लम्कीचुहाकी मेयर शाहीको आफ्नै हात जगन्नाथ, आफ्नै शोरुमबाट वडाध्यक्षका लागि किनिन् लाखौँका मोटरसाइकल

लम्कीचुहाकी मेयर शाहीको आफ्नै हात जगन्नाथ, आफ्नै शोरुमबाट वडाध्यक्षका लागि किनिन् लाखौँका मोटरसाइकल

A+ A A-

कैलालीको लम्कीचुहा नगरपालिकाकी मेयर सुशीला शाही एकपछि अर्को विवादमा तानिँदै आएकी छन् । आइतबार पत्रकार खेम ढुङ्गानालाई बन्धक बनाएर फोटो भिडियो डिलिट गर्न लगाएको आरोप लागेकी मेयर शाहीले अहिले नगरपालिकासँग समन्वय नै नगरी लाखौँ रकम पर्ने मोटरसाइकल वडा अध्यक्षका लागि खरिद गरेको पनि खुल्न आएको छ ।

मेयर शाहीले वडाध्यक्षका लागि आफ्नै जीएसएस ट्रेडर्सबाट करिब ४० लाख बढी मूल्यका मोटरसाइकल खरिद गरेको खुलेको छ । मेयर शाही लम्की बजारमा रहेको जीएसएस ट्रेडर्सकी सञ्चालकसमेत हुन् ।

नगरपालिकाले गाडी खरिदका लागि भनेर बजेटमा २५ लाख रुपैयाँ मात्रै छुट्याएको भए पनि गाडी भने ४० लाखसम्मको खरिद भएको पाइएको हो । मेयर शाहीले वडा अध्यक्षका लागि भनेर आफ्नै शोरुमबाट एउटैको मूल्य साढे ४ लाखसम्म पर्ने गाडी खरिद गरेकी हुन् ।

उनी मेयर भैसकेपछि सो शोरुमबाट जनप्रतिनिधिका नाममा पटकपटक गरी सातवटा मोटरसाइकल खरिद भएको छ । ती मोटरसाइकल वडाध्यक्षहरूका लागि खरिद गरिएको भनिएको छ ।

लम्कीचुहा नगरपालिका वडा नं ६ का वडाध्यक्ष लोकेन्द्र कठायतले खरिद गरिएको मोटरसाइकल नलग्ने भनेपछि मोटरसाइकल खरिदको घटना सार्वजनिक भएको हो । वडाध्यक्ष पुरानै मोटरसाइकल चढिरहेका छन् । मोटरसाइकल खरिदको विषयलाई लिएर चर्को विरोध भएपछि वडा नं १ का वडाध्यक्ष नेत्रप्रसाद खनाल र वडा नं २ का वडाध्यक्ष सन्तोषकुमार ओलीले मोटरसाइकल फिर्ता गरेका छन् ।

यस्तै, मोटरसाइकल खरिदमा विवाद देखिएपछि वडा अध्यक्षहरूले मोटरसाइकल फिर्ता गरेको स्रोतको दाबी छ । नगरसभाले मोटरसाइकल खरिदका लागि २५ लाख रुपैयाँ छुट्याएको थियो । नगरपालिकाले मोटरसाइकल खरिदमा सार्वजनिक खरिद ऐनलाई समेत मिचेको पाइएको छ ।

एकैपटक मोटरसाइकल खरिद गर्दा टेण्डर गर्नुपर्ने भएकाले कोटेसनमार्फत पटकपटक मोटरसाइकल खरिद गरिएको छ । कोटेसन माग गर्दासमेत नजिकका सबै शोरुमलाई सार्वजनिक सूचनामार्फत कोटेसन आह्वान गर्नुपर्नेमा त्यस्तो गरेको पाइँदैन । स्रोतका अनुसार मेयर शाही सञ्चालक रहेको शो रुमले कागजात मिलाएर कोटेसन भरेको पाइएको छ ।

प्रमुख प्रशासकीय अधिकृत शेरबहादुर बुढाले नगरपालिकाले सातवटा मोटरसाइकल खरिद गरेको बताए । उनले पाँचवटा मोटरसाइकलको भुक्तानी दिएको र दुईवटाको भुक्तानी दिन बाँकी रहेको जानकारी दिए । ‘दुईवटा मोटरसाइकलको भुक्तानी दिन बाँकी रहेको हुँदा ती मोटरसाइकल वडा अध्यक्षले फिर्ता गरेका हुन्,’ उनले भने, ‘त्यसको खरिद प्रक्रिया पुगेपछि फेरि वडा अध्यक्षलाई दिइनेछ ।’

एउटा मोटरसाइकलको मूल्य साढे ३ देखि साढे ४ लाखसम्म मूल्यका रहेको उनले बताए । स्रोतका अनुसार नगरपालिका कर्मचारीहरूका लागि समेत सोही शोरुमबाट थप मोटरसाइकल पनि खरिद भएको पाइएको छ । अहिलेसम्म कतिवटा मोटरसाइकल खरिद भयो भन्ने बारेमा नगरपालिकाको जिन्सी शाखाका प्रमुख खत्रीले प्रस्ट जवाफ दिएनन् । उनले आफू हालै मात्र शाखा प्रमुख भएर आएकाले धेरै कुरा थाहा नभएको बताए ।

नगरपालिकाले महँगो मोटरसाइकल खरिद गरेको छ । हालै बजारमा आएको यामाहा कम्पनीको ४ लाख ४० हजार रुपैयाँ पर्ने मोटरसाइकल खरिद गरिएको बताइएको छ । आफ्नो व्यवसायलाई केन्द्रमा राखेर मेयर शाहीले वडाध्यक्षका लागि महँगो मोटरसाइकल खरिद गर्न लगाएको भन्दै चर्को आलोचना भएको छ ।

आइतबार मात्रै नगर प्रमुख सुशीला शाहीले आफ्नो घर निर्माणका क्रममा नगरपालिकाको सवारीसाधन र औजार प्रयोग भएको विषयमा विवाद भएको थियो । उनले आफ्नो निजी घरमा नगरपालिकाको सवारीसाधन र औजार प्रयोग गरेको विषयमा पत्रकार खेम ढुंगानाले रिपोर्टिङ गर्न खोज्दा जवाफ नदिने बताएकी थिइन् । उनले केही फोटो र भिडियो खिचिसकेपछि उनले नियन्त्रण लिएर डिलिट गर्न लगाएको उनीमाथि आरोप छ ।

आइतबार भएको घटनापछि उनी चर्को विवादमा फसेकी छन् । सोमबार मेयर शाहीले विज्ञप्ति जारी गर्दै ठेकदारले आफूलाई जानकारी नगराई एक दुईपटक घर निर्माणमा नगरपालिकाको सवारीसाधन र औजार प्रयोग भएकोमा आफूले गल्ती महसुस गरेको बताएकी छिन् ।

सोही विषयमा प्रतिक्रिया लिन पुगेका ढुङ्गानालाई बन्धक बनाई फुटेज डिलिट गर्न नलगाएको उनले विज्ञप्तिमार्फत जनाएकी छन् । पत्रकारलाई बन्धक बनाई फुटेज डिलिट गराएको आरोप लागेकी शाहीले प्रेस विज्ञप्ति जारी गर्दै वैयक्तिक गोपनीयतासम्बन्धी ऐन, २०७५ को दफा ३ को उपदफा ४ विपरीत काम गरेका कारण ढुङ्गानाले खिचेको भिडियो आफैँले मेटाएको बताएकी थिइन् ।

प्रकाशित मिति: मंगलबार, मंसिर २७, २०७९ १८:५२