वडा कार्यालयको सामान चोरेर हैरान पारेका व्यक्ति पक्राउ

A+ A A-

पोखराको वडा कार्यालयमा शृंखलाबद्ध चोरी गर्दै आएका एक व्यक्तिलाई प्रहरीले पक्राउ गरेको छ । एक वर्षदेखि शृंखलाबद्ध रुपमा पोखरा महानगरपालिकाका आधा दर्जन बढी वडा कार्यालयमा चोरी गरेको आरोपमा प्रहरीले काठमाडौं–११ घर भई पोखरामा डेरा गरी बस्ने किशोर थापालाई पक्राउ गरेको बुधबार आयोजित पत्रकार सम्मेलनमा जानकारी दिएको छ ।

उनी यसअघि पनि चोरी मुद्दामा दुईपटक जेल परिसकेका व्यक्ति हुन् । पछिल्लो पटक २०७१ सालदेखि २०७४ सम्म जेल बसेका उनी छुटेलगतै फेरि चोरी धन्दामा लागेको भेटिएको जिल्ला प्रहरी कार्यालय कास्कीका प्रमुख एसपी दानबहादुर कार्कीले बताए ।

‘चोर पत्ता लगाउन नसक्दा हामीलाई लाज लाग्थ्यो,’ प्रमुख एसपी कार्कीले भने, ‘राजनीतिक, आर्थिक वा आपराधिक के हिसाबले चोरी भएको छ भनेर गहन अध्ययन गर्न थाल्यौं । सीसीटीभी फुटेजका आधारमा चोर पक्राउ परेको हो ।’

एक वर्षयता एकपछि अर्को गर्दै पोखरा महानगरका वडा कार्यलयको कम्प्युटर, पिन्टर र ल्यापटपलगायतका सामग्री एउटै व्यक्तिबाट चोरी भएको हुलिया पाएपछि लामो अनुसन्धानपश्चात् प्रहरीले थापालाई पक्राउ गरेको हो ।

२३ साउनमा पोखराको शहीदचोकबाट ५१ वर्षीय थापालाई प्रहरीले पक्राउ गरेको हो । थापाले पोखरामा चोरी भएका सामान काठमाडौं लगेर बेच्ने गरेको अनुसन्धानले देखाएको छ । उनले चोरी गर्दा प्रयोग गर्ने सामान सीसीटीभी क्यामेरामा देखिएको हुलिएका आधारमा पक्राउ गरिएको हो । थापाले लगाएको जुत्ता, टोपी, टिसर्ट, ज्याकेट र मास्कका आधारमा कोठामा खानतलासी गर्दा चोरीको प्रमाण भेटिएको थियो ।

उनीसँगै चोरीको सामान किन्ने रुपचन्द्र गोपालीलाई पनि कास्की प्रहरीले नियन्त्रणमा लिएको छ । काठमाडौंको कलंकीमा कम्प्युटर मर्मत पसल चलाएका गोपालीलाई चोरीको सामान किनेको आरोपमा प्रहरीले पक्राउ गरेको हो ।

प्रहरीका अनुसार गोपालीले चोरीका सामान मात्र किनबेच गर्दै आएको अनुसन्धानबाट खुलेको छ ।

उनीहरुको साथबाट मनिटर १७ थान, सीपीयू ९ थान र ल्यापटप ३ थान बरामद गरिएको छ । थापाले विशेषगरी राति साढे ११ देखि साढे १२ बजेको समयमा चोरी गर्ने गरेको खुलेको छ ।

‘अरु सुतेपछि रडले ढोका फोरेर सामान चोरी गर्ने र निर्माणाधीन घरमा लगेर राख्ने गरेको देखियो,’ एसपी कार्कीले भने, ‘भोलिपल्ट जेब्रा झोलामा हालेर काठमाडौं लगी गोपालीको पसलमा दिने गरेको तथ्य फेला परेको छ ।’

पछिल्लोपटक गत साता बुधबार राति पोखरा महानगरको ३१ वडा कार्यालयमा चोरी भएको थियो । कार्यालयमा ढोका फोरेर कम्प्युटर, ल्यापटपलगायतका सामग्री चोरी भएको थियो ।

यसअघि पोखराका वडा नम्बर ५, १३, १४, १५ र १६ लगायतका वडा कार्यालयमा चोरी भएको थियो ।

प्रकाशित मिति: बुधबार, साउन २९, २०७६ २३:४४