नुहुनेछ ।’ उनले थापालाई मतदान गर्न आग्रह गरे ।

हलमा महामन्त्री थापाको फोन तारन्तार बजिरहेको थियो । भोट बढाउन व्यस्त उनलाई बधाई र शुभकामनाको फोन आइरह्यो । ‘३८–४० मत हाम्रो छ, प्रतिस्पर्धा कडा हुनेवाला छ,’ फोनमा महामन्त्री थापा भन्दै थिए, ‘तपाईंहरूको पनि साथ पाउँछु भन्ने विश्वास छ ।’

हलमा अर्का युवानेता प्रदीप पौडेलको प्रतीक्षा थियो । पौडेलले पनि समर्थन गर्ने कुरा भएपछि उनको प्रतीक्षा बसेरामा भैरहँदा समूहनेता कृष्णप्रसाद सिटौलासँग बैठकमा थिए पौडेल । पौडेलको इन्ट्रीपछि १४औँ महाधिवेशनमा महामन्त्रीमा प्रतिस्पर्धा गरेका थापा, शर्मा, पौडेल र मिनेन्द्र रिजाल बसेरामा थिए । प्रतिस्पर्धामा रहेका डा. प्रकाशशरण महत र राजाराम कार्की थिएनन् । उनीहरू संस्थापन पक्षका हुन् । संस्थापन पक्षकै भए पनि पौडेलले युवाको नेताको हातमा हात मिलाए ।

बसेराबाट मनोनयन गराउन सिंहदरबारभित्र रहेको संसदीय दलको कार्यालय पुगे थापा । माहौल युवाको पक्षमा थियो । मनोनयन गराउन सभापति देउवा संसदीय दलको कार्यालय पुगिसकेका थिए । देउवा दलको कार्यालयमा पुगेको खबर बसेरामा आएपुगेपछि पौडेलको प्रतीक्षामा रहेको हलमा कुरा उठ्यो, ‘होइन, अब उतै (संसदीय दलको कार्यालयमा) बोलाऊँ ।’ देउवा पुगे भन्नेबित्तिकै ‘पहिला हामी पुग्नुपर्छ’ भन्ने भावना बसेरामा थियो ।

सभापति देउवा र महामन्त्री थापाले मनोनयन सँगसँगै दर्ता गराए । सुरक्षा थ्रेटको कारणले मनोनयनस्थलमा देउवाले केही बोलेनन् । इतर समूहले परिवर्तन र युवाको पक्षमा माहौल बनेको सन्देश दियो । तर, बालुवाटारबाट चर्को लबिङमा रहेको देउवा खेमाले आन्तरिक तयारी बलियो गरिरहेको थियो ।

मनोनयनपछि महामन्त्री थापाले देउवालाई उम्मेदवारी फिर्ता लिन आग्रह गरे । उनले पार्टीलाई रूपान्तरण र देशलाई बदल्न युवानेताहरू एक ठाउँमा उभिएको बताए । थापाले उपसभापति धनराज गुरुङ, महामन्त्री विश्वप्रकाश शर्मा, नेता प्रदीप पौडेल र आफू एक ठाउँमा उभिएकाले पार्टी रूपान्तरणसँगै देश पनि बदल्ने बताए । ‘स्थायित्वको निरन्तरता र परिवर्तनको कुरा डा. शेखर कोइरालाले मनन गर्नुभएको छ,’ उनले भने, 'धनराज, विश्वप्रकाश, प्रदीप र म एक ठाउँमा उभिएका छौँ । अब पार्टीलाई रूपान्तरण गर्छौं र देश पनि बदल्छौँ ।’ उनले पार्टीको भविष्यका लागि पनि अब पुराना नेताहरूले युवापुस्तालाई अगाडि सार्नुपर्ने बताए ।

थापाले शेखर र सहयोग गर्ने सबैलाई सम्मान र बधाई दिइरहँदा सिंहदरबार नगएर बालुवाटारमा मतको लोखजोखा गरिरहेका देउवा पत्नी आरजु राणा र प्रकाशमान सिंह मतदाता (सांसद) फकाउँदै थिए ।

होटल बसेराबाट सिंहदरबारमा इतर समूह पुगिरहँदा थापानिकट नेताहरू संसदीय दलमा भोट बढाउन लबिङमा थिए । एक सांसदलाई भेटेर गगनको टोली छलफलमा थियो । त्यही समयमा बालुवाटारबाट आरजु र सिंहको फोन एकपछि अर्को गर्दै आयो । उनीहरू बालुवाटारबाट देउवा जिताउन सक्रिय थिए ।

महामन्त्री थापा प्रतिस्पर्धामा आउँदा कुनै प्रभाव नपरेको बुझाई संस्थापनमा छ । ‘को हुँदा सजिला को हुँदा अप्ठेरो भन्ने हुँदैन । नतिजा भोलि आइहाल्छ यसबारे थप टिप्पणी नगरौँ,’ कांग्रेस प्रवत्ता डा. प्रकाशशरण महतले शिलापत्रसँग भने ।

मनोनयपछि समूहमा थापाले आफ्ना कुरा राखे ।

समूहमा छलफलपछि कांग्रेस उपसभापति पूर्णबहादुर खड्काले आफ्ना कुरा राखे । उनले भने, ‘सभापतिले भारी मतको साथ विजय प्राप्त गर्नुहुन्छ । मुलुकको उन्नति प्रगति उहाँको नेतृत्वमा कांग्रेस पहिलो पार्टी भएको छ । सबै दल जोड्ने अनुभव छ । शासन चलाउने अनुभव आवश्यक छ । सबै दलले स्वीकार्ने नेतृत्व आवश्यक छ ।’

शान्ति प्रक्रियालाई निष्कर्षमा पुर्‍याउन देउवाको नेतृत्व आवश्यक रहेको उनले बताए । थापाले उम्मेदवारी फिर्ता लिन देउवालाई गरेको आग्रहबारे उनले भने, ‘ठीक छ, उहाँले आफ्नो कुरा राख्नुहुन्छ । पुस्तान्तरणको भविष्य आउँछ भोलि । देउवाको नेतृत्वमा पुस्तान्तरण हुँदै जान्छ । द्वन्द्वले पारेका घाउ पुर्न बाँकी छ । त्यसको लागि माओवादी, एस र एमालेलाई समेत लिएर लैजाने कुराका लागि देउवा उपयुक्त हुनुहुन्छ ।’

पुस्तान्तरण र रूपान्तरण समयसँगै हुने उनको भनाइ थियो । ‘युवा साथीहरूले सोचौँ । सर्वसम्मत रूपमा सभापतिजीलाई अघि बढाऔँ,’ उनले भने ।

प्रकाशित मिति: मंगलबार, पुस ५, २०७९ १९:१६