राजेश हमालसहितका ‘सेलेब्रिटी’ले अक्करे भिरमा हेरे ‘हनी हन्टिङ’ (भिडियोसहित)

राजेश हमालसहितका ‘सेलेब्रिटी’ले अक्करे भिरमा हेरे ‘हनी हन्टिङ’ (भिडियोसहित)

A+ A A-

धेरैपहिले एरिक भ्याल्ली नामका फोटोग्राफरले नेपालका भिरमौरीबारे नेपाल आएर गहन अध्ययन गरे । भिरमौरीको साहसिक ढङ्गले मह काढ्ने शैली अर्थात् ‘हनी हन्टिङ’का सुन्दर तस्वीरहरू समेटेर किताब नै लेखे । यसरी एरिक भ्याल्लीले नेपालको पहाडी भेगका ठूलठूला भिरमा पाइने भिरमौरीबारे विश्वव्यापी रूपमा प्रकाश पारेका थिए । एरिकले नेपाली भिरमौरी र हनी हन्टिङलाई विश्वव्यापीकरण गरेको धेरै वर्ष बितिसक्यो ।

त्यसयता उनीबाहेक पनि धेरै विदेशी र नेपालीसमेतले नेपाली हनी हन्टिङका विषयमा धेरै डकुमेन्ट्री बनाए । परिणामतः धेरै मानिस यस हनी हन्टिङबारे जानकार भए । तर, नेपाली भिरमौरी र हनी हन्टिङलाई पर्यटनसँग जोड्न सकिएको अवस्था छैन । हनी हन्टिङ हेर्ने चाहना भएका विदेशी मात्र होइन, नेपालीसमेतका लागि सहज वातावरण बनेको छैन । बरू, पछिल्लो समय पैसा खर्च गरेरै घुम्न रुचाउने नेपालीहरू स्वदेशभन्दा विदेश घुुम्न जानेको संख्या बढ्दो छ ।

अर्कोतर्फ, नेपालको राष्ट्रिय ढुकुटीमा डलरको सञ्चिति घट्दो क्रममा रहेको अवस्था छ । यसरी देशको आर्थिक अवस्था दैनिक रूपमा कमजोर हुँदै गएको बखत नेपालीहरू घुम्नकै लागि विदेश जाँदैगर्दा नेपालको अर्बौं रुपैयाँ पनि विदेश पुगिरहेको छ । यसो हुनु देशका लागि आर्थिक दृष्टिले दुर्भाग्यपूूर्ण हो । अन्ततः यसरी नेपाली पैसा विदेशिँदा यसको असर सोझै देशको अर्थतन्त्रमा पर्छ । यसै विषयलाई मध्यनजर गर्दै स्पार्क ग्रुपले घुम्नका लागि नेपालभित्रै त्यस्ता धेरै पर्यटकीय गन्तव्यको प्रवर्द्धन गरिरहेको छ, जहाँ नेपाली नै पुगेका छैनन् भनेर ।

त्यस्ता नेपालीलाई घुमाउँदै आन्तरिक पर्यटनलाई प्रवर्द्धन गर्ने उद्देश्यले स्पार्क ग्रुपले स्पार्क एड्भेन्चर २०२२ आयोजना गर्‍यो । करिब तीन दशकअघि ‘रेन्टर कार’ सेवाप्रदायक कम्पनीका रूपमा उदाएको स्पार्कले ‘कनेक्टिङ’ नाम दिएर गरेको स्पार्क एड्भेन्चर २०२२ मा नायक राजेश हमाल, वरिष्ठ विमानचालक विजय लामा, पूर्वअन्तर्राष्ट्रिय तेक्वान्दो खेलाडी दीपक विष्ट, वरिष्ठ अधिवक्ता सुशीलकुमार पन्त, अभिनेता विपिन कार्की, गायक रामकृष्ण ढकाल, हास्य कलाकार मधुसुदन पाठक, कैलाश कार्कीसहित विभिन्न क्षेत्रका करिब २ सय प्रतिष्ठित व्यक्तिहरूको उपस्थिति थियो ।

स्पार्कले उनीहरूलाई लमजुङको भुजुङ पुर्‍याएर प्रत्यक्ष रूपमा भिरमौरीको मह काढ्ने अर्थात् हनी हन्टिङ गरेको दृश्य अवलोकन गराएको थियो । हनी हन्टिङको दृश्य हेर्न रमेका नायक हमालले नेपालको ऐतिहासिक तथा सांस्कृतिक ठाउँमा आएर प्रत्यक्ष रूपमा मह काढेको हेर्न पाउँदा अत्यन्तै हर्षित भएको शिलापत्रलाई बताए । उनी थप्छन्, ‘म आफ्नै योजनाले यस ठाउँमा आउँथेँ वा आउँदिनथेँ तर स्पार्क ग्रुपले यो अवसर जुराइदिएको छ । स्पार्क ग्रुपप्रति विशेष आभारी छु ।’

पूर्वअन्तर्राष्ट्रियस्तरका तेक्वान्दो खेलाडी दीपक विष्टले आफूले हनी हन्टिङबारे सुनेको र टेलिभिजनमा हेरेको तर आफ्नै आँखाले प्रत्यक्ष रूपमा पहिलोपटक हेर्न पाएकोमा खुसी लागेको बताए । यो नेपालमा फरक कार्यक्रम भएको स्पार्क एड्भेन्चर २०२२ का इभेन्ट म्यानेजर अमरदीप भट्टराई बताउँछन् ।

भट्टराईले राजधानीबाट टाढा रहेको लमजुङको भुजुङसम्म विभिन्न क्षेत्रका स्थापित व्यक्तित्वहरूलाई पुर्‍याउन सहज नभएको बताए । तर, आफ्नो व्यवस्थापकीय नेतृत्वमा लगेर हनी हन्टिङको प्रत्यक्ष अवलोकन गराउन पाउँदा सन्तोष मिलेको पनि उनले बताए ।

स्पार्क ग्रुपका सीईओ रोशन घिमिरेका अनुसार आफू एक युवक भएको र देशमा केही गरौँ भन्ने चाहना भएकाले अरुले गरिरहेको भन्दा केही पृथक् गर्न स्पार्क एड्भेन्चर २०२२ को आयोजना गरिएको हो । ‘धेरै चुनौतीबीच उत्कृष्ट रूपले स्पार्क एड्भेन्चर २०२२ लाई सफल बनायौँ’, उनले भने, ‘यसले हामीलाई अझै राम्रो गर्ने ऊर्जा मिलेको छ । आगामी इभेन्ट योभन्दा उत्कृष्ट गर्छौं ।’

प्रकाशित मिति: मंगलबार, मंसिर २७, २०७९ १८:२०