स्थानीय उत्पादन चिनाउँदै सुदूरपश्चिम महोत्सव, घरेलु उत्पादनमा झुम्मिए ग्राहक

स्थानीय उत्पादन चिनाउँदै सुदूरपश्चिम महोत्सव, घरेलु उत्पादनमा झुम्मिए ग्राहक

बिजन्ती चौधरी

A+ A A-

कैलालीको धनगढी उपमहानगरपालिका- १४ की बिजन्ती चौधरी बेत बाँसबाट बनेका फर्निचरहरू उत्पादन गर्छिन् । बिजन्तीले नौ वर्षदेखि कुर्सी, फूलदानी, चुरा दानी, मुडा, सोफालगायतका सामग्रीहरू बनाउँदै आएकी छन् ।

अहिले कैलाली उद्योग वाणिज्य संघको आयोजनामा भएको सुदूरपश्चिम महोत्सवमा बिजन्तीले आफूले उत्पादन गर्दै आएका ती सामानहरुको स्टल राखेकी छन् । महोत्सवमा प्रचार–प्रसारका लागि स्टल राखेको बताउने उनी अन्य समयमा भने गाउँमै आफ्नो व्यवसाय चलाउँछिन् ।

वेतबाँसबाट बनेका सामान बिक्री गरिरहेकी बिजन्तीले घरेलु लघु उद्यमले स्टल उपलब्ध गराएपछि महोत्सवमा व्यापार गर्न आएको बताइन् । उनले महोत्सवबाट आफ्ना उत्पादन सबैलाई देखाउन, बिक्री गर्न तथा प्रचार–प्रसार गर्न सहज भएको बताइन् ।

‘गाउँमा एउटै ठाउँका मानिसले मात्रै अवलोकन गर्छन् । यहाँ विभिन्न ठाउँबाट मानिसहरू आउँछन्,’ उनले भनिन्, ‘धेरै मानिसहरूले अवलोकन गर्दा खुसी लाग्छ । व्यापार पनि राम्रो भएको छ ।’

उनले महोत्सव सुरु भएदेखि दैनिक ८ देखि १० हजारसम्मको कारोबार भइरहेको जानकारी दिइन् । महोत्सवमा विभिन्न क्षेत्रका मानिसहरूले आएर सामान मन पराइदिँदा र किनेर लग्दा राम्रो लाग्ने गरेको बिजन्ती सुनाउँछिन् । ‘यस्ता महोत्सवले अझै राम्रो काम गर्न हौसला थपेको छ,’ उनले भनिन् ।

०००

धनगढी उपमहानगपालिका- ८ की शान्ति गिरीले पनि महोत्सवमा आफूले उत्पादन गर्दै आएको आनन्दी अचारको स्टलमा राखेकी छन् । उनको स्टलमा शान्तिले उत्पादन गरेका अमला, मुला, कागती, लसुन, आँप, लप्सी, डल्ले, अकबरे खुर्सानीलगायतका अचारहरू पाइन्छ ।

शान्ति गिरी

कोभिडमा २ वर्ष व्यवसाय प्रभावित भएको शान्तिको भनाइ छ । अहिले महोत्सवका कारण व्यापार बढेको भन्दै उनले खुसी व्यक्त गरिन् । ‘पहिलेको जस्तै धेरै राम्रो व्यापार हुन नसके पनि विभिन्न क्षेत्रबाट मानिसहरूले आएर आफ्नो अचार मनपराइदिएका छन्,’ उनले भनिन् ‘अघिल्ला वर्षहरूका तुलनामा यस वर्ष महोत्सव स्थल पनि राम्रो बनाएको छ ।’

अघिल्ला वर्षहरूमा हिँड्ने स्थानमा धुलो उड्दा समानहरू बिग्रिने गरेको उनको सम्झना छ । यसपटक भने पूरै स्टल क्षेत्रमा हिँड्ने बाटोमा प्लास्टिकको कार्पेट प्रयोग गर्दा धुलोको समस्या नभएको उनी बताउँछिन् ।यस्तै, अहिले फराकिलो क्षेत्र र स्टलको व्यवस्थापनमा पनि आयोजकले ध्यान दिएकाले व्यापारी, ग्राहक तथा अवलोकनकर्तालाई सहज भएको उनको बुझाइ छ ।

०००

बैतडीको दोगडा केदार गाउँपालिका- ७ का टेकबहादुर कार्कीले पनि महोत्सवमा स्टल राखेका छन् । उनले पहाडमा पाइने घ्यु, चिउरीको मह, ओखर, चुक, अचार, अचार दाना, मौसमी, सुन्तला, पहाडी गुँड, मास, गहत, भट्ट, टिमुरलगायत विभिन्न सामग्री बेच्न राखेका छन् ।

पहाडमा उत्पादन भएका खाद्यान्नहरू तराईमा त्यही पनि महोत्सवमा राख्न र देखाउन पाउँदा राम्रो लागेको टेकबहादुर बताउँछन् । बाहिरको भन्दा केही मूल्य सस्तो गरेर सामान बिक्री गर्ने गरेको उनको भनाइ छ । दैनिक ८ देखि १२ हजारसम्म बिक्री हुने गरेको उनी बताउँछन् ।

टेकबहादुर कार्की र बिजन्ती चौधरी

०००

महोत्सवमा नेपालका विभिन्न जिल्लाबाट आएकाहरूले स्टल राखेका छन् । स्थानीय उत्पादनलाई पनि त्यत्तिकै प्राथमिकता दिइएको छ ।

यस वर्ष पनि ‘समृद्ध सुदूरपश्चिमका लागि आर्थिक समृद्धि’ भन्ने मूल नाराका साथ महोत्सव आयोजना गरिएको छ । सुदूरपश्चिमको औद्योगिक, व्यापार, कृषि तथा पर्यटन मेलाको रूपमा महोत्सव आयोजना हुँदै आएको छ । कृषि उत्पादन, मह, जडीबुटी, हस्तकला, अल्लोका सामग्री, अलैँची, अदुवा, मसला, फर्निचर, अटो मोबाइल, गार्मेन्ट, इलोक्ट्रोनिक, होटल, सूचना प्रविधिलगायत व्यापारिक, रमाइलो मेला तथा बाल उद्यानसहितका ४ सयभन्दा बढी स्टल रहेको आयोजकले जनाएको छ ।

महोत्सवमा २ करोडभन्दा बढीको लगनीमा रहेको छ । महोत्सवमा १० करोडबराबरको कारोबार हुने अनुमान गरेको कैलाली उद्योग बाणिज्य संघले जनाएको छ ।

प्रकाशित मिति: बिहीबार, मंसिर २९, २०७९ १८:००